“გურია ნიუსის“ ფეისბუქგვერდზე ქალაქ ოზურგეთიდან მოგვწერეს, რომ ერთ-ერთ პრესტიჟულ მაღაზიაში ისეთი კარაქი ნახა, რომელიც, სავარაუდოდ, თაგვისგან იყო დაზიანებული.
“აი, რა ხდება ვასაძის მაღაზიაში, სირცხვილია, უბრალოდ. ხალხი ენდობა მათ და ისინი კიდევ თაგვის საწამლავს ვერ ყიდულობენ, რომ მაღაზია მოაწესრიგონ. მოხარული დავრჩები თუ ხალხს ინფორმაციას მიაწოდებთ ამის შესახებ“, _ გვწერს ერთ-ერთი მომხმარებელი ოზურგეთიდან,
სურსათის ეროვნული სააგენტოს გურიის რეგიონული ოფისის ხელმძღვანელი ნინო შეწირული “გურია ნიუსთან“ საუბრის დროს ამბობს, რომ აღნიშნულის შესახებ ერთ-ერთმა მომხმარებელმა აცნობა და სააგენტო ამ ფაქტით დაინტერესდა.
“ჩვენ რომ დაგვიკავშირდა ქალბატონი და გვითხრა დარღვევის შესახებ, უკვე ეს ფაქტი მომხდარი იყო. ერთ კვირაზე მეტი იყო გასული, რომ მოგვწერა და როდესაც დავათვალიერეთ მაღაზია, იქ ყველაფერი წესრიგში იყო. ამიტომ, როდესაც მომხმარებელი კონკრეტულ დარღვევას აღმოაჩენს, კარგი იქნება თუ დროულად დაგვიკავშირდება. ამას იმიტომ ვამბობ, რომ დროულად მოხდეს ჩვენი შესვლა მაღაზიებში“, _ გვითხრა ნინო შეწირულმა.
“გურია ნიუსი“ ესაუბრა აღნიშნული მაღაზიის მენეჯერს.
“ეს არის ცილისწამება ჩვენი მაღაზიის მიმართ. კონკრეტული ფაქტი არ არსებობს და ვერც იარსებებს, რადგან ეს ყველაფერი სიმართლეს არ შეესაბამება და ტყუილია. ვის გაუგია ჩართულ მაცივარში თაგვი შევიდეს. ყველა მაღაზიაში კარაქი მაცივარშია და თქვენ რა გითხრეს, არ ვიცი. მოვიდა სურსათის უვნებლების სააგენტოს წარმომადგენლები და დადებითი დასკვნა დადეს”, _ გვითხრეს ოზურგეთის ერთ-ერთ მაღაზიაში.
