“მეტი კომუნიკაცია ხალხთან _ დაგროვილია ფეთქებადი ინფორმაციები”

ოზურგეთის მუნიციპალიტეტის  სოფლებში ცენტრალური და ადგილობრივი ხელისუფლების წარმომადგენელთა შეხვედრები გრძელდება _ სოფლების მცხოვრებთა უმეტესობა მძიმე ეკონომიკურ ყოფაზე საუბრობს.

შეხვედრებზე მოსახლეობა ყველაზე მცირერიცხოვანი რაოდენობით სოფელ ჭანიეთში გამოვიდა _ აქ მუნიციპალურ და სახელმწიფო სერვისებზე ისაუბრეს და  მოსახლეობის წარმომადგენლებმა სოფლის სამარშრუტო ტრანსპორტის გაუმართაობა ერთ-ერთ უმთავრეს პრობლემად დაასახელეს და ითხოვეს დახმარება, რომ როგორმე მოწესრიგდეს ეს საკითხი. 

სოფელ ლიხაურის მოსახლეობასთან შეხვედრისას კი, სადაც ყველაზე მრავალრიცხოვანი რაოდენობით გამოვიდნენ ადგილობრივები, რადგან სოფელიც დიდია, პრობლემებიც უხვად წარმოადგინეს.

ლიხაურელმა  ვაჟა ჭანიშვილმა პარლამენტარ გია ვოლსკის  მიმართა, რომ ხუთი თხოვნა ჰქონდა, რაზეც თემურ ჭკუასელი გაეხუმრა:

 _ ოქროს თევზსაც კი სამი თხოვნით მიმართავენ და აბა, თქვი, შენი სურვილები, _ უთხრა ჭკუასელმა, რაზეც ყველამ გულიანად გაიცინა, ჭანიშვილმა კი გააგრძელა:

_ ბატონო გია, კარგი ხართ, რომ მოხვედით. ტელევიზიითაც ინტერესით გისმენთ და გიყურებთ, მომწონს თქვენი გამოსვლები, თუმცა, პირისპირ ნახვას რა სჯობს.  წყალი არ გვაქვს. აქ წყალი რომ გამოიყვანეს, ჩაის მოჰყვა ეს ამბავი. ახლა არც ჩაია და არც წყალი. შეერთებულია მდინარესთან ეს მილები და ადიდდება თუ არა, მოყვება ჭიები და სიბინძურეები.  50 მილიონი რომ გამოიყო ფაროსანას წინააღმდეგ ბრძოლისთვის, სად გაქრა. ხალხს დაგვეხმარეთ ცოტა. შშმ კაცი ვარ, ოთხი წელია, თხილის მოსავალი არ მიმიღია, დალპა. 120 ჰა ფართობი გვქონდა ჩოლოქის სანაპიროსთან, წელს ხუთი ჰა დაითესა მხოლოდ. კარგი იყო ის ვაუჩერები რომ მოგვეცით ადრე, ჩვენც გვყოფნიდა, მეზობელსაც ვაძლევდით სიმინდს. ესეც გაქრა. შეშას არ გვაჭრევინებენ ტყეში ახლოს. შორს მე ვერ მივდივარ. 200-ლარიანი პენსიით,  რა ვქნა. ოჯახი მყავს, შვილიშვილები, წამალში არ მყოფნის ეს. თქვენ არჩევნების დროს გვპირდებით,  აგაშენებთო. ასეა სულ _ დამთავრდება არჩევნები და არაფერი. კი ვართ მშიერ-მწყურვალი. რა ვქნათ. კარგია, რომ მოხვედით,  მაგრამ ხალხს მეტად დაგვეხმარეთ, _ მიმართა  ჭანიშვილმა ვოლსკის.

ლიხაურელმა მრავალშვილიანმა დედამ ნათია ღაჟონიამ ხელისუფლების წარმომადგენლებს სთხოვა, ხალხში სიარულს მოუხშირონ:

