დღეს დილით, ოზურგეთში, გოგებაშვილის ქუჩის ბოლოში მოსახლეობის წარმომადგენლებმა აქცია გამართეს. როგორც აქციის მონაწილეები ამბობენ, გოგებაშვილისა და ბარათაშვილის ქუჩის კვეთაზე, ბოლო რვა წლის განმავლობაში ითხოვენ დაზიანებული წყალსადენი მილის გაკეთებას. მათივე თქმით, რომელიც დაზიანებულია და ადგილზე სულ ტბა დგას. იქვეა საკანალიზაციო ჭა, რომელიც ხშირად იჭედება. მერე ფეკალური მასა და სასმელი წყალი ერთმანეთს ერევა და ხალხი ამ წყალს სვამს ისე, რომ არც კი იცის.
_ მიწაში გვერდი-გვერდ მყოფი ამ ორი კომუნიკაციის _ სასმელი წყლის მილის დაზიანება და კანალიზაციის ჭის ზოგჯერ გაჭედვა იწვევს ერთმანეთში არევას. წვიმიან ამინდში უფრო დიდი გუბეები დგება. ეს მუდმივად ასეა. აქვეა საკანალიზაციო ჭა, რომელიც სულ არა, მაგრამ არის შემთხვევები, იჭედება. გადმოსული ბინძური მასა კი სწორედ აქვე გახეთქილი მილიდან გამომდინარე წყალს ერევა. ადვილი მისახვედრია, ეს სიბინძურე ხვდება წყლის მილში და ნახევარი ქალაქი ხშირად ასე საშიშ წყალს სვამს. გასულ წელს ორჯერ მივმართეთ მუნიციპალიტეტის მერიას. ბოლოს ოქტომბერში შევიტანეთ განცხადება. მუნიციპალიტეტის მერი, შარაშენიძე შეგვპირდა, რომ დაგვეხმარებოდა საკითხის მოგვარებაში და დაავალებდა სერვისცენტრს საკითხის მოწესრიგებას. მერე გადავამოწმეთ და ვნახეთ, რომ სერვისცენტრში ეს განცხადება ოპერატიულად იყო გადაგზავნილი, თუმცა, არანაირი რეაგირება არ ყოფილა. შეგვპირდნენ მხოლოდ, გაგიკეთებთო, მეტი არაფერი, _ გვეუბნება გოგებაშვილის ქუჩის მცხოვრები ზაურ რუსიეშვილი.
_ რას გააკეთებენ? ერთხელ მოიტანეს და პირდაპირ ასფალტი ჩაასხეს შიგ. ცოტა ხანს იყო ასე, მერე კი ამოხეთქა ისევ. ახლა ვინც არის სერვისცენტრის უფროსი, დაპირება იცის, მეტი არაფერი. ამდენი წელი ვწვალობთ. ახლა გადავკეტეთ ეს ქუჩა, აგერ დავაწყვეთ „ბიტონები“, მოვიდნენ და ნახონ, _ ერთმანეთს არ აცლიდნენ საუბარს აქციის მონაწილეები.
აქციის მონაწილეებთან მალე მოვიდნენ ოზურგეთი-ჩოხატაური-ლანჩხუთის წყალმომარაგების გაერთიანებული სერვისცენტრის უფროსი დავით ცერცვაძე, რომელმაც განაცხადა, რომ ჯერ დანიშნული არ არის ამ თანამდებობაზე. თუმცა, მისი დანიშვნის შესახებ ინფორმაცია ოფიციალურად ერთი კვირის წინ გავრცელდა.
ასევე ადგილზე მივიდა ახლანდელი თუ უკვე გათავისუფლებული უფროსი გიორგი ჩხაიძე, რომელმაც, ასევე, განაცხადა, რომ მიდის და მალე ახალმა ხელმძღვანელმა უნდა გააკეთოს ეს საქმე:
_ აგერ არის კაცი, რომელიც აწი იქნება თქვენი უფროსი. ხომ იძახით, შენ ვერ აკეთებო და შენი არ გვჯერაო, ეს გააკეთებს, _ მიუთითა ჩხაიძემ დავით ცერცვაძეზე, _ მე გითხარით, ამინდი როგორც კი გამოვა, დავიწყებთ-მეთქი… _ მიმართა მან აქციის მონაწილეებს.
_ბატონო გიორგი, ეს ადამიანები ამბობენ, რომ ნოემბერში მიმართეს მერიას და განცხადებაც ოპერატიულად გადმოგეგზავნათ. ნოემბრის მერე ამინდი ვერ შეარჩიეთ? არ გამოიდარა?
_იცით, რაშია საქმე. აქ ბევრი კომუნიკაციაა _ ქსელები, ფოსტა, გაზგაყვანილობა. აწი გაკეთდება. ყველაფერ ამას შეთანხმება უნდა, სათითაოდ უნდა შეათანხმო ყველა სამსახურთან, რომ მუშაობა დავიწყოთ.
_ აქამდე რატომ ვერ მოახერხეთ ეს?
ამჯერად ჩხაიძემ არ უპასუხა „გურია ნიუსის“ კითხვას.
თითქმის იგივე გაიმეორა დავით ცერცვაძემ:
_ ჯერ მე დანიშნული არ ვარ. თუმცა, დღესვე მაინც არ დაიწყება ამის გაკეთება, რადგან ყველასთან შეთანხმებაა საჭირო. ხედავთ აგერ, „დენის კიოსკი“ დგას. მიწის ქვეშ არის წყლის, კანალიზაციის, ფოსტის კომუნიკაციები. ერთადაა თავმოყრილი ყველაფერი ეს ამ გზაჯვარედინზე. ამას კი დრო სჭირდება. მე რა გითხრათ? ჯერ დანიშნული არ ვარ, _ არაერთხელ გაიმეორა ცერცვაძემ.
გოგებაშვილის ქუჩის მცხოვრებმა ალიკა კოსტავამ საყვედურით მიმართა სერვისცენტრის ახლანდელ ხელმძღვანელს, გიორგი ჩხაიძეს:
_ კავსაძის არ იყოს, გვეშველება რამე? რა გააკეთე, სულ გვატყუებ. არ გვჯერა ამ კაცის. წავიდეს და თუ არავინ ახალიც არაა დანიშნული, მაშინ ჩვენ _ ხალხი გადავწყვეტთ, რა როგორ უნდა გაკეთდეს, _ თქვა მან.
„გურია ნიუსი“ ოზურგეთის მუნიციპალიტეტის მერიას დაუკავშირდა. პრესსამსახურიდან მოგვაწოდეს ინფორმაცია, რომ გოგებაშვილის ქუჩის მცხოვრებთა განცხადების მიღებისთანავე, აღნიშნული წყალგაყვანილობის მილის შეკეთების თაობაზე, მიმართა გაერთიანებული სერვისცენტრის დირექტორს, გიორგი ჩხაიძეს, რომ გაეთვალისწინებინა მოსახლეობის ინტერესები და დაეწყოთ მილის შეკეთების სამუშაოები.
დღეის მდგომარეობით, როგორც აქციაზე გამოჩნდა, თუ სერვისცენტრის ხელმძღვანელი არ დაინიშნა (და ეს მალე მოხდება, როგორც თავად ცერცვაძემ გვითხრა), აღნიშნული პრობლემა ერთ და ორ დღეში ვერ გადაწყდება.
„გურია ნიუსი“ დააკვირდება პრობლემის მოგვარების პროცესს.
