ოზურგეთის რაიონულ სასამართლოში ა.თ-ს და თ.ი-ს საქმის პროცესი შედგა. თ.ი „გურია ნიუსთან“ საუბრის დროს ამბობს, რომ ის ოჯახში ძალადობის მსხვერპლი არის და მის ყოფილ მეუღლეს ახლა სურს ბავშვები წაართვას.
მოსამართლემ მარინა კიკნაძე სასამართლო სხდომის დაწყებისთანავე ორივე მხარეს მორიგება შესთავაზა. მორიგების პროცესის დაწყებამდე კი სოციალური მომსახურების სააგენტოს მიერ მომზადებული დასკვნა გააცნო დარბაზში მყოფ პირებს.
“სოციალური მომსახურების სააგენტოს გურის სოციალური მომსახურების სამხარეო ცენტრს, როგორც მეურვეობა-მზრუნველობის ტერიტორიულ ორგანოს ოზურგეთის რაიონული სასამართლოს მიერ საქმე #2-728-17-თან დაკავშირებით დაევალა, შეისწავლოს მოსარჩელე ა.ძ.-ის და მოპასუხე თ.ვ-ს საცხოვრებელი პირობები, არამარტო მატერიალური, საშინაო, საყოფაცხოვრებო პირობების გათვალისწინებით, არამედ ბავშვების ასაკის, ჯანმრთელობის მდგომარეობის და აღზრდის ნორმალური პირობების შექმნის გათვალისწინებით.
მოსარჩელე ა. თ. მშობლებთან ერთად ცხოვრობს ოზურგეთის მუნიციპალიტეტის სოფელ დვაბზუში. საცხოვრისი წარმოდგენილია კერძო ორსართულიანი კაპიტალური სახლით და საკმაოდ დიდი ეზოთი. სახლში საცხოვრებელი პირობები დამაკმაყოფილებელია. მოწესრიგებულია სველი წერტილები. ოჯახის შემოსავალი განისაზღვრება ორი წევრის პენსიით განსაზღვრული თანხით, ასევე ორი წევრის კერძო საქმიანობიდან მიღებული თანხით, რაც თვის განმავლობაში საშუალოდ 800 ლარამდე აღწევს.
ა.თ-ის ოჯახში არის კეთილსაიმედო გარემო ბავშვის არა მხოლოდ დროებით განსათავსებლად, არამედ ნორმალური აღზრდისთვის, ვინაიდან იქ ბავშვების რამდენიმეთვიანი თანაცხოვრების (მათ შორის ბიოლოგიურ დედასთან ერთად) პერიოდში მთელი ოჯახი მობილიზებული იყო ბავშვების ნორმალური განვითარების, ასევე, ჯანმრთელობის მდგომარეობის ნორმალიზაციის მიმართულებით. შემეცნებითი სპექტრის გაფართოვების მიზნით, პერიოდულად ბავშვები დაყავდათ ქ. ბათუმში და ქ. თბილისში, სადაც მათი ასაკის გათვალისწინებით, აძლევდნენ სხვადასხვა ღირსშესანიშნაობის გაცნობის საშუალებას. მიუხედავად იმისა, რომ ბავშვები არიან მცირეწლოვანები, დედის გარეშე უპრობლემოდ, ლაღად და თავისუფლად გრძნობდნენ თავს მამის და ბებია-ბაბუას გარემოცვაში.
თ.ი. მამასთან, დასთან, მცირეწლოვან დისშვილთან და თავის ბიოლოგიურ შვილებთან ერთად ცხოვრობს ოზურგეთის სოფელ ნატანებში. საცხოვრისი წარმოდგენილია ერთსართულიანი სახლით, სადაც გამოსაყენებელია მხოლოდ ორი პატარა ოთახი, რომელიც პირდაპირ მიწაზე დგას და ასევე, არის მრავალმხრივ დანიშნულების (საძინებელი, სასადილო, მისაღები). ოჯახის წევრების ინფორმაციით, მათ აქვთ საკმაოდ სოლიდური შემოსავალი მშობლების კერძო საქმიანობიდან, დაახლოებით, 2500 ლარამდე ყოველთვიურად. ოჯახში ბავშვებზე გახორციელებული ზრუნვა დამაკმაყოფილებელია.