_ კარგია, რომ მოხვედით. ადგილობრივმა წარმომადგენლებმა ძალიან კარგად იციან  ჩვენი პრობლემების შესახებ, ჩვენზე უკეთაც. მე რვა შვილის დედა ვარ. უფროსმა ორმა ბიჭმა ჩააბარა ეროვნული გამოცდები, წავიდნენ თბილისში, მაგრამ ვერ  გადავიხადე  გადასახადი და დავაბრუნე უკან, მივატოვებინე სწავლა. ახლა მოცვის პროგრამა ამუშავდა და ჩავერთეთ. სოფელს უმწვავესი პრობლემა აქვს _ არ გვაქვს წყალი.  გზები კეთდება, თუმცა, არის ასეთი უბანი _ ოქროს მუხურო და იქ არ გვაქვს გზა. მე ხშირად ვსაუბრობ მუნიციპალიტეტის მერთან,  შარაშენიძესთან. ის ყველანაირი პრობლემის საქმის კურსშია  და დახმარებასაც გვპირდება სულ, თუმცა, თქვენ, ხელისუფლების წარმომადგენლებმა იქონიეთ მეტი კომუნიკაცია ხალხთან. არის დაგროვილი,  ფეთქებადი ინფორმაციები, ფეთქებადი პრობლემებია და ხშირად შემოდით სოფლებში. ვიმეორებ, კარგია, რომ მოხვედით და  ხშირად მობრძანდით, _ თქვა მან.

გია ვოლსკიმ, როგორც ყველა შეხვედრისას, აქაც განმარტა, რომ მოსული არიან ინფორმაციის შესაგროვებლად, რა პრობლემები არსებობს, რომ შემდეგ კლასიფიცირებულად მოხდეს მისი დალაგება და გადაჭრა.

გარემოს დაცვისა და სოფლის მეურნეობის სამინისტროს, სურსათის და სოფლის განვითარების დეპარტამენტის ხელმძღვანელმა  თენგიზ კალანდაძემ ვრცლად ისაუბრა მოცვის გაშენების მიმდინარე პროექტზე:

_ ჩვენ დავიწყეთ მცირემიწიანი გლეხების დახმარება. შევიმუშავეთ სპეციალური პროგრამა, რაც ასპროცენტიან დახმარებას გულისხმობს. დაწყებულია პროცესი კენკროვანი კულტურების გასაშენებლად. დარგვა იწყება ნოემბერში და შეგიძლიათ, მიმართოთ საკონსულტაციო სამსახურებს. თქვენი იქნება მხოლოდ მიწა და შრომა! ერთ ჰა ფართობზე მოცვის მოსავალი ათი ტონაა. კილოგრამის ფასი კი 10 ლარია. უახლოეს ათ წელიწადში, გპირდებით, მოცვის გასაღებაზე არ იქნება პრობლემა. რუსეთიც კი დაინტერესებულია და ითხოვს ევროპული სტანდარტებით ამ პროდუქციის მიღებას, გასაღებაში სახელმწიფო დაგეხმარებათ. ადგილზე მოვა მყიდველი, _ თქვა მან.

ადგილობრივების გამოსვლებში, მიუხედავად ერთეულთა სურვილისა, მოცვის გაშენების მიმართ დიდი სიხალისე არ იგრძნობა და ხალხი უფრო ჩაის რეაბილიტაციასა და თხილის შესაწამლი პრეპარატების შესაძენად ითხოვს ზუსტად ისეთივე თანადგომას, როგორსაც ხელისუფლება მოცვის გაშენებისთვის სთავაზობს, თუმცა, ამაზე დადებით პასუხს ვერ იღებენ.

სოფლებში შეხვედრისას ორიგინალურ მადლობასაც არ იშურებდნენ ადამიანები. მაგალითად, სოფელ ლიხაურის მკვიდრმა ლამზირა ვასაძემ პარლამენტარებს მადლობა ასე გადაუხადა:

_ 66 წელია, ასეთი კარგი და მზრუნველი ხელისუფლება არ მომსწრებია. ყველაფერი ერთად არ იქნება. უამრავი რამ გაკეთდა და მეტის იმედი მაქვს, კიდევ გააკეთებთ,  ღმერთმა გაგახაროთ, _ თქვა მან, რაზეც გია ვოლსკიმ უთხრა, რომ მხოლოდ პრობლემების შესახებ ესაუბრა:

_ პრობლემებზე მესაუბრეთ, აქ ჩვენ  არ ვართ მოსული მადლობის მოსასმენად, _ უთხრა პარლამენტარმა.

შეხვედრების დროს,  იყო ასეთი მომენტებიც _ გია ვოლსკის, ოზურგეთის საკრებულოს თავმჯდომარის დათო დარჩიას და “ქართული ოცნების” რაიონული ორგანიზაციის თავმჯდომარის მერაბ ჭანუყვაძის განცალკევებულ საუბარს, შორიახლო აკვირდებოდა ოზურგეთის მუნიციპალიტეტის მერი, რაც კრების მონაწილეთა თვალს არ გამოპარვია.