ბოლო სამი დღეა, რაც ლარმა გაუფასურება დაიწყო. კურსის რყევები ყოველდღიურად იზრდება და როგორც ექსპერტები ამბობენ, ტენდენცია უფრო მკვეთრი გახდება. დარგის სპეციალისტები ვალუტის არასტაბილურობის მთავარ მიზეზს კვლავ ეროვნული ბანკის პოლიტიკაში ხედავენ.
ეკონომიკურ მეცნიერებათა დოქტორი, „ფენიქს 1970“-ის ანალიტიკოსი ნიკოლოზ შენგელია ლარის გაუფასურების დაწყებას მიმდინარე წლის 5 მარტიდან ელოდებოდა, თუმცა მოვლენები უფრო დაჩქარდა. მისი თქმით, მოცემულობა ორი ძირითადი ფაქტორით აიხსნება:
„კურსის რყევების პირველი მიზეზია ის, რომ რეზერვების შევსების მიზნით ეროვნული ბანკი ყოველ კვირა ტრანშებით შეისყიდის 15 მლნ. ღირებულების დოლარს და ლარებს უშვებს დიდი რაოდენობით. მეორე მიზეზია ის, რომ დიდი ოდენობით თანხები მიემერთება ინფრასტრუქტურული პროექტებისკენ, ანუ ხდება ბიუჯეტიდან ფინანსების გამოსვლა, ანუ ფულადი მასების ზრდა“.
არსებული გარემოება, ნიკოლოზ შენგელიას მოსაზრებით, დიდი ზიანის მომტანი არ არის უშუალოდ ეკონომიკისთვის. სამაგიეროდ, მოსახლეობისთვის საკმაოდ წამგებიანია. მისივე თქმით, ეროვნულ ბანკს შეეძლო დღევანდელი რყევები და მოსალოდნელი უარყოფითი შედეგები თავიდან აერიდებინა თუ შედარებით დაბალი მოცულობის დოლარს შეისყიდდა.
„ყოველ კვირა 15 მლნ.-ის მაგივრად, რომ ვთქვათ, 5-5 მლნ. დოლარი შეესყიდათ, კურსის რყევებს თავიდან ავიცილებდით. მეტიც, სებ-ს თავისუფლად შეეძლო როდესაც კურსი დასტაბილურდებოდა 2.55-ის ფარგლებში, ამის შემდეგ დაეწყო დოლარების შესყიდვა“,- ამბობს ნიკოლოზ შენგელია.
კითხვაზე, რატომ არ მიმართა ეროვნულმა ბანკმა ალტერნატიულ გზას, ანალიტიკოს ამ შემთხვევაშიც ყურადღებას უწყების პოლიტიკაზე ამახვილებს:
„ეროვნული ბანკი თავისი პოლიტიკით არასდროს მუშაობს ხალხის საკეთილდღეოდ. ამაზე მეტყველებს თუნდაც ბოლო პერიოდში ამოქმედებული რეგულაციებიც. შედეგად მივიღებთ იმას, რომ მარტის თვეში მზარდი ტენდენცია შენარჩუნდება და გაგრძელდება დაახლოებით 2.70-72 ფარგლებში. დღევანდელი ვითარებიდან გამომდინარე, მესამე ტალღა დაიწყება უკვე აგვისტოს ბოლოს, როდესაც ლარი მკვეთრად გაუფასურდება და 1 აშშ. დოლარის ფასი გახდება 2.90-2.95 ლარი. ძველ ნიშნულის (2.60) დაბრუნებას კი უახლოეს მომავალში აღარ ველოდებით“,-განმარტავს ანალიტიკოსი.
რაც შეეხება ეროვნული ვალუტის კურსის რყევებს ბოლო სამი დღის განმავლობაში, 2.65 ნიშნულიდან, ის გაიზარდა შემდეგი მოცულობით:
- 27 თებერვალი: 1 აშშ დოლარის ოფიციალური ღირებულება შეადგენს 2.6940 ლარი;
- 26 თებერვალი: 1 აშშ დოლარის ოფიციალური ღირებულება შეადგენს 2.6770 ლარი;
- 25 თებერვალი: 1 აშშ დოლარის ოფიციალური ღირებულება შეადგენს 2.6751 ლარი.
წყარო: commersant.ge
