ოზურგეთის მუნიციპალიტეტის სოფელ კონჭკათში, ერთ-ერთ ქუჩას, სოფლის შვილის, მეცნიერის, პროფესორ ზაურ აკაკის ძე ჩანჩიბაძის სახელი მიენიჭა.
მსგავის ნაბიჯი, ბევრი არა, მაგრამ არაერთი გადაიდგა ოზურგეთის მუნიციპალიტეტში. მომავალშიც ასე იქნება, რადგან ღირსეულ შვილებს თაობები არ ივიწყებენ და კონკრეტული გადაწყვეტილებებით, მათი სახელის უკვდავყოფა ხდება.
თუმცა, ზაურ ჩანჩიბაძე, როგორც მის მშობლიურ სოფელში და ზოგადად, გურიაში ამბობენ, განსაკუთრებით შემართული იდგა საყვარელი რეგიონის, ოზურგეთელების დასახმარებლად.
_ უდიდესი პატრიოტი იყო. სოხუმის დაცემა მისთვის სიკვდილის ტოლფასი იყო. გავრცელებული იყო ინფორმაცია და არაერთგზის იმეორებდნენ იმ ავბედით წლებში, რომ არძინბა მას, დასახვრეტთა სიაში, მეორე კაცად მოიაზრებდა. არადა, მასთან, შინ არაერთხელ ნამყოფიც იყო და ასევე დიდი ხნის ნორმალური ურთიერთობა აკავშირებდა. შემდეგ კი ქართველთა და აფხაზთა ბედი როცა ასე სასტიკი ურთიერთგამეტებით გადაიკვეთა, როცა სოხუმი დაეცა, ზაურ ჩანჩიბაძემ, ამ გვარის საუკეთესო შვილთა შორის ერთ-ერთმა ყველაზე საუკეთესომ, გულმოკლულმა დატოვა აფხაზეთი…მისი ნაადრევი სიკვდილიც, ასე ჯანმრთელი კაცისა, უცებ რომ უღალატა გულმა, უდავოდ აფხაზეთის დაკარგვის ელდა იყო, _ დანანებით საუბრობენ კონჭკათელბი.
ისინი იხსენებენ ზაურ ჩანჩიბაძეს, როგორც უდიდეს ადამიანს და უნიჭიერეს კაცს, რომელიც ტექნიკური დარგის სპეციალისტი იყო, თუმცა, ძნელად თუ ვინმე გაუმკლავდებოდა ლიტერატურის, ზოგადად ხელოვნების სფეროს საუკეთესო ცოდნაში. განსაკუთრებით კი მშობლიური ქართული ლიტერატურის ცოდნაში.
_ხომ სასწაულად განსწავლული კაცი იყო, ასჯერ მეტად იყო მამულიშვილი და მშობლიური რაიონის, სოფლის სიყვარულით ანთებული კაცი. თავის თანასოფლელებზე, ზოგადად ოზურგეთელებზე, როგორც უბრალოდ იტყვიან, ჭკუა ეკეტებოდა. როცა სოხუმის ნსტიტუტის დეკანი იყო, თითოეული გურული სტუდენტი, ვინც იქ სწავლობდა, მამობრივი მზრუნველობის ქვეშ ჰყავდა, _ გვეუბნება კონჭკათელი მელიტო მუჯირი.
კონჭკათელთა სურვილი, მშობლიურ სოფელში ყოფილიყო ზაურ ჩანჩიბაძის ქუჩა, ოზურგეთის საკრებულოში, ამავე სოფლის დეპუტატმა, გელა აროშიძემ გააჟღერა.
_როცა ეს ითქვა ოზურგეთის საკრებულოში, უსაზღვროდ გამიხარდა და ასე ვთქვათ, დავასწარი ჩემს კოლეგას, სამოტივციო ნაწილი მე შევადგინე და ორ კვირაში სამთავრობო კომისიისგან სასიხარულო ცნობა მივიღეთ. მოგვცეს ნებართვა, ამ ულამაზეს სოფელში, მისი ღირსეული შვილის ქუჩა ყოფილიყო. დღეს ეს საზეიმო დღეა და ამიერიდნ კონჭკათში იქნება სახელოვანი მეცნიერის, ზაურ ჩანჩიბაძის სახელობის ქუჩა, _ თქვა ოზურგეთის საკრებულოს თავმჯდომარის მოადგილემ, საკრებულოს წევრმა ლავრეტი ბიგვავამ.
შეკრებილი ადგილობრივ მცხოვრებლების, სიხარულითა და ცრემლით სავსე კონჭკათელების წინაშე გამოსვლისას, ტარიელ აროშიძემ მეცნიერის ბიოგრაფია კიდევ ერთხელ გააცნო თანასოფლელებს და თქვა, რომ ბედნიერია, ამ გადაწყვეტილების მიღებით.
_ ამიერიდან სახელოვანი შვილის სახელობის ქუჩაზე როცა მომავალი თაობა, ჩვენი ბავშვები ნახავენ წარწერას, კიდევ უფრო დაინტერესდებიან, იცოდნენ, ვინ იყო ზაურ ჩანჩიბაძე. მას ხომ თითოეული ოჯახის წინაშე აქვს საშვილთაშვილოდ დასახსომებელი საქმე გაკეთებული, – თქვა ტარიელ აროშიძემ.
