ლანჩხუთში კოვიდვაქცინაცია დაბალი ტემპით მიმდინარეობს. ამის შესახებ “გურია ნიუსს” ლანჩხუთის საზოგადოებრივი ჯანდაცვის ცენტრის ხელმძღვანელმა ნატო მენაღარიშვილმა განუცხადა.
“ლანჩხუთში, ბოლოს, 17 ივნისს გაკეთდა 2 აცრა ფაიზერით. ამის მერე ვაქცინის გასაკეთებლად არავინ მოსულა. ამ ეტაპზე, ძირითადად, ის ადამიანები იკეთებენ ვაქცინას, ვისაც საზღვარგარეთ წასასვლელად სჭირდება, რომ აცრილი იყოს ან ისეთები მოდიან ასაცრელად, ვისაც მართლა შეგნება აქვს და დაწყებული აცრები უნდა რომ დაასრულოს”,_ ამბობს მენაღარიშვილი.
ჯანდაცვის უწყება ვაქცინაციის შესახებ მოსახლეობის ცნობიერების ამაღლების მიზნით ზომების მიღებას გეგმავს.
მენაღარიშვილის თქმით, ჩატარდა ტრენინგები ჯანდაცვის სფეროს წარმომადგენლებისთვის.
“მიმდინარეობს მზადება, რომ მოსახლეობის შეგნებამდე დავიყვანით ვაქცინაციის აუცილებლობა, კონკრეტული ნაბიჯის შესახებ ალბათ უწყება განაცხადებს”,_ ამბობს მენაღარიშვილი.
ლანჩხუთის მსგავსად კოვიდვაქცინაციის პროცესი ოზურგეთშიც და ჩოხატაურშიც დაბალი ტემპით მიმდინარეობს. ჯანდაცვის სფეროს ექსპერტები კი ზაფხულოს ბოლოს ეპიდვითარების გაუარესებას პროგნოზირებენ.
ოზურგეთის საზოგადოებრივი ჯანდაცვის ცენტრის ეპიდემიოლოგი ელზა სიმონიშვილი ჩვენთან საუბრისას განმარტავს, მოსახლეობის დიდი ნაწილის იმუნიტეტი დაქვეითებულია.
“რაც შეეხება ვაქცინაციას, ტემპი დაბალია, მოსახლეობის იმუნიტეტი კი დაქვეითებული, რადგან გასულია გარკვეული დრო აცრილი მოსახლოების მიერ ბოლო აცრის გაკეთებიდან, გარდა ამისა, არსებობს კატეგორია, რომელიც საერთოდ არ აცრილა, კიდევ ერთი კატეგორიაა, რომელმაც გადაიტანა კორონავირუსი, მაგრამ ამ გადატანიდანაც გასულია გარკვეული პერიოდი, შესაბამისად, ეს არ გახლავთ მყარი იმუნიტეტი, ამიტომ ორგანიზმს სჭირდება ახალი დოზებით გააქტიურება. შესაბამისად, ჯანდაცვის ცენტრი არის საქმის კურსში და დაწყებული აქვს იმ რისკჯგუფების მოძიება და გეგმის დასახვა, რომ ზაფხულის ბოლომდე შევძლოთ იმ ფენების მოცვა, რომელიც საჭიროებს იმუნიტეტის გაძლიერებას, რომ თავიდან ავიცილოთ სიტუაციის გაუარესება”,_ ამბობს სიმონიშვილი.
ავტორი
