ჩოხატაურის მუნიციპალიტეტის სოფელ წიფნარის საჯარო სკოლის მასწავლებელი ნუნუ ანდღულაძე ცოტა ხნის წინ მასწავლებლის ეროვნული პრემიით დაჯილდოვეს. ის თერთმეტ საუკეთესო პედაგოგს შორის მოხვდა.
როგორც დაჯილდოების ცერემონიაზე აღნიშნეს, დიდია ქალბატონი ნუნუს წვლილი წიფნარის საჯარო სკოლის განვითარების საქმეში.
როგორც თავად ამბობს, განაცხადი მასწავლებლის ეროვნულ პრემიაზე სკოლის ავტორიზაციის ხელმძღვანელის რჩევითა და თხოვნით შეიტანა და გაიმარჯვა კიდეც.
“გურია ნიუსი” ქალბატონ ნუნუ ანდღულაძეს ესაუბრა.
_ ქალბატონო ნუნუ, რამდენი ხანია, რაც წიფნარის საჯარო სკოლაში ასწავლით? მანამდე თუ ასწავლიდით სადმე?
_ 1986 წლიდან ვმუშაობ წიფნარის სკოლაში, ამ დროს ეს სკოლა დაწყებითი იყო (რაიონში სულ 14 დაწყებითი სკოლა ფუნქციონირებდა). 1987 წელს გამგედ დავინიშნე. ჩემი ინიციატივით და შესაბამისი უწყებების მხარდაჭერით, 1990 წელს გავხსენით 9 წლიანი სკოლა (ყველა დანარჩენი დაწყებითი სკოლები მიმდებარე საშუალო სკოლებს შეუერთეს) და დირექტორად დავინიშნე. ძალიან რთულ პირობებში გვიხდებოდა მუშაობა _ მატერიალური ბაზა, თითქმის, არ გვქონდა. ხან _ კოლმეურნეობის კანტორის შენობაში, ხან _ სოფლის ბიბლიოთეკის შენობაში, ხან _ საგზაოდან ნათხოვარ ვაგონში, ბოლოს ყოფილი საბავშვო ბაღის შენობაში გვყავდა კლასები. ყოველი არჩევნების წინ გვპირდებოდნენ შენობას, მაგრამ ამაოდ. მიუხედავად ამისა, ჩვენი სკოლა, მასწავლებლები თუ მოსწავლეები მაღალი ენთუზიაზმითა და პასუხისმგებლობით ასრულებდნენ დაკისრებულ მოვალეობებს და ყოველთვის წარმატებული ვიყავით. ვიმარჯვებდით ეროვნულ თუ საერთაშორისო კონკურსებში და ყოველთვის ვიმსახურებდით მადლობებს, სიგელებს, ფულად ჯილდოებს. ხანგრძლივი და განუწყვეტელი ზრუნვის შედეგად (ქალბატონი მანანა ჯინჭარაძის სიტყვები მახსენდება, რკინის ქალამნები ჩაიცვა და ისე იარა, კარებიდან რომ არ უშვებდნენ ფანჯრიდან შედიოდა და ასე მიაღწია მიზანსო) 2013 წელს გვეღირსა სკოლის ახალი შენობა. ამ დროს მე დირექტორობიდან გადავდექი და ვარ დაწყებითი კლასების სერტიფიცირებული მასწავლებელი 2013 წლიდან, ამჯერად წამყვანის სტატუსით. უამრავი სიგელის და იაკობ გოგებაშვილის მედლის მფლობელი, საქართველოს დამსახურებული მასწავლებელი, ამჯერად მასწავლებლის ეროვნული ჯილდოსა და პრემიის ლაურეატი. მადლობა უფალს და მადლობა ყველას, ვინც გვერდით მედგა და მხარს მიჭერდა საერთო წარმატების მიღწევაში. ვიდრე წიფნარის სკოლაში მოვიდოდი, 4 წელი ვიმუშავე ზოტის სკოლაში ბიოლოგიის მასწავლებლად საკმაოდ წარმატებულად და ნაყოფიერად, როგორც მოსწავლეების, ისე პირადად ჩემი განვითარებისთვის.
_ რატომ აირჩიეთ მასწავლებლობა? რამ გადაგაწყვეტინათ?
_ მასწავლებლობანას დიდი სიამოვნებით ვთამაშობდი ბავშვობაშიც, შემდეგ ჩემი პირველი მასწავლებლის პირადი მაგალითი იყო ჩემი მამოტივირებელი და ბოლოს, გეოგრაფიის მასწავლებელი. სწორედ ამიტომ ჩავაბარე გეოგრაფია-ბიოლოგიურზე, სადაც ძალიან კარგი სტუდენტი ვიყავი მაღალი სახელმწიფო სტიპენდიით.
_ შეგიძლიათ, გაიხსენოთ თქვენი პირველი გაკვეთილი? რა ემოცია გქონდათ?
