სხვადასხვა კენკროვნების, ასევე, კურკოვანებისგანაც მოვამზადოთ კერკი, ანუ გავაშროთ ნაყოფი მზის გულზე. ამისთვის მზიანი და ცხელი დღეებია საჭირო.
დასავლეთ საქართველოში, გურიაში განსაკუთრებით, შესაძლოა, კერკის დამზადებისთვის ხელი შეგვიშალოს წვიმებმა. თუმცა, შესაძლებელია, დავიხმაროთ როგორც ელექტრო, ისე შეშის ღუმელი, ასევე გაზქურა. თუ გვინდა, ზამთარში სხვადასხვა ხეხილოვანის კერკი გვქონდეს, ამისთვის თავის შეწუხებაც ღირს გაზაფხულზე და ზაფხულშიც, როცა საკმაოდ ცხელა და ზოგჯერ ასეთი ნუგბარის მომზადებაში ამინდი ხელს გვიშლის.
მოცხარს, ჟოლოს, მაყვალს თუ ალუბალს, გარეცხვისა და გაშრობის შემდეგ მოვათავსებთ მარლადაფენილ საცერზე ან სპეციალურად მოწნულ სინზე. დავდგამთ მზეზე. საღამოს ღუმელთან დავდოთ. ასე გავიმეოროთ რამდენიმე დღის განმავლობაში, სანამ ნაყოფი კარგად არ შეჭკნება. ხშირად მოვურიოთ, ისე, რომ მზემ ყველა მხარეს დახედოს ნაყოფს. როცა ვნახავთ, რომ კარგად გამოშრა, შევკეროთ დოლბანდის ტომსიკა, ჩავყაროთ კერკი და შევინახოთ მშრალ ადგილზე. ასე მომზადებული კერკი საუკეთესოა მზა სახითაც და ასევე სხვადასხვა ნამცხვარსა თუ ბრინჯის ფლავში შესარევად.
