ოზურგეთის მუნიციპალიტეტის სოფლებში უდიდეს პრობლემად კვლავ უგზოობა რჩება. არის სოფლები, სადაც შიდა გზები ისეა დაზიანებული და ამორტიზირებული, რომ არათუ ავტომობილებს, ფეხით მოსიარულეებსაც ძალიან უჭირთ გადაადგილება.
ოზურგეთის მუნიციპალიტეტის სოფელ მაკვანეთში ე. წ. “ბაღის უბანში” 46 ოჯახი ცხოვრობს. მძიმე სოციალურ ფონის მიუხედავად, მათ გასაჭირს უგზოობის პრობლემაც ემატება _ დაზიანებულ გზებზე ღვარცოფისა და ნგრევისგან წარმოქმნილი ორმოები ყველა ფეხის ნაბიჯზეა. ადგილობრივების თქმით, ყოველ გაწვიმებაზე ფეხით მოსიარულეებს ქუჩაში გასასვლელად მაღალყელიანი ბოტები სჭირდებათ.
მოსახლეობა ხელისუფლებას უყურადღებობაში ადანაშაულებს _ ლევან სიხარულიძე, ციალა სიხარულიძე და ვანო გოლიაძე “გურია ნიუსთან” სოფელში არსებულ პრობლემებზე საუბრობენ:
“კომუნისტების დროს რომ მოხრეშეს, მერე ამ გზაზე მთავრობიდან არავინ მოსულა და ამბავი არ უკითხავს.
ყველა არჩევნებზე გვპირდებიან, გზას გავაკეთებთო. დიდი ხანი არაა, რაც გაზი შემოვიდა, ძირითადი გაკეთებულია _ ამის მერე სულ მოისპო ყველაფერი. მოვხრეშავთო, მაგრამ არაფერი… წვიმაში მაღალყელიანი ბოტების გარეშე ვერ გაივლი.
მაკვანეთში ამ უბნის გარდა ყველგან ყველაფერი გააკეთეს, ჩვენ რატომ გვჩაგრავენ, არ ვიცით.
ყველაზე ახლოს ქალაქთან ეს კუთხეა. ყველა გაწვიმებაზე არხებს ჩვენით ვჭრით, მაგრამ რა აზრი აქვს?!
ძალიან განაწყენებული ვართ ხელისუფლებაზე, გინდ ადგილობრივი იყოს და გინდ _ ცენტრალური. ხალხის ბედი არავის აინტერსებს. მათ ხომ აქვთ მაღალი ხელფასები, მანქანები, გვიყურებენ ზემოდან ამ დამშეულ და გაუბედურებულ ხალხს. ასჯერ დაგვპირდნენ სოფლის კრებებზე ამ პრობლემის მოგვარებას.
ამდენი წელი ვნატრობდით, ამ კუთხიდან ვინმე მაინც მოხვედრილიყო ხელისუფლებაში, იქნებ, მის კუთხეს ეპატრონოსო. წინა მოწვევის საკრებულოში გვყავდა დეპუტატი აქედან, მაგრამ რა გააკეთა? არაფერი! მას ჰყავს “ნივაც” და ტრაქტორიც და კი დადის უპრობლემოდ”, _ ამბობენ ადგილობრივები.
აღნიშნული უბნის მცხოვრებლები კარიერებზეც საუბრობენ. მათი თქმით, მდინარეში წყალი დამშრალია.
_ ძალიან ცუდ დღეშია მოსახლეობა. ჭები შრება, მდინარეც აღარაა. თევზაობა გვიყვარდა, თევზიც აღარ ჩერდება. ამას წინათ ჩასულები ვიყავით, მოვინახულეთ მდინარის პირი. ტრაქტორისტებმა გვითხრეს, 4 მეტრ სიმაღლეზე უნდა გადავთხაროთ ეს მიწა და ამოვიღოთ ხრეშიო. ასე ანადგურებენ სოფელს და უსპობენ ხალხს ცხოვრებას. ვიცით, როგორ ტრიალებს დიდი ფული ამ კარიერებში, ჩვენ კი ქვას ვერ ვიღებთ ამ ჭალაში, მაშინვე დაგვიჭერენ. მოკლედ, სულ გამოუთხარეს სოფელს ძირი, _ ამბობდნენ “გურია ნიუსთან” შეკრებილი ადამიანები, რომლებსაც არც ფაროსანა დავიწყებიათ:
_ ფაროსანამ შეგვიჭამა ყველაფერი. ასიათასობით ლარი ყოფილა მასთან საბრძოლველად გამოყოფილი, მაგრამ რა გააკეთეს?
“გურია ნიუსის” საშუალებით გვინდა შევუთვალოთ ხელისუფლებას, რომ ყველა ოჯახს ან ბოტები დაურიგონ ან გზა გაგვიკეთონ.
მოუგვარდებათ თუ არა ოზურგეთის მუნიციპალიტეტის სოფელ მაკვანეთის ე. წ. “ბაღის უბნის” მცხოვრებლებს უგზოობის პრობლემა და როდის, ამასთან დაკავშირებით ოზურგეთის მერიაში გვპასუხობენ:
“ოზურგეთის მუნიციპალიტეტის ადმინისტრაციულ ერთეულებში რთული საგზაო მონაკვეთების რეაბილიტაციის მიზნით, მერიამ გამოაცხადა ტენდერი, რომლის დასრულების შემდეგ, სოფლებში მერის წარმომადგენლებთან კონსულტაციების საფუძველზე დაიწყება ყველა კრიტიკული საგზაო მონაკვეთის მოხრეშვა-დაგრეიდერება”.
