ამერიკელი მსახიობი სთივ მაკქუინი ამბობდა:”მე რომ 30-იანი წლების კინოს მსახიობი ვყოფილიყავი, საუკეთესო როლი, რომელიც მეღირსებოდა, ეს მთავარი გმირის მეგობრის როლი იქნებოდაო”, _ ამ სიტყვებში არის ჭეშმარიტების მარცვალი, რადგან მაშინ, როცა ეკრანზე ბატონობდნენ ისეთი კინოკერპები, როგორც ქლარქ გეიბლი, გერი ქუპერი თუ ქერი გრანთი ძნელი წარმოსადგენია, თანამდროვე მსახიობები მათ მაგივრად. მაგრამ იცვლება დრო, იცვლება გემოვნება, ხოლო აუდიტორიას კი მუდმივად სჭირდება გმირები. გმირები კი დასავლეთის კინოს არასოდეს გამოლევია და იმედია, არც გამოელევა. ერთ-ერთი ასეთთაგანია ცნობილი ბრიტანელი მსახიობი მაიქლ ქეინი. ჩვენი მაყურებელი მას ძალზედ კარგად იცნობს ქართულ სატელევიზიო არხებზე მრავალგზის ნაჩვენები ბრწყინვალე ფილმით “გამოუსწორებელი თაღლითები”.
მისი ნამდვილი სახელი და გვარია მორის მიქელუაითი, იგი დაიბადა 1933 წლის 14 მარტს ღარიბ ოჯახში, ლონდონში. ოჯახს ისე უჭირდა რომ სახლში ელექტროენერგიაც კი არ ჰქონდა. მორისმა სკოლას 16 წლის ასაკში თავი მიანება და მოხალისედ წავიდა ბრიტანულ არმიაში, სამსახურს იგი გერმანიასა და კორეაში გადიოდა.
ჯარიდან დაბრუნების შემდეგ იგი სამუშაოდ მოეწყო თეატრში, სცენის მენეჯერის დამხმარედ, პარალელურად პიესებში თამაშობდა პატარა როლებსაც. იმ პერიოდში მან პირველად გადაიკეთა გვარი და გახდა მაიქლ სქოთი, მაგრამ აღმოჩნდა, რომ ლონდონში არსებობდა მისი სეხნია მსახიობი. ზუსტად იმ დროს მისი სახლის გვერდით მდებარე კინოთეატრში გადიოდა ფილმი Caine Mutiny, “ამბოხი ქეინზე”, სადაც მსახიობის კერპი ჰამფრი ბოგართი თამაშობდა, მაიქლს ბევრი არ უფიქრია, ფსევდონიმად აიღო ქეინი და სულ მალე ამ სახელმა და გვარმა მთელ მსოფლიო აალაპარაკა.
კარიერის დასაწყისში მან 100-ზე მეტ სატელევიზიო შოუში მიიღო მონაწილეობა, ქეინის კინოდებიუტი შედგა 1956 წელს, მაგრამ სერიოზული ყურადღება მან მიიპყრო 1964 წელს ფილმით “ზულუ”, სადაც ბრწყინვალედ შეასრულა არისტოკრატი ოფიცრის როლი. სხვათაშორის, ამ როლით მან ბევრი სკეპტიკოსი გააკვირვა, მათ ვერ წარმოედგინათ, რომ ღარიბი რაიონიდან გამოსულმა კოკნიმ, ასე ეძახიან ლონდონის აღმოსავლეთი რაიონის მცხოვრებთ, რომლებიც გამოირჩევიან დამახასიათებელი აქცენტით და იუმორის გრძნობით, შეეძლო ასეთი გარდასახვა. მომდევნო წლებში აქცენტი რომ მოეშორებინა, იგი ბევრს მუშაობდა იმ მეთოდის მიხედვით, რომელიც მას ვივიენ ლიმ ასწავლა: მთელი დღის მანძილზე, კვირების განმავლობაში უნდა ეთქვა Four Door Ford ე.ი. ოთხკარიანი ფორდი.
