ელექტროხაზების განლაგება და როგორც მაღალი, ისე დაბალი ძაბვის სადენების მუდმივი კონტროლის ქვეშ ყოფნა, ელემენტარული უსაფრთხოების წესების დაცვაა. მაღალი ხეების ტოტებს შორის გამავალი სადენების ირგვლივ არე გათავისუფლებული უნდა იყოს და ხელშემშლელი ფაქტორები არ უნდა არსებობდეს. მით უფრო ისეთი, რასაც დაზიანება ან უფრო მეტი, სიცოცხლისთვის საშიშროების წარმოქმნა შეუძლია.
ოზურგეთის მუნიციპალიტეტის სოფლებში, განსაკუთრებით შემოდგომის ბოლოდან, ზამთრის პერიოდში, სადაც უნდა გაიარო, დაინახავ ელექტროსადენებზე გადადებულ ხეების ტოტებს. ზოგან ეს სადენები ისეა გახლართული ხეების ხშირტოტებიან სივრცეში, გიკვირს კიდევაც, რომ არ წყდება. საკვირველია ისიც, ხეების კენწეროებსა და ვარჯს ზემოთ ნაწილს შორის, როცა ასე გადახლართულ ხაზებს ხედავენ, რატომ არავის მოსდის აზრად, დასხეპონ ტოტები, თუნდაც, იმ ეზოების მფლობელებს, ვინც იქ ცხოვრობს”.
თითქმის ყველა სოფელში, სადაც კი გადაადგილება გვიხდება, უამრავი მაგალითია იმისა, თუ როგორ არის სადენები გადახლართული დიდ ტოტებში. ზოგან პირდაპირ ხაზებზე აწყვია თხილის თუ თხმელას ტოტები. ადგილობრივები კი ამბობენ, როცა ამინდის პროგნოზს ვუსმენთ და თოვლის მოსვლაზე საუბრობენ, ვშიშობთ, ამ ხეებზე დადებულმა თოვლმა, სადენები არ დაგლიჯოსო.
სოფლებში: მელექედურში, ასკანაში, ჭანიეთში, ქაქუთში, მთისპირსა თუ ფამფალეთში ბევრ მსგავს სურათს ნახავთ.
_ კი ამბობენ და ვხედავთ კიდეც, რომ სადენებს კაბელი აქვს შემოკრული და ეს ძალიან კარგია უსაფრთხოებისთვის. თუმცა, ამდენი ტოტები რომ არის გახლართული სადენებს შორის, ეს ნორმალურია? ვთქვათ და დიდი თოვლი მოვიდა. მერე რა ვქნათ? კი ამბობენ, დავურეკავთ და ამოვლენ “ენერგო-პროს” სამსახურის ხალხი, მაგრამ კარგ ამინდში რომ მოხდეს გადაბელვა, არ შეიძლება? _ გვეუბნება ასკანელი რეზო ცქვიტინიძე და აცხადებს, რომ ადამიანი თუ შესაბამისი სამსახურები, როგორც სხვა საქმეში იწყებენ ზამთრისთვის სამზადისს, ისე უნდა ემზადებოდნენ დენის ხაზების მოწესრიგების მხრივაც.
“ენერგო-პრო ჯორჯიას” ოზურგეთის ფილიალის მენეჯერი, გია ნაკაიძე ამბობს, რომ კონკრეტულ პასუხს ენერგოკომპანიის პიარის წარმომადგენელი გაგვცემს. ისე კი, ხსენებულ სამსახურს ჰყავს ბრიგადა, რომელიც პერიოდულად ამოწმებს მაღალი ძაბვის ხაზებს, რამდენად არსებობს საფრთხე. ახდენს ხეების გადაბელვას თუ გადამორვას, საჭიროების შემთხვევაში.
“ენერგო-პრო ჯორჯიას” თანამშრომლები, ზოგადად, ამბობენ, რომ დაბალი ძაბვის სადენების გასწვრივ თუ არსებობს ასეთი საფრთხე, ამ მხრივაც ადევნებენ თვალს. თუმცა, თუკი რომელიმე სოფლის თუ ქალაქის აბონენტი დარეკავს და თავის საკარმიდამო სივრცეში არსებულ საფრთხეზე აცნობებს, მზად არიან დასახმარებლად:
_ თუ ხეების ტოტები შემხებლობაშია არსებულ სადენებთან, მზად ვართ, გავგზავნოთ ჯგუფი, რომელიც მთლიანად გაასუფთავებს და მოაწესრიგებს მითითებულ სივრცეს, _ ამბობენ ისინი.
