მოსახლეობა სასაფლაოსთან მისასვლელი გზების შეკეთებას ითხოვს

ქალაქ ოზურგეთში, ე.წ. “მოიდანახეს” სასაფლაოსთან  გორკისა და ინგოროყვას ქუჩები მიდის. ორივე ქუჩა იმდენად დაზიანებულია, რომ როგორც ოზურგეთელები ამბობენ, მიცვალებული მანქანიდან უვარდებათ.

_ აქ გავლა პრაქტიკულად შეუძლებელია. ყოველ სანტიმეტრში ორმოა. წვიმის დრო ყველგან წყალი დგას, დარში კი კარ-ფანჯარას ვერ ვაღებთ _ მტვრით ივსება ყველაფერი, _ აღნიშნავენ “გურია ნიუსთან” საუბრისას გორკისა და ინგოროყვას ქუჩაზე მცხოვრებნი.

მათივე  თქმით, ამ ქუჩებით პრაქტიკულად მთელი ოზურგეთი სარგებლობს, რადგან ქალაქის სასაფლაოზე მისასვლელი სხვა გზა არ არსებობს:

_  ერთობლივი განცხადებით მივმართეთ მერიას, თუმცა, პრობლემის მოგვარება ამ დრომდე ვერ მოხერხდა, _ ამბობენ ადგილობრივები.

ქალაქ ოზურგეთის მერი ბეგლარ სიორიძე ამბობს, რომ პრობლემის შესახებ საქმის კურსშია და მერიას ორივე ქუჩის პროექტი უკვე მზად აქვს.

მისი თქმით,  გორკისა და ინგოროყვას ქუჩებზე ასფალტო-ბეტონის საფარის მოსაწყობად სახარჯთაღრიცხვო-საპროექტო დოკუმენტაცია მზადაა _ ორივე ქუჩის მოასფალტებისთვის 161 134 ლარია საჭირო:

_ საგზაო ინფრასტრუქტურის მოწესრიგება ქალაქ ოზურგეთის მერიის ერთ-ერთი მთავარი პრიორიტეტია, თუმცა, ყველა ქუჩის ერთდროულად მოწესრიგება, არასაკმარისი ფინანსების გამო, წარმოუდგენელია. ჩვენ აქტიურად ვთანამშრომლობთ ინფრასტრუქტურის სამინისტროსთან, სადაც გასაგზავნი პრიორიტეტების ნუსხა უკვე გაკეთებული გვაქვს და მასში აღნიშნული გზების მოასფალტების სამუშაოებიცაა შესული, _ აღნიშნა ჩვენთან საუბრისას ბეგლარ სიორიძემ.

რეგიონული განვითარებისა და ინფრასტრუქტურის სამინისტროში “გურია ნიუსთან” საუბრისას აღნიშნეს, რომ მუნიციპალიტეტებს პროექტების გასახორციელებლად თანხები პრიორიტეტების დოკუმენტის, მოსახლეობის საჭიროების გათვალისწინების შესაბამისად  ეძლევათ:

_ რაც შეეხება ამ კონკრეტულ შემთხვევას, როგორც კი სამინისტროში შემოვა  პრიორიტეტების დოკუმენტი, რომელშიც აღნიშნული ქუჩების მოასფალტების აუცილებლობაც იქნება შესული, მოხდება თანხების მოძიება და დაფინანსება. ჩვენთვის, მოსახლეობის ინტერესი ყველაზე მნიშვნელოვანია და მაქსიმალურად ვცდილობთ მათი მოთხოვნა პირველ რიგში დავაკმაყოფილოთ. შესაბამისად, არც ეს თემა დარჩება უყურადღებოდ, _ აღნიშნა ჩვენთან საუბრისას რეგიონული განვითარებისა და ინფრასტრუქტურის მინისტრის მოადგილემ კახა გულედანმა.