„ოპოზიციას უნდა, რომ ხელისუფლებამ პოლიტიკური კრიზისი აღიაროს და ამ კრიზისის საფუძველზე პოლიტიკური ნაბიჯები გადადგას, თუმცა ქვეყანაში პოლიტიკური კრიზისი არ არის შექმნილი“,_ აღნიშნა „გურია ნიუსთან“ ევროკავშირის ტექნოლოგიური ინოვაციების მკვლევართა ჯგუფის წევრმა, კონსტიტუციონალისტმა ლევან ბოძაშვილმა.
ბოძაშვილი მიიჩნევს, რომ ოპოზიციური პარტიების მოთხოვნები არარეალურია, რადგან „ოპოზიციის მოთხოვნების რეალურობა კონსტიტუციიდან გამომდინარეობს. კონსტიტუცია კი გვეუბნება, რომ რიგგარეშე საპარლამენტო არჩევნები შეიძლება დაინიშნოს მხოლოდ კონკრეტულად გაწერილი პროცედურების მიხედვით.“
_ ბატონო ლევან, გაერთიანებულმა ოპოზიციამ „ძალა ერთობაშია“ ხელისუფლებას ულტიმატუმი წაუყენა და მოთხოვების დასაკმაყოფილებლად დრო 16 დეკემბრამდე მისცა. ოპოზიცია რიგგარეშე საპარლამენტო არჩევნების დანიშვნასა და საპრეზიდენტო არჩევნების არალეგიტიმურად ცნობას ითხოვს. სამართლებრივი თვალსაზრისით, მოთხოვნები რამდენად რეალურია? და ასევე, ქვეყანაში შექმნილი მდგომარეობა აღნიშნულთა დაკმაყოფილების აუცილებლობას მოითხოვს?
_ ოპოზიციის მოთხოვნების რეალურობა კონსტიტუციიდან გამომდინარეობს. კონსტიტუცია კი გვეუბნება, რომ რიგგარეშე საპარლამენტო არჩევნები შეიძლება დაინიშნოს კონკრეტულად გაწერილი პროცედურის მიხედვით. თუ პრეზიდენტის ლეგიტიმურობას არ აღიარებენ, ქვეყნის მთავარსარდალი რიგგარეშე საპარლამენტო არჩევნებს როგორ დანიშნავს?! ოპოზიციის მოთხოვნები სამართლებრივად და პოლიტიკურად სრული ნონსენსია. ყველამ უნდა გაიგოს, რომ კონსტიტუცია პოლიტიკური პროცესის სამართლებრივი ჩარჩოა. მათი მოთხოვნა, არა მხოლოდ არარეალურია, არამედ კონსტიტუციურ საფუძველსაც არის მოკლებული.
_ აცხადებთ, რომ ოპოზიციური პარტიების ულტიმატუმი სამართლებრივად გაუმართავი და არარეალურია. როგორ ფიქრობთ, ოპოზიციის მხრიდან რა მიზანი აქვს რეალობაში განუხორცილებელ მოთხოვნათა წამოყენებას?
_ოპოზიციას უნდა, რომ ხელისუფლებამ პოლიტიკური კრიზისი აღიაროს და ამ კრიზისის საფუძველზე პოლიტიკური ნაბიჯები გადაიდგას, თუმცა ქვეყანაში პოლიტიკური კრიზისი არ არის. არჩევნებში დიდი რაოდენობით ხმების მიღება არ ნიშნავს იმას, რომ ოპოზიციამ აღნიშნული კონსტიტუციის ფარგლებს გარეთ სამოქმედოდ გამოიყენოს. მოთხოვნები, რომლებსაც ოპოზიცია აყენებს, მხოლოდ სურვილია. მათი მოთხოვნები გამომდინარეობს არა პოლიტიკური ჩარჩოდან, რომელიც კონსტიტუციამ დაადგინა, არამედ პოლიტიკური ხედვებიდან, რაც სცდება არა მხოლოდ რეალობას, არამედ კონსტიტუციის საფუძველსაც.
