დღეს, კატარის მუნდიალზე პირველი ნახევარფინალური შეხვედრა გაიმართება და ლეო მესის არგენტინა ხორვატიის ეროვნულ გუნდს დაუპირისპირდება. ფავორიტად სამხრეთამერიკული ნაკრები მიიჩნევა, მაგრამ ევროპულმა გუნდმა მეოთხედფინალში მუნდიალის გამარჯვების ერთ–ერთი კანდიდატი ბრაზილია გზიდან უკვე ჩამოიცილა. აშკარაა რომ მოდრიჩი და მისი თანაგუნდელები მაქსიმალურად დაიხარჯებიან რომ ლეგენდარულმა ლეო მესიმ საფეხბურთო კარიერა მსოფლიო ჩემპიონის წოდების გარეშე დაასრულოს.
გუშინ ხორვატიის ნაკრების მთავარმა მწვრთნელმა ზლატკო დალიჩმა დღევანდელ ნახევარფინალურ დაპირისპირებაზე ისაუბრა.
„პერსონალური დაცვა მესის წინააღმდეგ? არა, ამას არ ვაპირებთ. ცხადია, ვიცით, რომ არგენტინის ნაკრებში მთავარი ფიგურა მესია, მაგრამ პერსონალური დაცვა არაა საჭირო. სამაგიეროდ, ჩვენი მიზანი ის უნდა იყოს, რომ მესისკენ მიმავალი გზები გადავკეტოთ. უნდა ვეცადოთ, რომ მესიმ ბურთი ხშირად არ მიიღოს. ლეო ბევრს არ დარბის, ის ელოდება! სამაგიეროდ, როცა ბურთს მიიღებს, სრული ძალა და ენერგია აქვს. ამიტომ, მას ბევრი სივრცე არ უნდა მივცეთ.
თუ თავს ისე დავიცავთ, როგორც ამას ბრაზილიის ნაკრების წინააღმდეგ ვაკეთებდით, მაშინ მესი ხშირად ვერ მიიღებს იმდენ სივრცეს, რაც მას სჭირდება. არგენტინა ნიდერლანდებს 2:0-ს უგებდა და მეტოქეს თამაშში დაბრუნების საშუალება მისცა – ეს აჩვენებს, რომ არგენტინა დაუმარცხებელი არ არის.“
არგენტინასთან დაპირისპირებაზე ისაუბრა ხორვატიის ეროვნული გუნდის ლიდერმა ლუკა მოდრიჩმაც:
„მადრიდის „რეალს“ და ხორვატიას ერთი დეენემი აქვთ, იმიტომ რომ ჩვენ ყოველთვის ბოლომდე ვიბრძვით და არასოდეს ვნებდებით. მინდა კიდევ ერთი ნახევარფინალი არა დიდი მოთამაშის, არამედ დიდი გუნდის წინააღმდეგ ვითამაშო. ლეო მესი ძალიან დიდია, ის მათი საუკეთესო ფეხბურთელია და ჩვენ მის შესაჩერებლად დიდ სირთულეებს გადავაწყდებით, მაგრამ მზად ვართ და ამისთვის ყველაფერს გავიღებთ.
იმედია ფინალში გასასვლელად ჩვენი მონდომება საკმარისი იქნება. ყველა დიდ ქვეყნებს აქცევს ყურადღებას, ჩვენ კი პატარა ქვეყანა ვართ და არავინ გვითვალისწინებს. თუმცაღა, ჩვენ ამის პრობლემა არ გვაქვს, სხვები ფავორიტები არიან, ჩვენ კი ჩრდილში ვართ. რა თქმა უნდა, ჩვენ მატჩების ადრე დასრულება გვსურს და არ გვინდა მისი პენალტებამდე მიყვანა, მაგრამ თამაშების მოსაგებად ყველა ხერხს მივმართავთ,“ – განაცხადა ლუკა მოდრიჩმა.