1966 წელს, როდესაც მაიქლ ქეინი პირველად იყო წარდგენილი ოსკარზე ფილმისათვის “ალფი”, ნიუ_იორქ დეილი ნიუსმა მას სტატია მიუძღვნა:”აბა, გოგონებო, ფრთხილად იყავით, ჯერ იყო და ბითლზები შემოგვესივნენ (ლაპარაკია ე.წ. ბრიტანულ შემოსევაზე, როდესაც ლივერპულური ოთხეულის კვალდაკვალ ამერიკაში ბევრი ცნობილი ინგლისური როკ ჯგუფი ჩავიდა), შემდეგ მინი ქვედატანები და ნახეთ ამჟამად რას გვთავაზობენ ბრიტანელები_ ნამდვილ კოკნი გმირს!” თუმცა ამერიკელები მაშინ უკვე კარგად იცნობდნენ ქეინს ფილმით “იფქრესის საქმე”, სადაც მან შეასრულა ჯაშუშის ჰარი პალმერის როლი. ეს ფილმი იყო ერთგვარი გამოძახილი ჯეიმს ბონდის ისტერიისა, რომელიც ბატონობდა მთელი მსოფლიოს ეკრანებზე. ამ ფილმმა გახადა იგი ვარსკვლავად და პირველად კინოს ისტორიაში ქეინმა შეასრულა დრამატული გმირის სახე, რომელსაც სათვალე ეკეთა. რა თქმა უნდა, იქამდეც იყვნენ სათვალიანი გმირები, მაგრამ ეს უმეტესწილად იყვნენ კომედიური მსახიობები, გავიხსენოთ თუნდაც ჰაროლდ ლოიდი. “იფქრესის საქმეს” 1967 წელს მოჰყვა გაგრძელება “მილიონ დოლარიანი ტვინი”, რომელიც ასევე დიდი პოპულარულობით სარგებლობდა.
ამერიკელმა მაყურებელმა შეიყვარა ეს კოკნი გმირი, რაც არც თუ ხშირად ხდება ხოლმე, რადგან ამერიკელებს, ჩვენგან განსხვავებით, ყველაფერი საკუთარი ურჩევნიათ _ ამერიკული მანქანები, ამერიკული საჭმელ-სასმელი და გმირებიც. დეივიდ ნივენთან. ლესლი ჰოუვარდთან და შონ ქონერისთან ერთად მაიქლ ქეინი იმ ინგლისელ მსახიობთა რიცხვში აღმოჩნდა, ვინც ამერიკულმა აუდიტორიამ თავისიანად მიიღო.
მაიქლ ქეინი ერთ-ერთი ყველაზე დაკავებული მსახიობია კინოინდუსტრიაში, თუმცა, უნდა ითქვას, რომ მის კარიერაში ცუდი ფილმები ჭარბობს. ამის შესახებ თვითონ მსახიობი გულწრფელად ამბობს: ”პირველ რიგში, მე ვირჩევ კარგ როლებს, თუ ასეთი არც ერთი არ არის, ვირჩევ საშუალო დონისას, თუ ასეთიც არ არის, მაშინ ვირჩევ ისეთს, რაშიც ფულს გადამიხდიან”. როდესაც 1987 წელს გამოვიდა სთივენ სპილბერგის გახმაურებული ბლოქბასტერის “ყბების” უბადრუკი გაგრძელება “ყბები. შურისძიება”, სადაც მაიქლ ქეინმა მთავარი როლი შეასრულა, ამისთვის მას ბევრი საყვედურობდა, რაზეც მსახიობმა უპასუხა:” ეს ფილმი მე არ მინახავს, მაგრამ დარწმუნებული ვარ ეს საშინელებაა. მაგრამ მე ვნახე ის სახლი, რომელიც აშენდა მიღებული ჰონორარით, ის კი მშვენიერია”.
მაიქლ ქეინი იმ მსახიობთა რიცხვს განეკუთვნება, რომელსაც ძალუძს ყველანაირი როლის შესრულება, იქნება ეს კომედია, დეტექტივი თუ სათავგადასავლო ფილმი და ხშირად მისი თამაში, ბევრად უკეთესია, ვიდრე თვით ფილმი. მას აგრეთვე ბევრი ვარსკვლავისგან განსხვავებით, რომელიც ძალზე ფრთხილად ირჩევს როლებს, რათა იმიჯი არ შეელახოს, შეუძლია კარდინალურად შეცვალოს ამპლუა. ისე, როგორც მან გააკეთა ბრაიან დე პალმას ტრილერში “ჩაცმული მოსაკლავად’, სადაც ქეინმა მკვლელი ტრანსვეტიტი ექიმი განასახიერა.
