ზურაბ წერეთლის თანამედროვე ხელოვნების მუზეუმში კინორეჟისორის, თვითნასწავლი მხატვარის, ირაკლი მახარაძის პერსონალური გამოფენა გაიხსნა.
ღვინის საცობებისაგან დამზადებული გურული ფირალები და მოჯირითეები, პაპიემაშე (ქაღალდის ფიგურები) და საღებავის ფუნჯებზე აწყობილი პორტრეტები, _ ეს არის ის, რისი დათვალიერებაც და სურვილის შემთხვევაში შეძენაც, გამოფენაზე მისულ ადამიანებს შეეძლებათ.
გამოფენაზე ასევე წარმოდგენილია ჩანახატები, რომელიც მახარაძემ ნიუ-იორკში, შვილებთან სტუმრობის დროს შექმნა. გარდა ამისა, იგრძნობა პროტესტიც, რომელიც მას იმ აზრის გამო გაუჩნდა, რაც პირველი რესპუბლიკის საზოგადო მოღვაწეების შესახებ ისმის.
“გურია ნიუსი” გამოფენაზე იმყოფებოდა და გთავაზობთ ინტერვიუს, ირაკლი მახარაძესთან.
_ რამ გიბიძგათ ღვინის ბოთლების საცობებისგან შეგექმნათ ფიგურები? რა იყო თქვენი პირველი ნამუშევარი, რომელიც საცობებისგან დაამზადეთ?
_ ყოველთვის ვძერწავდი, მაგრამ რამდენიმე წლის წინ ვნახე ინტერნეტში ღვინის საცობებისგან გაკეთებული ბრტყელი ფიგურა. ვიფიქრე, რატომ არ შეიძლება, რომ როგორც ვძერწავ, ისე გავაკეთო საცობებისგან მრგვალი ფიგურა? დავგუგლე და მრგვალი ფორმის ფიგურა ვერ ვნახე. შეიძლება ცუდად ვეძებდი, მაგრამ ამდენი წელია ვეძებ და ვერ ვნახე. რაღაც მინდოდა გამეკეთებინა. პირველი, რაც გავაკეთე, ეს იყო ბუფალო ბილის პორტრეტი. ბუფალო ბილი იყო კაცი, რომელმაც შექმნა შოუ “ველური დასავლეთი”, სადაც გურულები გამოდიოდნენ. მე ხომ ყველაფერი გურიასთან მაქვს გადანასკვული. შემდეგ გამიტაცა საქმიანობამ. შემდეგ გადავერთე ქაღალდისგან ფიგურების შექმნაზე. ესეც სახალისო სამუშაოა. შრომატევადია, მაგრამ რომელი სამუშაო არაა შრომატევადი? საბოლოოდ, რაც შევქმენი, დღეს გამოვფინე, თუმცა, მხოლოდ პაპიამაშე და ღვინის საცობებისგან შექმნილი ნამუშევრები არაა წარმოდგენილი, ასევეა ბრინჯაო და თაბაშირი, ჩანახატები, რომელიც ნიუ-იორკში, შვილებთან სტუმრობის პერიოდში შევქმენი.
გარდა ამისა, “მოცეკვავე”, რომელიც ხისგანაა გაკეთებული. ესეც გურული პროდუქტია. შეკვეთილში ვიყავი და იქ ვნახე ზღვისგან გამორიყული ხის ტოტები. იქიდან ავაწყვე მოცეკვავე. ასევე წარმოდგენილია პირველი რესპუბლიკის საზოგადო მოღვაწეები. ეს მიზანმიმართულად გავაკეთე. მაგალითად, ბენია ჩხიკვიშვილის, ნოე ჟორდანიას, გერასიმე მახარაძის და ა.შ. პორტრეტები. რატომ? _ იმიტომ რომ ჩვენთან მიდის აღვირახსნილი კამპანია პირველი რესპუბლიკის და მისი მოღვაწეების წინააღმდეგ. სამშობლო გაყიდეს, წაიღეს ოქრო-ვერცხლი და იქ გაყიდეს, დაამღერეს რესტორნებშიო… ეს ყველაფერი არის სისულელე და გაუნათლებლობის ბრალი. თუ უნდა ვინმემ შეურაცხყოფად მიიღოს. ეს ხალხი კი სოციალ-დემოკრატები იყვნენ, მაგრამ იყვნენ ყველაზე უფრო განათლებულები. იმ პერიოდში, როდესაც ევროპაში ჩნდებოდა ფაშისტური სახელმწიფოები, ჩვენთან ააშენეს დემოკრატიული ქვეყანა. ის კონსტიტუცია, რომელიც ჩვენმა გურულებმა შექმნეს, ნატრულობდნენ ინგლისელები, გერმანელები და ფრანგები. ნეტავი ჩვენ გვქონდეს ასეთი კონსტიტუციაო.
