“როგორც ბათუმში, შესაძლოა, მალე ჩვენც ისე მოვყვეთ ნანგრევებში. ამ ხუთსართულიან კორპუსში, ყოველდღე ახალი ბზარებია და დანგრევის საფრთხე რეალურია. კატასტროფაა”, _ ამბობენ “გურია ნიუსთან” ოზურგეთის მუნიციპალიტეტის სოფელ შემოქმედში, “ფაბრიკის ბინებად” წოდებული ხუთსართულიანი კორპუსის მცხოვრებლები.
აღნიშნული კორპუსი კომუნისტურ ეპოქაში, 1977 წელს აშენებულა. აქვე იყო ჩაის ფაბრიკა, რომელშიც დასაქმებულები იყვნენ, როგორც ადგილობრივები, ისე სხვა რაიონებიდან ჩამოსული ადამიანები. კორპუსი სწორედ მათთვის აშენდა.
35 მცხოვრებიდან, დღეს აქ, ფაქტობრივად, 20 ოჯახი ცხოვრობს, დანარჩენები კი, როგორც სამეზობლოს წარმომადგენლებმა თქვეს, სხვადასხვა რაიონსა თუ ქვეყანაში სამუშაოდ არიან წასული.
აქ მცხოვრებთაგან დასაქმებული არავინაა, ხუთ ოჯახს სოციალური დახმარება აქვს, ცხოვრობენ პენსიონერებიც.
_ პირდაპირ რომ ვთქვათ, ბომბზე ვზივართ. ყოველდღე შეიძლება, კორპუსის ნანგრევებში მოვყვეთ. მე, პირადად, კორპუსის კიდის ბინაში, ბოლო სადარბაზოში ვცხოვრობ და საყრდენი კედელი სერიოზულად გაბზარულია. საძირკველზე საუბარი ზედმეტია! თავს ვიტყუებ თუ ვიიმედებ, უბრალოდ, ყოველ წუთს დანგრევის შიშით ვართ შეპყრობილი. კორპუსის კიდის სადარბაზო, სადაც ბზარები უფრო მეტია და პირდაპირ კორპუსსაც დაქანება ეტყობა, შესაძლოა, უფრო ადრე ჩამოიქცეს და ნანგრევში რომ არ მოვყვე, შუა სადარბაზოს ცარიელ ბინაში ვწვები, სადაც ახლა პატრონი არ იმყოფება. ვითომ აქედან გავასწრებ 70 წლის კაცი?! _ გვეუბნება ცნობილი მევენახე და მეღვინე, ოზურგეთის მუნიციპალიტეტის საპატიო მოქალაქე, ანდრო ვაშალომიძე, რომელმაც გვითხრა, რომ ოზურგეთის მერიის ინიციატივით, გასული წლის სექტემბერში ჩატარდა ექსპერტიზა, რომლის დასკვნაში წერია, რომ სახლის ტექნიკური მდგომარეობა არადამაკმაყოფილებელია.
“სახლის ტექნიკური მდგომარეობა არადამაკმაყოფილებელია, ხოლო ცალკეული ზონები საფრთხის შემცველია. მზიდ კონსტრუქციებს განცდილი აქვთ ძლიერი ფიზიკური ცვეთა….შენობის აღდგენა არარენტაბელურია”, _ გვითხრა ვაშალომიძემ და ექსპერტიზის დასკვნის ასლიც გადმოგვცა.
როგორც აქ მცხოვრებლები გვეუბნებიან, ამ დასკვნის დადებიდან ერთი წელი გავიდა. მას შემდეგ კიდევ უფრო ბევრი ბზარი გაჩნდა.
_ აქ პოლიტიკა და არჩევნები არაფერ შუაშია. ბათუმის ამბებმა ქვეყანას თავზარი დასცა, ჩვენ კი დიდი ხანია, თავზარდაცემულები ვართ. ათი განცხადება მარტო შენახული გვაქვს, სხვადასხვა მთავრობის დროს რომ მივმართეთ ხელისუფლებას. ბოლოს, როცა სამხარაულის ექსპერტიზის ბიუროდან ჩამოიყვანეს ექსპერტი, დაიდო საგანგაშო დასკვნა, რომ ამ კორპუსის აღდგენა და რემონტი შეუძლებელია. მერე პანდემიამ შეაფერხა მოვლენები და ახლა ვართ შიშში და სიკვდილის მოლოდინში. არაფერს ვაზვიადებთ, პირიქით, უნდა ვკიოდეთ და ვყვიროდეთ. შესაძლოა, მალე ჩვენც კორპუსის ნანგრევებში მოვყვეთ! _ გვეუბნებიან აქ მცხოვრებლები: მანანა თურმანიძე, თემურ დარჩია, ინეზა ჟორჟოლიანი, თამარ კოპალიანი, ჯონი ბარდაია, ოლეგ ტკაჩოვი და სხვები.
აღნიშნული საცხოვრებელი კორპუსის ნახვისას დავრწმუნდით, რომ ავარიული მდგომარეობა ყოველგვარ მოლოდინს აჭარბებს. კორპუსში 35 ოჯახი ცხოვრობს. მარცხენა მხარეს სახლი აშკარად გადახრილია. კედლებზე, საძირკველთან, კიბეებსა და ოთახებში ყველგან ბზარებია. მზიდ კედლებს ბზარები ყველაზე მეტად ეტყობა. ზოგ საცხოვრებელ ბინაში, როგორც აქ მცხოვრებლებმა გვითხრეს, მცხოვრებთა მიერ, მზიდი კედლებიც გამონგრეულია. ამას ერთვის ამაზრზენი ანტისანიტარია _ როგორც აქ გვითხრეს, სულ ცოტა, 15 წელია, საკანალიზაციო მილები გაჭედილია და მთელი ფეკალიები ჩადის სარდაფში და იქ გროვდება!