მაროკოში კი დიდი ზეიმი გრძელდება. გუშინ ცნობილი გახდა, რომ მაროკოს ავიახაზებმა ოცდაათი სპეციალური რეისი დანიშნა, რათა გულშემატკივრები კასაბლანკადან დოჰაში ჩაიყვანოს საფრანგეთთან ნახევარფინალურ მატჩზე დასასწრებად.
„Royal Air Maroc“–ის ავიახაზებმა ოფიციალური განცხადება გაავრცელა, სადაც ცნობილი გახდა, რომ ისინი გულშემატკივარს შესაძლებლობას მისცემენ ასეთ ისტორიულ მომენტს, როგორიც მსოფლიო ჩემპიონატის ნახევარფინალში გასვლაა, მაქსიმალურად ცოტა ადამიანი დააკლდეს.
გუშინ, მაროკოს ნაკრების მთავარმა მწვრთნელმა ვალიდ რეგრაგიმ მაროკო სილვესტერ სტალონეს კინოგმირ როკი ბალბოას შეადარა.
„ფეხბურთის თვალსაზრისით ასეთი დიდი ქვეყნების დამარცხება შეუძლებელია, მაგრამ მწველი გულით, ღია სულით, კარგი ტაქტიკით და გულშემატკივრების დიდი სიყვარულით ეს შევძელით. ახლა ძალიან, ძალიან ბედნიერები ვართ. ასევე ბედნიერი ვარ ესპანეთის გამო, რადგან ამ ქვეყანაში არიან ადამიანები, რომლებიც ამბობდნენ, რომ მაროკოსთან წაგება ნამდვილი სირცხვილია. თუმცა, დაინახეს, რომ ჩვენი დამარცხება ადვილი არაა.
დიახ, ტაქტიკა ავიღეთ დიეგო სიმეონესგან პორტუგალიისა და ესპანეთის წინააღმდეგ. არაფრის თქმა არ მინდა, მაგრამ ჩოლომ იცის, რასაც აკეთებს და ამას ძალიან კარგად აკეთებს. ტაქტიკურად კარგად ვითამაშეთ, მეტოქეს ღია სივრცეები არ დავუტოვეთ, ვიცოდით, რომ გვყავს ტექნიკური მოთამაშეები, რომელთაც შესაფერის მომენტში შეუძლიათ განსხვავების შექმნა. გარდა ამისა, ძალიან გაგვიმართლა.
საფრანგეთთან შეხვედრა კარგია, რადგან ეს ჩემი მეორე სამშობლოა. წარმოუდგენელი იქნება დეშამის გუნდის წინააღმდეგ თამაში. მაროკოს ნაკრები მსოფლიოს 2022 წლის ჩემპიონატის როკი ბალბოაა. თუმცა, ეს სულაც არ არის სასწაული, არამედ გუნდის შრომის შედეგია. ესპანეთის შემდეგ ძლიერი პორტუგალია დავამარცხეთ, ყველა დაღლილობამდე იბრძოლა, ეს მხოლოდ ჩვენს მებრძოლ სულისკვეთებას უსვამს ხაზს“, – განაცხადა ვალიდ რეგრაგიმ.
საინტერესოა, რომ მაროკოს ნაკრების რამდენიმე ფეხბურთელი და აგრეთვე, მთავარი მწვრთნელი საფრანგეთშია დაბადებული. ვალიდ რეგრაგის ყოფილი თანაგუნდელი ახლა საფრანგეთის ნაკრების ერთ–ერთი ლიდერია – ოლივიე ჟირუ.
ისინი „გრენობში“ 2007 წელს ერთად თამაშობდნენ. მაშინ მაროკოელი მცველი 32 წლის იყო და კარიერის ბოლო ეტაპს გადიოდა, ხოლო ჟირუმ კარიერა სწორედ „გრენობლში“ დაიწყო.