_ ჩვენს სოფელშიც, ქაქუთში ასვლამდე და ზემოთაც, ხეები ყველგან დასასხეპია, სადაც კი დაბალი ძაბვის სადენები გადის. თუკი დავურეკავთ და მოვლენ, მაგას რა ჯობს. ისე კი, ოჯახებშიც, სადაც ახალგაზრდები ცხოვრობენ და ხეზე ასვლა შეუძლიათ, არ უნდა იყოს ძნელი გადაბელვა. ზამთრის პერიოდში უფრო ადვილი დასანახია, რა მდგომარეობაშია სადენები, _ ამბობს სოფელ ჭანიეთის მცხოვრები ჯუმბერ სურგულაძე.
სოფელ მერიის მკვიდრი, მზია ღლონტი წარმოუდგენლადაც კი მიიჩნევს, ერთ დღეში ან თუნდაც, ერთ კვირაში მოგვარდეს და მოხერხდეს სადენებში გაბლანდული ხეების ტოტების დასხეპვა და გადაბელვა:
_ ჯერ ერთი, სოფელია და ხეებს რა გამოლევს. სადენები უმეტესად საკუთრებაში არსებულ უამრავ ეზოზე გადადის. იქ კი მრავალწლოვანი ხეხილოვნები თუ უბრალოდ, არანაყოფიერი ხე-მცენარეები ხარობს და ბუნებრივია, სადენებს ეხება. მით უფრო, მცენარე ცოცხალი ორგანიზმია, იზრდება და ერთხელ გადაბელვა არ ჰყოფნის. თქვენ თავად ხომ ხედავთ, როგორი მდგომარეობაა? მოსალოდნელ თოვლზე ბევრს საუბრობენ, პროგნოზირებენ. შეიძლება უდაბურ ადგილზე გადაედოს ხაზები ერთმანეთს და თავად ენერგოკომპანიის თანამშრომლები უნდა ამოწმებდნენ. კი დადიან, მაგრამ საკმარისი არაა, _ ამბობს ის.
შორენა სიმონიშვილი სოფელ შემოქმედში ცხოვრობს. ის მარტოხელა პენსიონერია. მის შესახებ ჩვენ არაერთხელ ვწერდით, რომ კომპანიის თანამშრომლებმა, მრავალწლოვანი ხეხილოვნები გაუჩეხეს.
_ დენი სადაც გადიოდა, არც უკითხავთ, ისე გამიჩეხეს. ჩვენ ვიცითო და მორჩა! სულ არ ვიყავი შინ. დამაქციეს _ იმდენ ბალს ვყიდდი, მთელი ზაფხული სარჩოს საყიდლად მყოფნიდა აღებული ფული. რამდენი ვიბრძოლე, მაგრამ არავის მოუცია არც კომპენსაცია და არაფერი. ახლა სხვა ხეები მაქვს დასასხეპი. სადენები იქედან შორსაა, თუმცა, მე ხელს მიშლის და თუ ვინმე დამეხმარება, მეტი მადლი არ გინდათ. მითხრეს, რომ ქალაქის სერვისცენტრს მიმართეთ და დაგეხმარებიანო. მე არ ვიცი, სად მდებარეობს ეს სამსახური , _ გვეუბნება ქალბატონი შორენა.
_ როცა თოვლია მოსალოდნელი და ამის შესახებ ყოველდღიურად ვრცელდება ინფორმაცია, აუცილებელია ამ ხეების დასხეპვა. თოვლის საფრთხეც რომ არ იყოს, ზამთრის პერიოდია. ღიად ჩანს, ხელი არ შეგეშლება, ისე ჩამოსხეპავ თითოეულ ტოტს. როცა ხე გაიფოთლება და გაზაფხულიც კარსაა მომდგარი, მერე რას მოუხერხებ? ამის მიხვედრას რა უნდა? ამასთანავე, ის ფაქტი, რომ ელექტროგადამცემი ხაზები შეფუთულია დენგაუმტარი მასალით, არაა სრული უსაფრთხოების გარანტი, _ გვეუბნება ოზურგეთელი გერმანე მამინაშვილი.
“ენერგო-პრო” ჯორჯიას დასავლეთ საქართველოს პიარის წარმომადგენელი, ბექა რომანაძე “გურია ნიუსთან” ასეთ კომენტარს აკეთებს:
_ “ენერგო-პრო ჯორჯია” სისტემატურად ახორციელებს ელექტროგადამცემი ხაზების გაბარიტების მოწესრიგებას. მათ შორის, დაცვის ზონაში არსებული ხე-მცენარეების გადაბელვას. რაც შეეხება, დაბალი ძაბვის დახურულ სადენებს, კომპანია ხელმძღვანელობს ტექნიკური სამსახურის შეფასებით. სპეციალისტების მითითებით და აუცილებლობის შემთხვევაში ხდება ხე-მცენარეებთან დაკავშირებული სხვადასხვა ტიპის სამუშაოს ჩატარება.
ავტორი