ბავშვის ჭეშმარიტი ინტერესებიდან გამომდინარე, აუცილებელია ორივე მშობელთან ურთიერთობა. თ.ი.-ს ინფორმაციით, მას ჰქონდა შეთანხმება ყოფილ მეუღლესთან იმის თაობაზე, რომ დასვენების დღეებში ბავშვები წაეყვანა ოჯახში, მაგრამ იმის გამო, რომ ა.თ. რაიონულ სასამართლოს მიმართა სარჩელით ბავშვების საცხოვრებელი ადგილის განსაზღვრის თაობაზე. მან შეცვალა გადაწყვეტილება და ელოდება სასამართლოს განაჩენს.
ბავშვების საუკეთესო და ჭეშმარიტი ინტერესებიდან გამომდინარე, საქმის ობიექტურად გადასაწყვეტად მიზანშეწონილად მიმაჩნა სამხარეო ცენტრის ფსიქოლოგის ჩართვა ბავშვებთან მიმართებაში“.
ამ დასკვნის შემდეგ ორივე მხარეს მიეცა სიტყვის გამოთქმის უფლება.
“მინდა ჩემს სახლში აღიზარდოს ჩემი შვილები. მე მათ ყველანაირ პირობებს შევუქმნი. ასევე, მსურს ცეკვის გაკვეთილებზე ვატარო და კარგი სწავლა-განათლება მიიღონ. თ.ი-ს არ აქვს ამის საშუალება და ორ ოთახში ცხოვრობს ოჯახის წევრებთან ერთად. ასევე, მისი და არის გაშორებული ქმარს და შვილთან ერთად მამის სახლში გამოვიდნენ საცხოვრებლად“
ჩემი ყოფილი ცოლი თურქეთში იყო გადასული სამუშაოდ და იმ ხნის განმავლობაში შვილებს მე ვუვლიდი, ასევე, ვეხმარებოდი ჩემი მშობლები. ერთი თვე არ იმყოფებოდა საქართველოში და ახლაც ხომ შეიძლება 15 დღე ჩემთან იზრდებოდნენ შვილები?“ _ აღნიშნა სხდომაზე ა.თ.-მ.
“ახლა გაახსენდა შვილები, წელიწადნახევარი ბავშვები არ უნახავს. თანახმა არ ვარ, 15 დღით იზრდებოდეს ჩემი შვილები ა.თ-ს ოჯახში. ყველანაირი პირობები აქვს ჩემს ოჯახს, რომ ბავშვები აღვზარდოთ და მოვუაროთ. ჩვენ ერთხელ შევრიგდით, მაგრამ მაინც არ აეწყო ურთიერთობა და ყველანაირად გამორიცხულია ჩვენი შერიგება“, _ უპასუხა ყოფილ მეუღლეს თ.ი-მა.
ა.თ. ამბობს, რომ ბავშვებს ყოფილი ცოლის ძმა და მამა არ აჩვენებდნენ.
ა.თ: “როგორ ვნახავდი შვილებს, როდესაც ყოველთვის პრობლემა მექნებოდა იქ მისვლის დროს. რამდენჯერმე მცემეს და ახლა კი ამბობს ბავშვების სანახავად არ მივდიოდი“.
თ.ი: “ახალგაზრდა კაცი ხარ და ეს ტყუილები არავისთან გაგივა. ყველაფერი იცის ჩემმა მეზობლებმა და თუ საჭირო იქნება, სასამართლოში ჩვენებას მისცემენ“.
მოსამართლე მარინამ კიკნაძემ ამ საუბრის შემდეგ კიდევ ერთხელ შესთავაზა ორივე მხარეს მორიგება.
მორიგება შედგა. ბავშვები კვირაში ორ დღეს მამასთან გაატარებენ, თვეში 150 ლარს ალიმენტს გადაიხდის და ყოველ ზაფხულს, ერთ თვეს ა.თ-ს ოჯახში იქნებიან.
ალიმენტთან დაკავშირებით ცოტა იმსჯელეს.
ადვოკატი: “ვერ გადაიხდის ამ თანხას. მანქანა უკვე აღარ ყავს და იქნებ 130 ლარზე შევთანხმდეთ“.
