თამაზ სომხიშვილი – ეს სახელი ალბათ ძალიან ცოტა ადამიანს თუ ეუბნება რამეს. არადა, იგი ერთ–ერთი ყველაზე მდიდარი ქართველია და სხვადასხვა წყაროების მიხედვით მისი ქონება 1 მილიარდ დოლარსაც კი შეადგენს. თუმცა, იგი მუდმივად ჩრდილში დგომას ამჯობინებს და ქართულ თუ რუსულ საინფორმაციო წყაროებში მის შესახებ საკმაოდ მწირი ინფორმაცია იძებნება. სომხიშვილის სახელი ბოლო პერიოდში რამდენჯერმე გაჟღერდა ქართულ მედიაში, რისი ერთ–ერთი მიზეზიც წყნეთში მშენებარე სასახლეა.
შთამბეჭდავი სასახლე წყნეთში სახლს, რომელიც რეალურად სასახლეს უფრო ჰგავს, სამშენებლო კომპანია „ანაგი” აშენებს. სასახლის საერთო ფართი, პროექტის მიხედვით, 1850 კვადრატული მეტრი იქნება. თუმცა, ორსართულიანი ვილა, დაახლოებით, 10 ათას კვადრატულ მეტრზე იქნება განთავსებული.
პროექტის მიხედვით მშენებლობა 2019 წლის მარტში უნდა დასრულდეს, თუმცა იქვე აღნიშნულია, რომ ამ ეტაპზე მიმდინარეობს მონოლითური რკინაბეტონის მზიდი კარკასის მოწყობის სამუშაოები. შესაბამისად, მოსალოდნელია, რომ დასრულების თარიღი გადავადდა. თუმცა, ამის შესახებ, ზუსტი ინფორმაციის მოძიება შეუძლებელია, რადგან სამშენებლო კომპანია „ანაგში” აცხადებენ, რომ ინფორმაცია გასაიდუმლოებულია და ყველა გადაწყვეტილება დამკვეთზეა დამოკიდებული.
მშენებარე საზაფხულო რეზიდენცია დაბა წყნეთში, ყოფილი სამთავრობო აგარაკების ტერიტორიაზე მდებარეობს. როგორც ცნობილია, თამაზ სომხიშვილმა 8 226 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული რამდენიმე შენობა-ნაგებობა პირდაპირი მიყიდვის ფორმით 4 288 320 ლარად შეიძინა. წყნეთში თამაზ სომხიშვილი ჯამში 5 ნაკვეთს ფლობს, რომლებიც ერთიანად 29 958 მ2 ფართობის ტეროტორიას ქმნის.
პროექტის ავტორი ალექსანდრ ლეონოვია. ეს უკანასკნელი გახლავთ უკრაინული კომპანია „ლეონოვ არქიტექტსის” წარმომადგენელი. სასახლე ორსართულიანია, მართკუთხა ფორმით და რამდენიმე შესასვლელი აქვს. მთავარი შესასვლელი სამხრეთ ფასადის მხრიდან აქვს, ასევე, ორი ტექნიკური შესასვლელი აღმოსავლეთი მხრიდან: ერთი – ცოკოლის სართულის დონეზე – მომსახურე პერსონალისთვის; მეორე – პირველი სართულის დონეზე – სახლის მცხოვრებლებისთვის. შენობას კიდევ ერთი გასასვლელი აუზის შენობიდან აქვს, რომელიც უშუალოდ აუზიდან ეზოს შიდა ტერასებზე გასვლისათვისაა გათვალისწინებული.
პირველი სართული განკუთვნილია გართობისთვის – გარდერობის ოთახი, წარმომადგენლობითი დარბაზები, კაბინეტი, საბილიარდო, შემოქმედებით სტუდია, სამზარეულო, საოჯახო სასტუმრო ოთახი, ტერასა საუზმისთვის. ეზოს მხრიდან ფართო ტერასაა მასობრივი ღონისძიებებისთვის.
მეორე სართული კი უფრო მშვიდ დასვენებასა და გართობაზეა ორიენტირებული _ სართულზე დაპროექტებული აპარტამენტები სააბაზანო ოთახით და გარდერობის ოთახით სახლის მფლობელებისთვის; საძინებელი ოთახები ბავშვებისთვის და საცხოვრებელი ოთახები სააბაზანოთი; სამი სასტუმრო ოთახი სანიტარული კვანძებით. სასახლის გარდა, ასევე შენდება ცალკე სახლი მოსამსახურეებისა და დაცვის წევრებისთვის.
რუსეთში ნაშოვნი მილიონები
1957 წელს დაბადებული თამაზ სომხიშვილი ყველაზე მდიდარ ქართველთა შორის მუდმივად სახელდება. სხვადასხვა წყაროს ცნობით, მისი ქონება 700 მილიონიდან 1 მილიარდ დოლარამდეა. თუმცა, ზუსტი ინფორმაცია არ არსებობს და არ არის გამორიცხული მისი ქონება გაცილებით მეტსაც კი შეადგენდეს.
