ლანჩხუთის მუნიციპალიტეტის სოფელ ზემო აკეთის მცხოვრებლები, რომლებმაც ივლისში აქციაც კი გამართეს რაიონულ ცენტრთან დამაკავშირებელი მთავარი გზის მოწესრიგების მოთხოვნით, ამჯერად პრობლემის მოგვარების მიზნით, მუნიციპალიტეტის პირველ პირს, ალექსანდრე სარიშვილს შეხვდნენ და შეეცადნენ უშუალოდ მისგან მიეღოთ განმარტებები, თუ როდის მოწესრიგდება გზა, რომლითაც ოთხი სოფელი სარგებლობს.
მოსახლეობის თქმით, სოფლის მთავარი გზა, რომლითაც აკეთის ადმინისტრაციულ ერთეულში შემავალი ოთხი სოფელი სარგებლობს, გასული საუკუნის 90-იანი წლებიდან მოყოლებული ავარიულ მდგომარეობაშია და რაც დრო გადის, უფრო და უფრო გაუსაძლისი ხდება ამ გზით სარგებლობა, რის გამოც, ხშირ შემთხვევაში, ადგილობრივები შემოვლითი გზით, სოფელ აცანიდან სარგებლობენ.
“დიდი ხანია, ეს გზა რეაბილიტაციას საჭიროებს, მაგრამ აქამდე დაპირებების იქეთ არ წასულა საქმე. ისეთი მდგომარეობაა, რომ მსუბუქი ავტომანქანით გავლა, ფაქტობრივად, შეუძლებელია. გზის უვარგისობის გამო, ტაქსიც უარს ამბობს აქ ამოსვლაზე. მოხრეშავენ, მოვა ნიაღვარი და წაიღებს, მერე ისევ მოიხრეშება და წლებია, ასე გრძელდება. თანხა იხარჯება, თუმცა, რეალურად მოსახლეობა სარგებელს მაინც ვერ იღებს. ლანჩხუთი-აკეთის გზა უმოკლესია, რომლითაც სამი მუნიციპალიტეტი _ ლანჩხუთი, ჩოხატაური და ოზურგეთი უკავშირდება ერთმანეთს. განსაკუთრებით მძიმე მდგომარეობაში, ე. წ. “ინწრუას” მონაკვეთია და თუ არ მოგვარდა ეს პრობლემა, სოფელს ზამთარში გარე სამყაროსგან მოწყვეტა ემუქრება”, _ ამბობენ ადგილობრივები.
როგორც გაირკვა, შეხვედრაზე მყოფმა მერმა მოსახლეობას პრობლემის მოგვარებაში თანადგომა აღუთქვა და შეპირდა, რომ მათი შეხვედრიდან ორ დღეში სოფლის მთავარი გზის მოხრეშვითი სამუშაოები დაიწყებოდა; რაც შეეხება გზის კაპიტალურ მოწესრიგებას, ამასთან დაკავშირებით კი შესაბამის უწყებებთან შუამდგომლობის პირობა დადო.
სოფლის მოსახლეობა ულტიმატუმის სახით აჟღერებს, რომ თუ გზის მშენებლობა არჩევნებამდე არ მოხდება, მაშინ ბოიკოტის რეჟიმზე გადავლენ და საარჩევნო უბნების გახსნას ხელს შეუშლიან. როგორც ამბობენ, ზემო აკეთის მსგავსად იგივე მოხდება ადმინისტრაციული ერთეულის სხვა სოფლებშიც _ გაგურში, ჭანჭათსა და ქვემო აკეთში.
მოსახლეობისვე თქმით, ხელისუფლების მხრიდან აქამდეც არაერთხელ გაიცა პირობა გზის მოწესრიგების თაობაზე:
“ეს უმოკლესი გზაა, რომელიც ლანჩხუთს მეზობელ ჩოხატაურთან და კურორტ ბახმაროსთან აკავშირებს, ამიტომ განსაკუთრებული დატვირთვა ზაფხულობით აქვს. დიდი იმედი და მოლოდინები გვქონდა, რომ გზის რეაბილიტაცია გაზაფხულზე დაიწყებოდა, მაგრამ აქამდე საქმე წინ არ წასულა. ახლაც მივიღეთ პირობა და ვნახოთ. ასეთი გზა ჩვენთან რომაა, არც ერთ სოფელში არ იქნება _ მანქანა ვერ დადის ზედ. დამშრალი მდინარის კალაპოტი უკეთესი სანახავია, ვიდრე ეს გზა”.
საუბარია, დაახლოებით, გზის 15-კილომეტრიან მონაკვეთზე, რომელიც იწყება, ე. წ. “ინწრუას” ხევიდან და მთავრდება სოფელ ზომლეთის გადასახვევთან. მოსახლეობის თქმითვე, განსაკუთრებით რთული მდგომარეობა გზის იმ შვიდკილომეტრიან ნაწილზეა, რომელიც სოფელ შუხუთიდან გაგურის ცენტრამდე მონაკვეთს მოიცავს:
“უკვე აღარაფერს ვამბობთ სოფლის შიდა გზებზე, რომელიც, ასევე, მოუწყობელია და ავდარში ფეხით გადაადგილებაც კი ჭირს”.
როგორც აღმოჩნდა, ამ ჯერზე მერია მოსახლეობისთვის მიცემული პირობის პირველი ნაწილის შესრულებას შეუდგა და აკეთში გზის მოხრეშვითი სამუშაოები დაიწყო, თუმცა, როგორც მერიის ფეისბუქგვერდზე გაკეთებული კომენტარებიდან ირკვევა, მას მოსახლეობის მხრიდან არაერთგვაროვანი რეაქცია მოჰყვა. ერთი ნაწილი მადლიერია და იმედს იტოვებს, რომ მალე გზის მოასფალტებაც მოხდება. მეორე ნაწილის პოზიციით სამუშაოები საკმაოდ უხარისხოდაა შესრულებული:
“აი, ეს არის თქვენი მოხრეშილი. ლანჩხუთის მუნიციპალიტეტის მერია თქვენ ხომ არ გაკლიათ?!” _ წერს ფეისბუქმომხმარებელი თამუნა ღლონტი და იქვე მეტი სარწმუნოებისთვის უხარისხოდ შესრულებული სამუშაოების ამსახველ ფოტოსაც ურთავს.
“თვითონ კი გააკეთეს ფულები. ძლივს ჩამოვედით გუშინ ამ გზაზე. ყველასგან მივიწყებული სოფელი! ახლა არჩევნები მოდის და ორნახევარ მანქანა ხრეშს დაყრიან _ ნახევარს ვიღაცა სახლში წაიღებს. იმ ხრეშსაც ორ დღეში წვიმა ჩარეცხავს, მაგრამ ამ “კეთილი” საქმისთვის ხმებს დაიმსახურებენ. მოსახლეობა კი ისევ დარჩება გზის, წყლის და კიდევ ბევრი რამის გარეშე. და ეს ყველაფერი 21-ე საუკუნეში ხდება”, _ წერენ სოციალური ქსელის სხვა მომხმარებლებიც.
რაც შეეხება გზის მოასფალტებას, მერიის პოზიციით, ამის თაობაზე წერილი მიეწერება შესაბამის სამინისტროს და სოფლის გზის მძიმე მდგომარეობის შესახებ ეცნობება, რასაც უნდა მოჰყვეს თანხის გამოყოფა და შესაბამისი პროცედურები _ პროექტის შედგენა და ტენდერის გამოცხადება.