_ საძირკველი რის შეწოვასაც ახერხებს, ისრუტავს ამ ფეკალიებს. ეს მხოლოდ დანგრევის დაჩქარებას უწყობს ხელს. საერთოდ კი ტუალეტად არის ქცეული და კი ხოლმე აუტანელი სუნი, _ გვითხრა თამარ კოპალიანმა.
ეზოში მართლაც დგას ფეკალიების სუნი. ამ ამაზრზენ, საშიშ გარემოში ცხოვრებას კი მაინც ბედავენ ადამიანები, რადგან წასასვლელი არსად აქვთ.
“გურია ნიუსთან” კორპუსის მცხოვრებლებმა გულახდილად ისაუბრეს.
_ გასულ წელს, როცა პარლამენტის დეპუტატს ვირჩევდით, ჩვენთან მოვიდა ვასილ ჩიგოგიძე, მასთან იყო მერიც და საკრებულოს თავმჯდომარეც. მოგვისმინეს, დაგვპირდა მაშინდელი დეპუტატობის კანდიდატი და ახლა უკვე დეპუტატი. ჩვენც ვუთხარით, რომ მხარს დავუჭერდით. აქედან სოფელ შემოქმედში წავიდნენ. სოფლის ცენტრში ჩატარდა წინასაარჩევნო შეხვედრა და კანდიდატმა ღიად ისაუბრა პრობლემაზე და დახმარებასაც შეგვპირდა. შემდეგ მერმა, კოტე შარაშენიძემ დაგვიბარა. მანვე მიმართა სამხარაულის ექსპერტიზის ბიუროს და დასკვნაც დაიდო. შემდეგ კიდევ მივმართეთ მერიას, თუმცა, პანდემიის გამო ეს ყველაფერი შეჩერდა. ჩვენ ახლა მხოლოდ სიკვდილს ველოდებით ყოველდღიურად. ეს არის საშინელი განცდა. თუ რაიმეს ვაჭარბებთ, თავად ხომ დაათვალიერეთ კორპუსი? იმედია, თქვენ როცა სადარბაზოებში დადიხართ, ღმერთი დაგვიფარავს, არ ჩამოინგრევა და აქედან ნამდვილ, შეულამაზებელ ამბავს მიაწვდით ხელისუფლებას, _ განაცხადეს მათ “გურია ნიუსთან”.
ოზურგეთის მუნიციპალიტეტის მერიის ინფრასტრუქტურის სამსახურში გვითხრეს, რომ აღნიშნული პრობლემის თაობაზე იციან. საკითხთან დაკავშირებით ჰქონდათ შეხვედრებიც.
_ იყო ასეთი მცდელობაც. მერი შეპირდა კორპუსის მცხოვრებლებს, რომ არსებობდა სახელმწიფო პროექტი, რომლის მოძიების და გახორციელების შემთხვევაში, თითოეული ოჯახი 25 ათასი ლარის ოდენობით, დახმარებას მიიღებდა. მისცა წინადადება მათ, რომ თუ სურვილი ექნებოდათ, მოეწვიათ კრება, დაეწერათ განცხადება და თუ ექნებოდათ სურვილი ასეთი დახმარების მიღებისა, მერია დაიწყებდა პროექტის მოსაძიებლად მუშაობას. თუმცა, ბევრი წინააღმდეგი წავიდა, რადგან თანხა არასაკმარისად ჩათვალეს.
თავად კორპუსის მცხოვრებლებმაც დაადასტურეს, რომ მართლაც შესთავაზა მერმა ასეთი წინადადება და ზოგი წინააღმდეგი წავიდა, ზოგმაც თავი შეიკავა.
_ შემდეგ, პანდემიის გამო, ბევრი რამ მოხდა. ბიუჯეტი შემცირდა. ამ ხელისშემშლელმა ფაქტორებმა იქონია გავლენა, რომ კორპუსის მცხოვრებთა მოთხოვნაზე რეაგირება დროში გაიწელა. ჩვენ ვიცით, რომ აქ მდგომარეობა მართლაც საშიშია და საჭიროებს დროულად მოგვარებას, _ გვითხრა ინფრასტრუქტურის სამსახურის უფროსმა, თემურ გიორგაძემ.
შემოქმედის “ფაბრიკის ბინების”, ხუთსართულიანი ამორტიზირებული კორპუსის მცხოვრებლები სასწრაფოდ ითხოვენ დახმარებას, კერძოდ, ისინი თანახმა არიან, თუ მათ საცხოვრებელ სახლებს უყიდიან ან იქვე, ახლოს, ოთხ ჰა-მდე არსებულ ფართობზე აშენდება ახალი საცხოვრებელი კორპუსი, გადავიდნენ საცხოვრებლად.
როგორც სამხარაულის ბიუროს დასკვნაში წერია, არსებული კორპუსის განახლება არარენტაბელურია.
“გურია ნიუსი” იმედოვნებს, აქ მცხოვრებ 35 ოჯახს სახელმწიფო დაეხმარება და კიდევ დროში არ გაიწელება ეს საკითხი, რადგან მდგომარეობა მართლაც საგანგაშოა და როგორც თავად ამბობენ, “თუ ჩამოინგრა და ჩავიხოცეთ ერთ დღეს, მერე ყველა იყვირებს, ივიშვიშებს და ბინებიც უცებ გამოჩნდება”, თუმცა, მათ ვეღარ უშველიან.
[sexy_author_bio]