_ გაერთიანებულმა ოპოზიციამ ხელისუფლებას მოთხოვნათა შესასრულებლად ვადა 16 დეკემბრამდე მისცა. ულტიმატუმის დაუკმაყოფილებლობის შემთხვევაში კი ოპოზიცია, სავარაუდოდ, საზოგადოებაში საპროტესტო მუხტის გაღვივებას კვალავ შეეცდება. წინ 2020 წლის საპარლამენტო არჩევნებია, რომელსაც როგორც ხელისუფლება, ისე ოპოზიცია კარგად მომზადებული უნდა შეხვდეს. საზოგადოებაში საპროტესტო მუხტის გაღვივება და დაძაბულობის შექმნა ოპოზიციას სამომავლოდ რაში წაადგება?
_ქვეყანას აქციების დრო ნამდვილად არ აქვს. საქართველოს ახლა სტაბილური განვითარება სჭირდება. ქვეყანაში უამრავი საქმეა, წარმოუდგენლად დიდი შრომაა გასაწევი და ამ შრომის ეფექტურობას, ქუჩის აქციების ნაცვლად, სტაბილური განვითარება სჭირდება.
არჩევნების ლეგიტიმურობა ყველა საერთაშორისო დამკვირვებელო ორგანიზაციისა, პოლიტიკურ სუბიექტებისა და დასავლური ქვეყნების მიერ აღიარებულია. ოპოზიციის მიერ შექმნილი ხელოვნური დაძაბულობა კი შეიძლება ემსახურებოდეს ქვეყანაში არასტაბილურობის შექმნას, რაც ხელისუფლების მიმართ ნეგატიურ დამოკიდებულებას კიდევ უფრო გაზრდის. ეს არ არის პროცესი, რომელიც პოლიტიკური ძალის, როგორც ქვეყნისადმი მზრუნველი ოპოზიციის დამოკიდებულებას გამოხატავს. პოლიტიკური პარტიის დანიშნულება ქვეყნის განვითარებაზე ზრუნვა უნდა იყოს. პარტია, რომელიც არასტაბილურობის შესაქმნელად გარკვეულ ნაბიჯებს დგამს, თავად კარგავს პოლიტიკურ ლეგიტიმაციას.
უკვე 200 წელია ამერიკის კონსტიტუცია სტაბილურად მუშაობს. ამერიკის ხელისუფლება და მთავრობა კონსტიტუციური თვალსაზრისით მუდმივად სტაბილურია, რადგან პოლიტიკური პროცესის განმსაზღვრელი კონსტიტუციაა. თუკი პოლიტიკური ძალები კონსტიტუციური ჩარჩოს გარეთ გადასვლას შეეცდებიან, სახელმწიფოს იდეას, სტაბილურობასა და განვითარებას შეეწინააღმდეგებიან.
_გაერთიანებული ოპოზიციის ერთ-ერთმა წევრმა ნიკოლოზ მაჭუტაძემ პარლამენტის წინ მიმდინარე აქციაზე განაცხადა: „სალომე ზურაბიშვილი საქართველოს მოქალაქეების წინაშე საპრეზიდენტო ფიცს ვერ დადებს _ ამ სიტყვის მთელი შინაარსით“. როგორ ფიქრობთ, ოპოზიცია არაკანონიერი გზით შეეცდება ხელი შეუშალოს სალომე ზურაბიშვილის ინაუგურაციას?
_ოპოზიცია რას აპირებს ვერ გეტყვით, მაგრამ როგორც კონსტიტუციონალისტი მოგახსენებთ, რომ პოლიტიკური რიტორიკა კონსტიტუციური პროცესის გვერდის ავლის საფუძველი არ უნდა გახდეს. ეს არის პოლიტიკური რიტორიკა. წესებს ყველა პოლიტიკური სუბიექტი უნდა დაემორჩილოს. არჩევნებში მიღებული შედეგი არ უნდა გახდეს რაიმე სახის პოლიტიკური პროცესების ხელოვნურად შექმნის საფუძველი. არჩევნები დადგენილ გარემოებებში იმისთვის ტარდება, რომ საფუძველი მისცესპოლიტიკურად სტაბილურ პროცესს და არა პირიქით.