ქართველმა მილიონერმა საქართველო გასული საუკუნის 90-იან წლებში დატოვა და რუსეთში გადავიდა საცხოვრებლად, სადაც სხვადასხვა ბიზნესი წამოიწყო. სომხიშვილი 1995 წელს კომპანია „რუსული ნავთობის ექსპორტის” დამფუძნებლად ფიქსირდება. სომხიშვილის ბიზნესსაქმიანობა ინდუსტრიულ და სამოქალაქო განვითარებას და მიწათმოქმედებას უკავშირდება.
გაკვეულ მედიასაშუალებებში თამაზ სომხიშვილი რუს ბიზნესმენად და 
ინვესტორადაც არის მოხსენიებული, მის ანგარიშზე ბიზნესში აქტიურად ყოფნის 30 წელზე მეტია. მისი ბიზნესსაქმიანობა ძირითადად სოფლის მეურნეობას, ინდუსტრიულ სფეროსა და სამოქალაქო საზოგადოების განვითარებას მოიცავს. თამაზ სომხიშვილი კომპანიებს ფლობს რუსეთში, ევროპასა და საქართველოში. სომხიშვილი ეაფლეინ ტექნიქსის” მთავარი ინვესტორია, რომელიც აფინანსებს სტუდენტურ პროექტს „თს ფონდისა” და გერმანიის საერთაშორისო უნივერსიტეტთან თანამშრომლობით.
ბიზნესები საქართველოში
ბოლო წლებში სომხიშვილის სახელმა ბიზნესსექტორსა თუ საზოგადოებრივ ასპარეზზე რამდენჯერმე გაიჟღერა. 2016 წელს ყოფილმა პრემიერ-მინისტრმა გიორგი კვირიკაშვილმა ქართველ მილიონერს მადლობა გადაუხადა ლონდონში ეკლესიის გამოსყიდვისა და საპატრიარქოსთვის გადაცემისთვის. ცნობისთვის, თამაზ სომხიშვილი გაერთიანებული სამეფოს მოქალაქეცაა.
გავრცელებული ინფორმაციით, სწორედ სომხიშვილის ფინანსური რესურსითაა აშენებული სპორტის სასახლის მიმდებარე ტერიტორიაზე მრავალსართულიანი საცხოვრებელი კორპუსი.
სომხიშვილი საქართველოს სროლის სახეობათა ეროვნული ფედერაციის პრეზიდენტია. ასევე არის საქართველოს ბიზნეს ასოციაციის სამეურვეო საბჭოს წევრი. საჯარო რეესტრის მიხედვით იგი საქართველოს განათლების, მეცნიერებისა და ტექნოლოგიების ფონდის დამფუძნებელი და პრეზიდენტია. ასევე, შპს „თი ეს ჰოლდინგის” მესაკუთრე და პრეზიდენტი.
არსებული ინფორმაციით „თი ეს ჰოლდინგი” საინვესტიციო და დეველოპერთა ბიზნეს ჯგუფია, რომელიც განვითარდა 2015 წელს, თამაზ სომხიშვილის მიერ შექმნილი განათლების, მეცნიერებისა და ტექნოლოგიების განვითარების ფონდის „ხვალინდელი წარმატებისთვის” საფუძველზე და აერთიანებს 20-ზე მეტ ქართულ კომპანიას. „თი ეს ჰოლდინგის” პრეფერენციაა ფლობდეს ბიზნესების დივერსიფიცირებულ ჯგუფს, განგრძობითად შემოსავლისა და ინვესტიციაზე საშუალოზე მაღალი მოგების მიღების მიზნით.
„თი ეს ჰოლდინგის” შვილობილი კომპანიებია:
ტევევიტი – ბიო-ორგანული სასუქი, რომელიც ბიოლოგიურად სუფთა ნედლეულისგან არის წარმოებული.
ბალნეოკურორტი წყალტუბო – ბალნეოკურორტი და წყალტუბოს სამკურნალო წყალი, რომელთა მიკროკლიმატი გამოიყენება ჰიპერტონული დაავადების, ბრონქული ასთმისა და ნევროზების სამკურნალოდ.
TS ფონდი – ფონდი მხარს დაუჭერს უმაღლესი და პროფესიული განათლების სისტემის გაუმჯობესების პროცესს თანამედროვე სასწავლო პროგრამების დანერგვაში დახმარებით, სტუდენტების წახალისებით, სასწავლო ლაბორატორიების განახლებით და ა.შ.
საქართველო-უზბეკეთის ბიზნეს ასოციაცია – ასოციაციის მისიას წარმოადგენს ქართულ და უზბეკურ ბიზნეს სექტორს შორის ღრმა პარტნიორული ურთიერთობის ჩამოყალიბება, ქართული წარმოების პოპულარიზაცია და მისი ექსპორტის ხელშეწყობა უზბეკეთის რესპუბლიკაში.
ინოლაბი – „ინო-ლაბის” ძირითად საქმიანობას წარმოადგენს ინოვაციური ტექნოლოგიებით დამზადებული წყალი „ელექსირი”-ს ჩამოსხმა ტოქსინების გარეშე, რომელიც ეფექტურია ბაქტერიებისა და ვირუსების წინააღმდეგ.
გლობალ სელი – „გლობალ სელი” ყიდის მსოფლიო ქსელში ჩართულ საერთაშორისო სიმ-ბარათებს (ევროპული, ქართული, ბრიტანული და ამერიკული ნომრებით) უფასო ზარებით როუმინგში.
წყარო:bfm.ge
