ლანჩხუთის მუნიციპალიტეტის მერიის გადაწყვეტილებით, ა(ა)იპ ლანჩხუთის მუნიციპალიტეტის ეკონომიკური განვითარებისა და ინოვაციების ცენტრი უქმდება. აღნიშნული გადაწყვეტილების არგუმენტად, საკრებულოში წარდგენილი დოკუმენტის მიხედვით, მუნიციპალიტეტის მერს სახელმწიფო აუდიტის დასკვნა მოჰყავს.
“სახელმწიფო აუდიტის სამსახურის მიერ ლანჩხუთის მუნიციპალიტეტში ჩატარებული აუდიტორული შემოწმების შედეგად გაცემულ რეკომენდაციებში ერთ-ერთი რეკომენდაცია იყო მერიის სტრუქტურული ერთეულების ფუნქციებისა და მუნიციპალიტეტის მიერ დაფუძნებული იურიდიული პირის საქმიანობის სფეროებს შორის ფუნქციათა გაორების აღმოფხვრა. აუდიტის ანგარიშში პირდაპირ დასახელდა ა(ა)იპ “ლანჩხუთის მუნიციპალიტეტის ეკონომიკური განვითარებისა და ინოვაციების ცენტრი”, რომლის საქმიანობის საგანიც ქმნიდა ფუნქციათა გაორების შთაბეჭდილებას. აღნიშნულიდან გამომდინარე, მერიის პოზიციაა გახორციელდეს ხსენებული იურიდიული პირის ლიკვიდაცია”, _ წერია დოკუმენტში, რომელიც მერიამ დასამტკიცებლად საკრებულოს წარუდგინა.
კერძოდ, დოკუმენტში, რომელიც ლანჩხუთის მუნიციპალიტეტის 2017-2018 წლების ბიუჯეტებით გათვალისწინებული პროგრამების შესაბამისობის ანგარიშს წარმოადგენს და 2019 წლის ბოლოს გასაჯაროვდა, წერია, რომ ლანჩხუთის მუნიციპალიტეტის მიერ დაფუძნებულ ა(ა)იპ-სა და მერიის სამსახურს შორის ფუნქციები დუბლირებულია. ასევე, ა(ა)იპ-ებში დასაქმებულ თანამშრომელთა საშტატო რიცხოვნება საჭიროებებთან შედარებით მაღალია. აუდიტი წერს, რომ მუნიციპალიტეტმა ვერ წარმოადგინა საკმარისი და შესაფერისი მტკიცებულებები იმისა, თუ რა ობიექტური საჭიროებით იყო განპირობებული ზოგიერთი ა(ა)იპ-ის და შტატის არსებობა.
“ა(ა)იპ-ებში დასაქმებულ პირთა საშტატო რიცხოვნება მუნიციპალიტეტის საჭიროებასთან შედარებით მაღალია, რასაც ადასტურებს აუდიტის დასკვნის შედეგად გამოვლენილი სხვადასხვა ფაქტი.
სამსახურის დებულებისა და ა(ა)იპ-ის წესდების შესწავლით დადგინდა, რომ ფუნქციები დუბლირებულია, მერიამ კი ვერ წარმოადგინა საკმარისი და შესაფერისი მტკიცებულება იმისა, თუ რამდენად აუცილებელია აღნიშნული სამსახურის ფუნქციონირება, როდესაც იმავე სამუშაოს შესრულება შესაძლებელია მერიაში შექმნილი სამსახურის მეშვეობით”, _ ვკითხულობთ სახელმწიფო აუდიტის დასკვნაში, რომელიც 2017-2018 წლებს მოიცავს და ერთ-ერთ მუხლად სწორედ ეკონომიკური განვითარებისა და ინოვაციების ცენტრზეა საუბარი.
მაშინ სახელმწიფო აუდიტმა რეკომენდაცია გასცა, რომ მუნიციპალიტეტის აღმასრულებელ ორგანოს შეესწავლა მის მიერ დაფუძნებული იურიდიული პირების საქმიანობა და არსებული საკადრო პოლიტიკა და განესაზღვრა, რამდენად პასუხობს მათი საქმიანობა მუნიციპალიტეტის მიზნებსა და ამოცანებს. აუდიტი მაშინ, ასევე, მნიშვნელოვნად მიიჩნევდა ა(ა)იპ-ებში დასაქმებულთა უფლება-მოვალეობების და მათზე დახარჯული სახსრების ანალიზის გახორციელებას.
“საჭიროების შემთხვევაში, მუნიციპალიტეტმა უზრუნველყოს თანამშრომელთა ფუნქციური დატვირთვა ან საშტატო ერთეულების ოპტიმიზაცია. აღნიშნული ხელს შეუწყობს საბიუჯეტო რესურსების ეკონომიურად და რაციონალურად ხარჯვას”, _ წერია სახელმწიფო აუდიტის წლების წინ დაწერილ დასკვნაში, რომლის საფუძველზეც ლანჩხუთის მერიამ გადაწყვიტა სწორედ ახლა მოახდინოს ზემოთ ნახსენები სამსახურის ლიკვიდაცია და შესაბამისად, დასკვნაში აღნიშნული შენიშვნები თუ რეკომენდაციები გაითვალისწინოს.
არადა, ლანჩხუთის მერიამ მუნიციპალიტეტში მოქმედ ყველა ა(ა)იპ-ში ჯერ კიდევ გასული წელს დაანონსა რეორგანიზაცია. ავად თუ კარგად თითქმის ყველგან ეს პროცესი დასრულდა, მათ შორის, ზოგან ფასადურად, ზოგან კი გარკვეული ცვლილებების ფონზე, თუმცა, ეკონომიკური განვითარებისა და ინოვაციების ცენტრში შესაძლო რეორგანიზაციას გარკვეული შიდა პროცესები მოჰყვა. ჩვენი ინფორმაციით, რეორგანიზაციის თაობაზე თანამშრომელთა შორის გარკვეული შიდა კონფლიქტი წარმოიშვა, რომლის დაშოშმინება, სავარაუდოდ, მერიამ ვერ შეძლო და აქედან გამომდინარე, გამოსავალი სამსახურის ლიკვიდაცია გახდა.
როგორც ოპოზიციას მიაჩნია, ხშირ შემთხვევაში, აქაც ყოველი არჩევნების შემდეგ შტატების მატება შეიმჩნეოდა. მათი არგუმენტით, სწორედ ამ მავნე პროცესმა და უფუნქციო ადამიანების სიმრავლემ რეორგანიზაცია ჩიხში შეიყვანა და თანამდებობების გადანაწილება უმტკივნეულოდ ვერ მოხერხდა. სამსახური ორ ბანაკად დაიყო და საკმაოდ მწვავე კონფლიქტიც მწიფდებოდა.
“რამდენად იქნება სამსახურის ლიკვიდაცია გამოსავალი, ამას დრო აჩვენებს. ფაქტია, რომ იქ მომუშავე ათეულობით ადამიანი ბედის ანაბარა რჩება. არც ის არის მყარი არგუმენტი, რომ 2019 წელს დადებული დასკვნის საფუძველზე ხარვეზების აღმოფხვრა, ვითომ ახლა მოუნდათ. ისე არ მოხდეს, ამ სამსახურის თანამშრომელთა ნაწილი შერჩევითი სამართლის მსხვერპლი აღმოჩნდეს”, _ ამბობენ ოპოზიციაში.
ავტორი