მოსამართლე: “მშვენიერი მორიგება არის და ახლა ამაზე საუბარი მგონი არ ღირს. თან ა.თ არაფერს ამბობს“.
ადვოკატი: “არ ამბობს, მაგრამ ფეხი კინაღამ მომტეხა. რაც რეალობა არის იმას ვამბობთ“.
“მე დავამატებ 20 ლარს, ოღონდ ეს საქმე დასრულდეს და ყველაფერს თავისი სახელი დაერქვას“, _ თქვა სასამართლო პროცესზე ა.თ-ძის დედამ.
მოსამართლე: “როგორმე უფრო მეტად უნდა სცეთ პატივი ერთმანეთს, რადგან ორი შვილი გყავთ და ბავშვების გამო, ყველა ინტერესი გვერდზე უნდა გადადოთ“, _ უთხრა ორივე მხარეს.
სასამართლო პროცესის დასრულების შემდეგ ა.თ.-მ ჩვენთან კომენტარი არ გააკეთა. და ა. თ-ს დედა ჩვენთან საუბრისას ამბობ, რომ მისი ყოფილი რძალი ოჯახში ძალადობის მსხვერპლი არ არის.
“ქალი იყო ეჭვიანი, რადგან ჩემი შვილი ღამითაც მუშაობდა და ყოველთვის ამაზე ჰქონდათ კონფლიქტი. მე მაქვს ჯანმრთელობასთან დაკავშირებით პრობლემები, მაგრამ მიუხედავად ამისა, მან ფიზიკური შეურაცხყოფა მომაყენა. ჩვენს საქმეში ჩართული იყო სოციალური მომსახურების სააგენტო და ჩემს ყოფილ რძალს ვეუბნებოდი, რომ მათი რჩევები გაეთვალისწინებინათ:.
ყოფილი დედამთილის კომენტარს უარყოფს თ.ი.
“მე ვარ ოჯახში ძალადობის მსხვერპლი. ნამდვილად მცემა ჩემმა ყოფილმა ქმარმა და ამის დამადასტურებელი საბუთი არსებობს. ვეღარ გავჩერდებოდი მასთან და ამიტომ წამოვედი. თავშესაფარში ვიყავი, მაგრამ შემდეგ მამაჩემის სახლში წავედი. თურქეთიდან რომ ჩამოვედი, ბავშვებს არ მაძლევდნენ და პოლიციის დახმარებით წამოვიყვანე. საქმეში სახალხო დამცველი და მედია ჩაერთო. არ მაძლევდნენ მეზობლებთან ურთიერთობის უფლებას, ის კი არა, ბავშვების ნათლია რომ მოვიდა, ამის გამო ატეხეს მთელი ამბავი და როცა ის ეზოდან გადააგდეს, მისი ოჯახის წევრებსაც ჯოხით ემუქრებოდნენ ეზოში ჩამოსული არ დაგინახოთო“, _ ამ კომენტარის დროს ა.თ.-ს დედამ, რომელიც სასამართლოს შენობის წინ იმყოფებოდა, მოგვიახლოვდა და საუბარში ჩაგვერთო. მან სიტყვიერი შეურაცხყოფა მიაყენა ჟურნალისტს, რომელმაც გახადა საჯარო ი.თ-ს საქმე.
“ამ ყველაფრის უკან გოჩა ჭანიშვილი დგას. მან დაანგრია ეს ოჯახი და ახლა აქ არის მოსული დამცველად“.
ჟურნალისტმა მოუწოდა ა.თ.-ს დედას თავი შეეკავებინა ცრუ ინფორმაციის გავრცელებისგან. ჟურნალისტის თქმით, ის არაფერ შუაშია.
“თ.ი.-ს ვიცნობ და მას ჰქონდა სერიოზული პრობლემა. მე ამის შესახებ ვაცნობე მედიის წარმომადგენლებს და აქედან გამომდინარე, ეს ხალხი მაბრალებენ ყველაფერს. ნამდვილად არ გავჩუმდები, როდესაც საქმე ეხება ოჯახში ძალადობის ფაქტს“, _ გვითხრა გოჩა ჭანიშვილმა.