მსოფლიოს ჩემპიონატის წინ რთული წარმოსადგენი იყო, რომ საფრანგეთი ნახევარფინალში მაროკოს ნაკრებს დაუპირისპირდებოდა. კილიან მბაპემ იხუმრა კიდეც, რომ თუ მისი და აშრაფ ჰაკიმის გუნდები პლეი ოფში ერთმანეთს შეხვდებოდნენ, ის იძულებული გახდებოდა მეგობარი გაენადგურებინა, ჰაკიმმა კი ასევე ხუმრობით უპასუხა: „მე ვაპირებ მბაპეს დამხობას“.
მბაპე და ჰაკიმი „პსჟ“–ს შემადგენლობაში ერთად 2021 წლიდან თამაშობენ. მაროკოს მარჯვენა მცველს მსოფლიოს ჩემპიონატის ნახევარფინალში თანაგუნდელის აყვანა მოუწევს, რაც ამ დაპირისპირებას დამატებით ინტრიგას სძენს.
გუშინ, ბრაზილიის ნაკრების ვარსკვლავმა ნეიმარმა სოციალურ ქსელში განცხადება გაავრცელა და კატარში მიმდინარე მსოფლიოს ჩემპიონატს კიდევ ერთხელ გამოეხმაურა.
„მეოთხედფინალში განცდილი მარცხი მოსვენებას ამ დრომდე არ მაძლევს. მიზანთან ასე ახლოს ვიყავით. სამწუხაროდ თუ საბედნიეროდ, წაგება ჯერ კიდევ ვერ ვისწავლე. მარცხი უფრო ძლიერს მხდის, თუმცა, იმხელა ტკივილიც მოაქვს, რომ ჭრილობის მოშუშებას დიდი დრო სჭირდება. კიდევ ერთხელ ვუხდი მადლობას ბრაზილიელ ხალხს უდიდესი მხარდაჭერისთვის. მადლობა კატარს ყველაფრისთვის. დიდებული თასი იყო, რომელიც ბრაზილიაში უნდა წასულიყო, თუმცა, ღმერთის ნებით, ეს არ მოხდა. ახლა, დრო ოჯახთან და მეგობრებთან ერთად უნდა გავატარო და ენერგია აღვიდგინო, რადგანაც ამ წაგებასთან ერთად ცხოვრება რთული იქნება. ახლაც ძალიან მტკივა,“– განაცხადა ნეიმარმა.
მაროკოსთან დამარცხების შემდეგ პირველი კომენტარი გააკეთა კრიშტიანო რონალდომაც.
„პორტუგალიასთან ერთად მსოფლიოს ჩემპიონატის მოგება ჩემს კარიერაში ყველაზე დიდი და ამბიციური ოცნება იყო. საბედნიეროდ, საერთაშორისო დონეზე მრავალი ტიტული მოვიგე, მათ შორის პორტუგალიისთვის, მაგრამ ჩვენი ქვეყნის სახელის მსოფლიოში უმაღლეს დონეზე დაყენება, ჩემი ყველაზე დიდი ოცნება იყო.
ამისთვის ვიბრძოდი. ამ ოცნებისთვის მთელი ძალით ვიბრძოდი. 16 წლის განმავლობაში, ხუთ მუნდიალზე, ყოველთვის დიდებულ ფეხბურთელებთან ერთად და მილიონობით პორტუგალიელი ხალხის მხარდაჭერით, ყველაფერი გავიღე. ყველაფერი მოედანზე დავტოვე. არასდროს დავნებებულვარ და არასოდეს დამითმია ეს ოცნება.
სამწუხაროდ, გუშინ ოცნება დასრულდა. ცხელ გულზე რეაგირება არ ღირს. მინდა, ყველამ იცოდეს, რომ ბევრი ითქვა, ბევრი დაიწერა, ბევრი ვარაუდი გაკეთდა, მაგრამ ჩემი ერთგულება პორტუგალიისადმი წამითაც არ შეცვლილა. ყოველთვის ვიბრძოდი ყველა მიზნისთვის და არასდროს ვაქცევდი ზურგს თანაგუნდელებსა და ჩემს ქვეყანას.