მისი ერთ-ერთი ყველაზე დასამახსოვრებელი როლია “მოკალით კარტერი”, სადაც იგი თამაშობს ლონდონელ განგსტერს, რომლიც ჩამოდის მშობლიურ ქალაქში, რათა გამოიძიოს ძმის ბურუსით მოცული მკვლელობა. ფილმი დადგა მაიქლ ჰოჯისმა და ქეინს მიეცა შანსი მთელი ბრწყინვალებით გამოევლინა საკუთარი ტალანტი და ბობოქარი ენერგია. 2000 წელს გაკეთდა ამ ფილმის რიმეიქი სილვესტერ სთალონეს მონაწილეობით, როგორც წესია, რიმეიქში პირველი ფილმიდან მსახიობებს იწვევენ ხოლმე და ქეინსაც პატარა როლი ერგო, თუმცა, ფილმი ისეთი ცუდი გამოვიდა, რომ ქეინი ფილმის პრემიერასაც არ დაესწრო. “მოკალით კარტერი” კი განგსტერული ფილმების ჟანრის კლასიკად იქცა.
მაიქლ ქეინი იხსენებდა:” ერთხელ ჯონ უეინმა მირჩია: ილაპარაკე ცოტა, ილაპარაკე ნელა და საერთოდ მოერიდე ბევრ ლაპარაკს. ამის მაგივრად კი მე წავედი და ვითამაშე “მაძებარში”. მანქიევიჩის ამ ბრწყინვალე დეტექტივში სულ ორი მსახიობი მონაწილეობს: ქეინი და ლეგენდარული ლოურენს ოლივიე. მართლაც, მთელი ფილმი დიალოგზეა აგებული, მაგრამ ისეთი ოსტატობით არის ნათამაშები და დაგმული რომ სურათს თვალს ვერ მოწყვეტთ.
1975 წელს ვეტერანმა რეჟისორმა ჯონ ჰიუსთონმა დიდი ხნის მეგობრები ქეინი და შონ ქონერი გადაიღო ფილმში ”ადამიანი, რომელსაც უნდოდა მეფე გამხდარიყო”. ფილმი დაფუძნებულია რადიარდ ქიპლინგის პატარა მოთხრობაზე, ქეინი და ქონერი თამაშობენ გადამდგარ ბრიტანელ ჯარისკაცებს, რომლებიც მოხვდებიან ინდოეთის ერთ პროვინციაში, სადაც იქაური მცხოვრებლები დაიჯერებენ რომ ქონერი ღმერთია. ფილმში თამაშობს ქეინის მეორე მეუღლე შაკირა, რომელიც თავის დროზე გაიანას სილამაზის კონკურსის ფინალისტი იყო.
ჰიუსთონთან მაიქლ ქეინს კიდევ ერთხელ მოუწია თამაში მეორე მსოფლიო ომის დროინდელ დრამაში, რომელიც დაფუძნებულია რეალურ ამბავზე, როცა ტყვე ჯარისკაცები ფეხბურთის მატჩს ჩაატარებენ ფაშისტების წინააღმდეგ. ქეინს პარტნიორობას უწევდა სილვესთერ სთალონე და პელე.
თავისი პირველი ოსკარი მაიქლ ქეინმა მიიღო 1987 წელს მამაკაცის მეორეხარისხოვანი როლისათვის ვუდი ალენის ფილმში “ჰანა და მისი დები” მეორე კი 1999 წელს ფილმისათვის “მეღვინეთა წესები”. 2000 წელს იმ ღვაწლისათვის რაც მან დასდო ბრიტანულ კინემატოგრაფს, ინგლისის დედოფალმა მაიქლ ქეინს რაინდის წოდება მიანიჭა. ცერემონიალის დროს მსახიობს მისი ნამდვილი სახელით მოიხსენიებდნენ.
დღესდღეობით სერ მაიქლ ქეინი საკუთარი კინოკომპანიისა და ექვსი რესტორნის მფლობელია, იგი ავტორია სამი წიგნისა, აგრეთვე კითხულობს ლექციებს სამსახობო ოსტატობაში და ისევ განაგრძობს ნაყოფიერ მოღვაწეობას კინოში.