_ საცობებს, სადმე ყიდულობთ თუ უკვე ცარიელი ბოთლებისაა და როგორ ამუშავებთ მათ?
_ ერთმა მკითხა, ამდენს სვამო? ამდენი რომ დავლიო, ახლა გამოფენაზე კი არ ვიქნებოდი. მიგროვებენ ახლობლები, მეგობრები ან მაღაზიებში მივდივარ. თუ აქვთ მაძლევენ. საცობების სამუშაო მასალად მომზადებას თავის წესი აქვს. ღვინის საცობებს უნდა მოხარშვა, რომ კარგად დაიჭრას, არ დაიფშვნას და ა.შ. მერე უკვე წარმოსახვის უნარზეა დამოკიდებული, რა ფიგურას შექმნი.
_ ბატონო ირაკლი, რას ურჩევდით ახალგაზრდა თაობას? იმ ადამიანებს, ვისაც ხელოვნება იზიდავს, მაგრამ არ აქვთ საშუალება გამოფენები ჩაატარონ და თავიანთი ნიჭი ფართო საზოგადოებას წარუდგინონ?
_ ეს არის ჩემი პირველი გამოფენა. მთავარია, ყურები არ ჩამოყარონ, ხელები არ დაუშვან. როდისმე თავის გზად იპოვნიან. შეუძლიათ, დააგზავნონ რეზიუმე და ვინმე აუცილებლად გამოეხმაურება და თუ ნიჭიერია, მართლა კარგი ნამუშევრები აქვთ, შანსი არაა, რომ ვინმე არ გამოეხმაუროს. მთავარია, არ დანებდნენ, განავითარონ საკუთარი თავი.
_ იგეგმება გურიაში გამოფენის ჩატარება?
_ არ ვიცი. თუ იქნება საშუალება, აუცილებლად გავაკეთებ.
ჩვენ ვცადეთ გაგვერკვია, თუ ვის უზიარებდა მახარაძე თავის ნამუშევრებს იქამდე, ვიდრე ფართო საზოგადოებას წარუდგენდა. როგორც თავად გვითხრა, შვილებს აჩვენებს. გარდა ამისა, ერთ-ერთი, ვისაც ამ ნამუშევრების ხილვა პირველს ხვდა წილად, მუსიკის ჟურნალისტი, კახა თოლორდავაა.
ბატონი კახა დარბაზში მყოფ სტუმრებს შორის იმყოფებოდა და მასაც ვთხოვეთ, დაეფიქსირებინა თავის აზრი.
_ როგორ აფასებთ ბატონი ირაკლის შემოქმედებას?
_ ის, რასაც ეს ადამიანი აკეთებს, დაწყებული იმიდან, რაც გურულებთან დაკავშირებით გააკეთა და ამ დახურულ გვერდთან დაკავშირებით ქართული ისტორიის, ეს ცალკე სათქმელია, მაგრამ ის, რომ ამხელა გამოფენას აკეთებს, ასეთი არაორდინალური მასალით, ესეც ძალიან საინტერესოა და მაინც კავშირშია თავის ინტერესებთან. აქ არის არა მხოლოდ მისი ინეტრესების სფერო, არამედ გარკვეული თვალსაზრისით საქართველოს ისტორია, ძალიან მნიშვნელოვანია,_ამბობს თოლორდავა
სტუმრებს შორის მყოფმა მერაბ ჭიკაძემ კი გვითხრა, რომ შექმნილმა ნამუშევრებმა მასზე დიდი შთაბეჭდილება მოახდინა.
_ ძალიან ორიგინალურია. რასაც ვხედავ, ყოველ შემთხვევაში, ცდილობს, რომ ყველა შესაძლო მასალით ისეთი სკულპტურა შექმნას, რაც ჩემთვის საერთოდ გაურკვეველია. წეღან ვნახე გაზეთებისგან შექმნილი ნამუშევარი. თუ შეიძლებოდა ასე გაკეთება, არ წარმომედგინა,_ ამბობს მერაბ ჭიკაძე.
ცნობისთვის, ირაკლი მახარაძის პერსონალური გამოფენა ზურაბ წერეთლის თანამედროვე ხელოვნების მუზეუმში 27 თებერვლიდან 6 მარტამდე გაგრძელდება.
