სასურსათო მაღაზიები, კვების ობიექტები, საცხობები, სკვერი _ ეს ის ადგილებია, სადაც ლანჩხუთში, დღის ნებისმიერ მონაკვეთში, ჯგუფურად მოსიარულე მიუსაფარ ძაღლებს შეხვდებით, რადგან აქ ასეთ ცხოველებს ყველაზე მეტად აწვდიან საკვებს.
მოქალაქეები ამბობენ, რომ ქუჩის მიუსაფარი ძაღლები მათთვის საფრთხეს წარმოადგენენ, აშინებენ გამვლელებს და ზოგჯერ თავს ესხმიან კიდეც.
მართალია, ლანჩხუთში ასეთი ძაღლების შესახებ ოფიციალური სტატისტიკა არ არსებობს, თუმცა, მოქალაქეთა ინფორმაციით, მათი რაოდენობა წლიდან წლამდე იზრდება.
“ამ ქალაქს პატრონი არ ჰყავს _ ღამე ქუჩაში ვერ გამივლია. რამე მოუხერხეთ ამ მაწანწალა ძაღლებს. ამას წინათ პარკიდან “საქართველოს ბანკამდე” მდია. შევვარდი შენობაში და ჩავიკეტე. ტაქსი გამოვიძახე და ისე წავედი. ყურადღება მიაქციეთ ამ საკითხს”, _ წერს სოციალურ ქსელში ნიკო შველიძე.
თუმცა, ის ერთადერთი არაა, ვინც ლანჩხუთში მიუსაფარი ძაღლების მიერ გამოწვეული პრობლემის მოგვარებას ითხოვს _ როგორც “გურია ნიუსმა” მოქალაქეებთან გასაუბრების შედეგად გაარკვია, ქუჩის ძაღლების თემა, განსაკუთრებით, ქალაქის ცენტრალური ნაწილისა და რკინიგზის სადგურის მიმდებარე ტერიტორიის მცხოვრებლებს აწუხებთ.
“მართლაც ძალიან შეწუხებულები ვართ ამ ძაღლების გამო. ვიღაც უგულომ თავიდან მოიშორა და სულ არ ადარდებს სხვების ამბავი. ეზოში ქათამი ვერ გაგვიშვია თავისუფლად _ ჭამენ ეს ძაღლები. ქუჩაში გამვლელებსაც დაესხნენ თავს და დაკბინეს. რაღაც გამოსავალი ხომ უნდა მოიძებნოს, რომ ასე ერთ წრეზე არ ვიტრიალოთ?! მიჰყავთ, კასტრაციას უკეთებენ, თანხები იხარჯება, თუმცა, უპატრონო ძაღლების რაოდენობა მაინც იზრდება”.
ის, რომ ლანჩხუთის ქუჩებში მიუსაფარი ძაღლების სიმრავლეა, არ უარყოფენ ადგილობრივ ხელისუფლებაშიც. თუმცა, იმასაც დასძენენ, რომ მთავარი პრობლემა საზოგადოებაშია, რომელიც ხელს უწყობს ქუჩის ძაღლთა რაოდენობის ზრდას:
“ბიუჯეტიდან გამოყოფილია გარკვეული რაოდენობის თანხა, რომლითაც ხდება ცხოველების თავშესაფარში გადაყვანა და ქუჩის ყველა ძაღლის კასტრაცია. ამ დროს კი საუბარია იმაზე, რომ უპატრონო ძაღლების რაოდენობა იზრდება. შეუძლებელია კასტრირებული ქუჩის ძაღლები მრავლდებოდნენ. მთავარი პრობლემა ის მიდგომაა, რაც ადამიანებს შინაური ცხოველების მიმართ აქვთ _ აჰყავთ ძაღლები, აჯვარებენ, მერე ლეკვებს ქუჩაში ყრიან ან ძაღლი აღარ უნდათ და თავიდან იშორებენ”, _ ამბობენ მერიაში.
როგორც ირკვევა, ლანჩხუთის მუნიციპალიტეტის მასშტაბით მიუსაფარი ძაღლების პრობლემის მოგვარება ა(ა)იპ “კეთილმოწყობისა და მომსახურების ცენტრის” პრეროგატივაა, რისთვისაც აღნიშნულ სამსახურს ხელშეკრულება აქვს გაფორმებული ოზურგეთის შესაბამის უწყებასთან. სწორედ მათ მიერ ხორციელდება, წლიდან წლამდე მოსახლეობის უსაფრთხოების დაცვის მიზნით, მუნიციპალიტეტის ადმინისტრაციული ერთეულებიდან მიუსაფარი ძაღლების თავშესაფარში გადაყვანა. როგორც წლის მთავარი საფინანსო დოკუმენტიდან ირკვევა, საამისოდ 2020 წლის ბიუჯეტში 10 ათასი ლარია გაწერილი. ამ თანხით ეტაპობრივად უნდა ხდებოდეს ცხოველთა თავშესაფარში გადაყვანა.
“გურია ნიუსი” შეეცდება, გაარკვიოს, რომელ თავშესაფარში გადაჰყავთ მიტოვებული ძაღლები.