_ არ ვიცი, რომელს დავარქვა პირველი გაკვეთილი, რადგან სტუდენტურ პრაქტიკებზე სკოლაში ჩვეულებრივ გაკვეთილებს ვატარებდი დიდი ინტერესითა და კმაყოფილებით, როგორც მასწავლებელმა ზოტის სკოლაში მეცხრე კლასში ჩავატარე პირველი გაკვეთილი, სადაც ძალიან ბევრი (40-ზე მეტი) ბავშვი იყო (შემდეგ გაიყო ეს კლასი) და ძალიან დიდები, ასაკთან შედარებით, სართოდ არ ჰქონდათ განწყობა ბიოლოგიის გაკვეთილისთვის, ვერაფრით შევძელი მოტივირება, ბოლოს გავჩერდი და ვიკითხე მათი სურვილი, რა გვეკეთებინა ამ გაკვეთილზე და მივიღეთ საერთო გადაწყვეტილება თავისუფალი საუბრის, გაკვეთილი წარიმართა კითხვა-პასუხის რეჟიმში მათი სურვილების და შეხედულებების შესახებ ცხოვრებისეულ საკითხებზე და ბოლოს, მაინც მივედით ბიოლოგიის სწავლების აუცილებლობამდე, ეს გაკვეთილი ძალიან საინტერესო და სამახსოვრო იყო ჩემთვისაც და დარწმუნებული ვარ, მათთვისაც.
_ თუ გყავთ გამორჩეული მწერალი, პოეტი, რომლის შემოქმედებასაც დღეს თქვენი მოსწავლეები სწავლობენ და როგორ ფიქრობთ, რატომ არის ის გამორჩეული?
_ ჩემთვის ყველაზე საყვარელი მწერალი, რა თქმა უნდა, ნოდარ დუმბაძეა ბავშვობიდანვე და დღესაც. ვაფასებ მის იუმორით გადმოცემულ სიბრძნეს, თუმცა, ძალიან მიყვარს რევაზ ინანიშვილი, გოგებაშვილის დიდაქტიკური მოთხრობები, ეზოპეს და სულხან-საბას იგავ-არაკები, რადგან ჩემს ბავშვებს მოსწონთ და სჭირდებათ.
_ როგორ უნდა დააინტერესოს მასწავლებელმა მოსწავლე კითხვით, ან თუნდაც მათემატიკით, როცა ციფრულ მოწყობილობებზე დამოკიდებულება სჭარბობს?
_ ყველაზე კარგი ეფექტი აქვს ბიბლიოთეკაში ვიზიტს. ძალიან მოსწონთ ფერადი, ნახატებიანი წიგნები და სურვილი უჩნდებათ, მალე ისწავლონ კითხვა, რომ გაიგონ რა წერია ამ წიგნებში. ვერ გახდება მასწავლებელი, ექიმი თუ სხვა, რაც მათ სურთ თუ არ ისწავლიან კარგ კითხვას, მოსწონთ თამაშები კუბებით, ბარათებით, ბუკებით, პოსტერებით, ხატვით, მუსიკით, სასწავლო პროცესში აქტიური ჩართულობით.
_ რომელი საგანი უფრო აინტერესებთ ან უჭირთ მოსწავლეებს (ქართული თუ მათემატიკა და როგორ ეხმარებით საგნის დაძლევაში? როგორ იქცევით, როცა მოსწავლე ქართულში უფრო კარგია, ვიდრე _ მათემატიკაში? ან პირიქით ?
_ ბავშვი, მისი შესაძლებლობები ინდივიდუალურია, ზოგს მათემატიკა აინტერესებს ან უჭირს, ზოგს _ ქართული. საგნის დაძლევაში რემედიაციის ანუ განსხვავებული მეთოდებით დამოუკიდებლად ვამუშავებ, როგორც გაკვეთილზე, ისე გაკვეთილის გარეშეც. ასევე, მშობელთან თანამშრომლობით. რომელ საგანშიც უჭირს, იქ ვეხმარები უფრო განსხვავებული და მრავალფეროვანი მეთოდებით და რესურსებით. მართალია, ძნელია კომპიუტერთან, ტელეფონთან მიჯაჭვული ბავშვები კითხვით დააინტერესო, ასწავლო, მაგრამ ამას ვახერხებ კლასში სახალისო, საინტერესო რესურსებით და სახლში მშობლებთან სისტემატიური კონტაქტით, თანამშრომლობით.
_ რას ნიშნავს იყო კარგი პედაგოგი?
_ კარგ პედაგოგს უყვარს თავისი პროფესია და ბავშვები, არის მიზანდასახული, პასუხისმგებლობის გრძნობით, მოტივირებული, პროფესიული წინსვლისთვის აქტივობებში აქტიურად ჩართული. სწორედ ასეთი მასწავლებელი მიაღწევს მიზანს.
_ რას ურჩევდით დამწყებ მასწავლებლებს?
_ დამწყები მასწავლებლისთვის აუცილებელია კოლეგებთან და გამოცდილ პედაგოგებთან თანამშრომლობა, მოსწავლე აღიქვას, როგორც საკუთარი შვილი, სუფთა დაფა, აქტიურად ჩაერთოს პროფესიული განვითარების აქტივობებში, სამინისტროს და პროფესიული განვითარების ცენტრის მიერ ორგანიზებულ სპეციალურ პროგრამებში.
ავტორი