_ბედნიერი ვარ, რომ დღეს ვარ აქ და ვესწრები ამ მნიშვნელოვანი გადაწყვეტილების გახორციელებას და შემიძლია ვთქვა, რომ თვითმმართველობას რაც შეუძლია სახელოვანი მეცნიერის სახელის უკვდავსაყოფად, ვცდილობთ, გავაკეთოთ. მან ეს დაიმსახურა. _ ოზურგეთის ყოფილმა მერმა, ბიზნესმენმა ბეგი სიორიძემ ემოციურად განაცხადა:
_თავს ძალიან არ შეგაწყენთ. დღეს მართლაც ცრემლს ვერ ვიკავებ, რა ვქნა…1981წელს ჩავაბარე სოხუმის სუბტროპიკული მეურნეობის ინსტიტუტში. ოზურგეთელები, გურულები ბევრი ვიყავით და გვახსოვს, როგორ გვპატრონობდა, როგორ დაგვყვვებოდა ყველას კათედრიდან კათედრაზე… ქუჩაშიც კი ვგრძნობდით ოზურგეთელბი მაშინდელი მახარაძელები ,მის მზრუნველობას, გამუდმებულ ყურადღებას. ზაურ ჩანჩიბაძემ თავის სანაქებო გვარს, თავის ქვეყანას განსაკუთრებული ღვაწლი შემატა, რაც არასდროს დაავიწყდებათ. დიდებული საქმეა, მის სოფელში იწოდებოდეს მეცნიერის სახელობის ქუჩა, _ თქვა მან.
საზეიმო შეხვედრაზე სტუმრად მყოფმა ბიზნესმენმა , მიხეილ მდინარაძემ მოკლედ და მრავალმნიშვნლოვნად თქვა:
_დღეს, თქვენ, ყველამ ერთად გააცოცხლეთ ზაურ ჩანჩიბაძე, სოფელს თავისი შვილი გაუცოცხლეთ. ის განსაკუთრებული და მართლაც რჩეული ადმიანი იყო, რომელსაც თავდავიწყებით უყვარდა სამშობლო და აქედან გამომდინარე, ყველა ადამიანი…
ადგილობრივ მცხოვრებთა სახელით, თბილი მოსაგონარითა და მადლიერების გამოხატვით მიესალმა სტუმრებს, კონჭკათს მკვიდრი, ნინო გრაფშინსკი:
_მიხარია, რომ დღეს დიდი პატივი მივაგეთ სახელოვანი მეცნიერის ხსოვნას. მეგობრებო, საქართველოს ბევრი მეცნიერი და სახელოვანი ადამიანი ჰყავს. თუმცა ასე გამორჩეულად საკუთარ ხალხზე, სოფელზე, რაიონის ახალგაზრდებზე მზრუნველი ადამიანი ნაკლებად გვხვდება. რაც იმ დროს მან გააკეთა თავისი გადაგმული ნაბიჯებით, შვილს თუ გადაჰყვება ასე მშობელი. ამიტომ ორმაგად ამაყი ვართ, რომ ის ჩვენი თანასოფლელია. დასანანია, რომ დღეს სავსებით შესაძლებელი იყო, ცოცხალი მდგარიყო აქ და უკვე დიდი ხნის წასულია ამ ქვეყნიდან… მას, 15 წლის წინ, გულმა უმტყუნა. ვერ გაუძლო აფხაზეთის დაკარგვას…უდიდესი მადლობა ყველას…ეს არის ჩვენი, კონჭკათელების სათქმელი, _ თანასოფლელთა სახელით მადლიერება გამოთქვა ქალბატონმა ნინომ.
განსაკუთრებული ემოციით, სიხარულით შეხვდა ამ გადაწყვეტილებას ზაურ ჩანჩიბაძის მეუღლე და ქალიშვილები.
მათი მოკრძალებული საუბარი და ცრემლიანი თვალები გაცილებით ბევრის მთქმელი იყო, ვიდრე სიტყვა.
_მოკლედ დაწერეთ, ბევრი არ არის საჭირო…რა უნდა ვთქვა…მადლობა…-დიდი მადლობა! _ უმოკლესი კომენტარით შემოიფარგლნენ მეცნიერის ქალიშვილები, თეა ჩანჩიბაძე, რომელიც ტურიზმის დეპარტამენტში, პიარის სამსახურში მუშაობს და ეკა ჩანჩიბაძე, რომელიც წარმატებული მხატვარ-დიზაინერია.
ამ მნიშვნელოვან დღეს ახლდა დიდი უშუალობა, სიყვარულისა და პატივისცემის გამოხატულება ღირსეული შვილის მიმართ, რაც იმით გამოიხატა, რომ კონჭკათელბმა გულღიად გვითხრეს _ ერთ ლამაზ სიტყვას, დარწმუნებული ვართ, თქვენი გაზეთი ისევე თბილად და ლამაზად იტყვის სოფლის ამ უდიდეს შვილზე, როგორც ეს ჩვენ გვეწადაო…
ზაურ ჩანჩიბაძემ 1970 წელს წარჩინებით დაამთავრა სოხუმის უნივერსიტეტის ფიზიკა-მათემატიკის ფაკულტეტი. ხოლო წარმატებით დაცული სადისერტაციო ნაშრომის შემდეგ, დიდხანს მუშაობდა საქართველოს სუბტროპიკული მეურნეობის ინსტიტუტის მანქანათმცოდნეობის კათედრაზე, სადაც გაიარა ყველა საფეხური, ასისტენტიდან პროფესორამდე.
15 წლის მანძილზე, 1978 წლიდან 1993 წლის ჩათვლით, იყო ბიოტექნოლოგიური ფაკულტეტის დეკანი.
უდიდესი ტკივილი იყო მისთვის სოხუმის დაცემა, რის შემდეგაც საქართველოს სოფლის მეურნეობის სამინისტროში მუშაობდა. არის 66 მეცნიერული ნაშრომის, მათ შორის, სამი მონოგრაფიის და 12 გამოგონების ავტორი.
ავტორი
