ხვალ, იტალიის საფეხბურთო პირველობის მორიგ ტურში, ხვიჩა კვარაცხელიას „ნაპოლი“ რაფაელ ლეაუს „მილანს“ უმასპინძლებს. მატჩი თბილისის დროით 22.45 საათზე დაიწყება.
რასაკვირველია ტურის ცენტრალურ შეხვედრას წინ არაერთი პროგნოზი უძღვის. განსაკუთრებული ვნებათაღელვა კი ამ ორი კლუბის წამყვანი მოთამაშეების მომავალი დუელი იწვევს.
სპორტული ჟურნალისტი პაოლო დე პაოლა: „კვარა ცხადია ლეაუს ჯობია. კვარა სერიოზული პროფესიონალია, ლეაუ კი თამაშის დროსაც პაუზებს იღებს და გამაღიზიანებელ განწყობას ავლენს, თითქოს, ბალოტელია. ის არ არის „მილანისთვის“ თავდადებული ფეხბურთელი, არამედ ნარცისი და ეგოისტია. როდესაც სწორად ვერ თამაშობს, სწორია მისი კრიტიკა. ერთი მოქმედება ვერ შეცვლის 80 წუთში სუფთა სიზარმაცეს! კვარა პატარა მეომარია, ის ყოველთვის ეძებს თანაგუნდელებს“.
ჟურნალისტი ფაბიო რავეცანი: „სტაბილურობა ქმნის განსხვავებას. კვარამ შარშან ლეაუზე ბევრად უკეთ ითამაშა, მაგრამ შემდეგ გაუჭირდა, ეს მთელ „ნაპოლის“ ეხება, არა მარტო ქართველს. ლეაუს ტოპ-ფორმაში წლების განმავლობაში ველოდით, მაგრამ ეს ფაქტობრივად უკვე მისი სტატუსია, რომელსაც არ შეუძლია თავის ნაკრებში ძირითად შემადგენლობაში მუდმივად ითამაშოს. ლეაუს აქვს შემაშფოთებელი პაუზის მომენტები. კვარა უფრო მრავალფეროვანი და კონკრეტულია, ვიდრე ლეაუ, რომელიც მხოლოდ ერთ სტილში თამაშობს. ამ ორს შორის ქართველს ავიყვანდი გუნდში, თან არ დაგავიწყდეთ, ლეაუს ხელფასი სეზონში 7 მილიონია.
„მილანი“ კვარას შეზღუდავს? პიოლიმ აჩვენა, რომ პრობლემები ჰქონდა „ინტერთან“ ტურამის და „იუვესთან“ კინის შეზღუდვაში, მბაპეც გუშინ იმას აკეთებდა, რაც სურდა… მეეჭვება პიოლიმ გაკვეთილი ზუსტად კვარაცხელიას წინააღმდეგ ისწავლოს“.
ვეტერანი ფეხბურთელი ჯანფრანკო ძოლა: „ლეაუ და კვარაცხელია თავიანთი „აფეთქებებით“ ბალანსს უდავოდ არღვევენ, მათ თამაშის შეცვლა შეუძლიათ. ისინი ერთმანეთს ძალიან ჰგვანან, იმ განსხვავებით, რომ რაფა კარგია ღია სივრცეებში, ხოლო ქართველს მჭიდრო სივრცეებშიც კარგად თამაში შეუძლია“.
ვეტერანმა იტალიელმა ფეხბურთელმა ემანუელე კალაიომ კი განაცხადა, რომ ხვიჩა კვარაცხელიასთვის მარიო რუი უდიდესი მნიშვნელობისაა.
„მარიო რუი ფუნდამენტურია კვარასთვის, ისევე, როგორც „ნაპოლისთვის“, მე ოლივერას მირჩევნია. მან იცის სწორად თამაში. კვარა კი გასაოცარი ფეხბურთელია, ისევე, როგორც ლეაუ. პორტუგალიელს ძალიან სწრაფად შეტევა შეუძლია, ქართველი კი ბურთით არის ძალიან სწრაფი, ჩვენ გადამწყვეტ ფეხბურთელებზე ვსაუბრობთ. როდესაც ლეაუ და კვარა ფორმაში არ არიან, მათ გუნდებსაც უჭირთ“, – განაცხადა ემანუელე კალაიომ.
ვეტერანმა ფეხბურთელმა ჟოზე ალტაფინიმ ხვიჩა კვარაცხელია ლეო მესის შეადარა:
„კვარაცხელიას ჯერ კიდევ შეუძლია ბევრ კომპონენტში მომატება. ყველა ამბობს, მას იცნობდნენ და იცოდნენ, როგორ შეეჩერებინათ, მაგრამ ეს არ არის სიმართლე, რადგან მას სისხლში დრიბლინგი აქვს, როგორც მესის”, – თქვა ალტაფინიმ.
„მილანის“ გულშემატკივარმა და კომენტატორმა ტიციანო კრუდელიმ „ნაპოლისთან“ მატჩის წინ ისაუბრა:
„იმედი მაქვს, რომ სტეფანო პიოლი კვარაცხელიას მოედანზე გალიას დაუგებს, როგორც წინა სეზონში, წინააღმდეგ შემთხვევაში ჩვენთვის მტკივნეული თამაში იქნება. შარშანდელი მოგონებები კარგია, მაგრამ წარსული, წარსულია. მე ახალი დღით ვცხოვრობ, დაველოდოთ და ვნახოთ, რა მოხდება“.
„ტორინოს“ მთავარმა მწვრთნელმა ივან იურიჩმა „ლეჩესთან“ მატჩამდე პრესკონფერენცია გამართა და სხვა თემებთან ერთად საბა საზონოვის შესახებაც ისაუბრა:
„საზონოვი ძალიან მომწონს, სწავლის დიდი სურვილი აქვს, მაგრამ ჯერ კიდევ ჩამორჩება ჩვენი სათამაშო სტილისა და ფეხით თამაშის თვალსაზრისით. „ლაციოსთან“ ის ძალიან კარგად შემოვიდა, მეც გამიკვირდა მისი გავლენა, „ინტერთან“ კი გაუჭირდა. დიახ, ამჟამად დაცვაში ვოივოდას ვარიანტიც გვაქვს“, – განაცხადა ივან იურიჩმა.
ავტორი