ჯერჯერობით, სათქმელი ბევრი არაფერია. მადლობა პორტუგალიას, მადლობა კატარს. მშვენიერი ოცნება იყო, სანამ გაგრძელდა. ახლა დროა დავფიქრდეთ და დასკვნები გამოვიტანოთ,“ – დაწერა რონალდომ.
მსოფლიო ფეხბურთის ლეგენდამ, ლუიშ ფიგუმ, მსოფლიო ჩემპიონატზე პორტუგალიის ნაკრების მეოთხედფინალური მატჩი შეაფასა და კრიშტიანო რონალდოს თადარიგში დარჩენაზე კომენტარი გააკეთა.
„თუ მსოფლიო ჩემპიონატის მოგებას აპირებ, რონალდო თადარიგში არ უნდა დატოვო. კარგია, რომ შვეიცარიის წინააღმდეგ ამან გაამართლა, მაგრამ ყოველთვის ასე არ მოხდება. მაროკოსთან მარცხში უმთავრესი დამნაშავე ფერნანდო სანტუშია,“ – განაცხადა ფიგუმ.
საფრანგეთის ნაკრების კაპიტანმა უგო ლორისმა ჰარი კეინის გაცუდებულ პენალტზე კომენტარი გააკეთა. ლორისი და კეინი წლებია ლონდონის „ტოტენჰემში“თანაგუნდელები არიან.
„საბედნიეროდ კეინმა პენალტი ვერ გაიტანა. ეს კარგია საფრანგეთის ნაკრებისთვის, მაგრამ მე ყოველთვის ვწუხვარ, როცა თამაშის შემდეგ ჩემს თანაგუნდელს ასე მოწყენილს ვხედავ. აუცილებელია გამარჯვებით გახარება, მაგრამ მნიშვნელოვანია მეტოქის პატივისცემა. პატივს ვცემ ჰარის და მწყინს მისი ამ მდგომარეობაში ხილვა. თუმცა, ეს არის ფეხბურთი და ჩვენ მომდევნო ეტაპზე ვართ,“ – განაცხადა უგო ლორისმა.
ინგლისის ნაკრები სახლში კვლავ მედლების გარეშე, თუმცა …კატით ბრუნდება.
„მანჩესტერ სიტის“ მცველებმა ჯონ სტოუნზმა და კაილ უოკერმა ალ–ვაკრაში, ბაზის ახლოს, უპატრონიო კატა ნახეს, დაუმეგობრდნენ და დეივი დაარქვეს.
უოკერს უთქვამს, რომ ტურნირზე გამარჯვების შემთხვევაში, დეივს სახლში წაიყვანდა და მიუხედავად მარცხისა, მაინც წაიყვანენ. კატა ადგილობრივ საავადმყოფოში გაივლის სამედიცინო შემოწმებას, ოთხი თვე კარანტინში მოუწევს ყოფნა, მერე კი მანჩესტერში გაამგზავრებენ.
კატარში მსოფლიოს ჩემპიონატის მიმდინარეობისას კიდევ ერთი ჟურნალისტი გარდაიცვალა – ხალიდ ალ–მისლამი.
ის ტელეკომპანია „Al Kass“–ის ფოტორეპორტიორი იყო და მუნდიალის გაშუქების პერიოდში გარდაიცვალა. მიზეზი ამ დრომდე უცნობია.
ეს უკვე მეორე შემთხვევაა, როცა მსგავსი შემთხვევა მოხდა. ნიდერლანდებისა და არგენტინის მატჩის დროს ამერიკელი ჟურნალისტი, გრენტ უოლი გარდაიცვალა, რომელიც სტადიონზე იმყოფებოდა.
ავტორი
