ოზურგეთის მუნიციპალიტეტის სოფელ კვირიკეთის მოსახლეობა “გურია ნიუსთან” უგზოობას და მდინარე ბჟუჟზე ქვიშა-ხრეშის მოპოვებას აპროტესტებს. მათი თქმით, ქალაქ ოზურგეთიდან სოფელ კვირიკეთის მიმავალი გზა ისეა დაზიანებული, რომ ავტომანქანებს გადაადგილება უჭირთ, განსაკუთრებით, მძიმე სიტუაციაა სოფლის შესასვლელში _ ეკლესიისა და სასაფლაოს მიმდებარე ტერიტორიაზე, სადაც საერთოდ ამორტიზირებულია ცენტრალური სამანქანო გზა. აქვე ცხოვრობს გურიის გუბერნატორის მოადგილე სოსო ერქომაიშვილი.
“გვიხაროდა, გუბერნატორის მოადგილე აქ ცხოვრობს და გზას როგორ არ გააკეთებენო, თუმცა, რამდენი წელი უკვე ასე ვუყურებთ ამ საშინელ სიტუაციას. არჩევნები რომ იყო, კარდაკარ დადიოდნენ ხმები მოგვეცითო, მერე არავის გავხსენებივართ,”_ ამბობენ აქ მცხოვრებლები “გურია ნიუსთან”.
კვირიკეთის მოსახლეობა უგზოობასთან ერთად, უფრო დიდი პრობლემის წინაშე დგას _ მდინარე ბჟუჟმა, რომელმაც კალაპოტი შეიცვალა, მათ ნაწილს საყანე ფართობები და გაშენებული სათხილეები წაართვა, ნაწილს კი საშიშროება ემუქრება. მოსახლეობა გულისტკივილით აღნიშნავს, რომ თუ ხელისუფლება ყურად არ იღებს მათ თხოვნას, რომ შეწყვიტონ ხრეშის მოპოვება, ისინი მიმართავენ პროტესტის უკიდურეს ზომებს და ცენტრალურ გზას გადაკეტავენ:
ჩიტო ლომთათიძე: “ერთ-ერთი მწვავე პრობლემა მდინარე ბჟუჟიდან ქვიშა-ხრეშის ამოღებაა. ვის არ მივმართეთ _ ოზურგეთის მუნიციპალიტეტს, ქალაქის მერიას, ყველა ჩართულია ამ საქმეში და ერთმანეთს აბრალებენ, ჩვენ არ გვეხება ეს საკითხიო. საქმეში ჩართულია გარემოს დაცვის დეპარტამენტიც. ამბობენ, რომ ლიცენზიაა გაცემული და კანონიერად ხდება ხრეშის ამოღება. თუ შეიძლება მდინარეს, რომელიც სათავეს მთიდან იღებს, შეუცვალო მიმართულება და მოსახლეობისკენ გამოუშვა?! ერთეულები უნდა გამდიდრდნენ, ჩვენ, 50 ოჯახი კი წყალმა უნდა წაგვლეკოს?! არის თუ არა ეს ხალხის აბუჩად აგდება? საძოვრები, სათხილეები მიაქვს წყალს.
დაგვეხმარეთ, გადაგვარჩინეთ წალეკვისგან. სამ ოჯახს კატასტროფა ელოდება, 1000 კვადრატული მეტრი სათხილე, სადაც ტონა თხილი მოდის, ჩემს თვალწინ მიაქვს წყალს, გაანადგურა საყანე ფართობები.
ვინ აგვინაზღაურებს ზარალს?! კატეგორიულად ვთხოვთ ხელისუფლებას, შეაჩეროს ეს პროცესი.
მეორე პრობლემა უგზოობაა _ ყველა თვეში გვპირდებიან, რომ მოაწესრიგებენ გზას. ქალაქის მერია ამბობს, ჩვენ არ გვეკუთვნისო. ეკლესიამდე გზა ხომ ეკუთვნის ქალაქს? ერთმანეთს ეჯიბრებიან!
წინასაარჩევნოდ კარდაკარ დადიოდნენ, ხმას ხომ მოგვცემთ, გზას გაგიკეთებთო. ახლა ვის აინტერესებს, შენი მიწა წყალს თუ მიაქვს?! გუბერნატორის მოადგილე ცხოვრობს აქვე, შემოსასვლელში და მისი სახლის წინ რა მდგომარეობაა, ნახეთ _ მისი ჭიშკრის წინ ვერ გაუკეთებია გზა და ჩვენ გაგვიკეთებს რამეს?”
მერაბ შათირიშვილი: “1000 კვადრატული მეტრი საყანე ფართობი წაიღო მდინარემ და კიდევ წაიღებს 1000 მეტრს ახლა. რა ვქნა, აღარ ვიცი!”
დალი მელუა: “გზა გვაქვს ცუდი; მდინარე შემოსულია ჩვენს საყანე ფართობებში. წაიღებს საყანეებს და მერე შემოვარდება ეზოებში.”
მაყვალა შავიძე: “ძალიან ცუდ მდგომარეობაში ვართ _ ყურადღებას არავინ გვაქცევს. გაწვიმდება და გზაზე ვერ გაივლი. ადრე “ჩააკერებდნენ” მაინც, ახლა ამასაც არ აკეთებენ”.
იური კუმბერაშვილი: “ტაქსისტი ვარ, ყველა სოფელი მაქვს შემოვლილი და ასეთი საშინელი გზა არსად არ იქნება! ისე ხმაურობენ ეს მანქანები, ყურები დაგვისკდა. ძალიან გვიჭირს, ბავშვები გვყავს. შეაჩერეთ ეს პროცესი, გთხოვთ”.
ლონგინოზ გუნთაიშვილი: “დაგვპირდნენ არჩევნებზე და მერე აღარ მოხრეშეს, ასფალტს ვინ დაგვიგებს, ხრეში არ მოგვიტანეს!”
აღნიშნულთან დაკავშირებით ოზურგეთის მუნიციპალიტეტის გამგეობაში ასეთ კომენტარს აკეთებენ:
“ოზურგეთის მუნიციპალიტეტი მოკლებულია კარიერებზე ლიცენზიის გაცემის შესაძლებლობას. ეს გარემოს დაცვის ეროვნული სააგენტოს უფლებამოსილებაა. მძიმეწონიანი სატვირთო ავტომანქანები გადაადგილდებიან მდინარის მიმდებარე ტერიტორიაზე და არ სარგებლობენ შიდა სასოფლო გზებით. რაც შეეხება სოფელ კვირიკეთში დაზიანებულ შიდა გზას, მიმდინარე წლის განმავლობაში ადგილობრივი ბიუჯეტის სახსრებით იგეგმება საუბნო გზების აღდგენა-რეაბილიტაცია”.
ქალაქ ოზურგეთის მერიაში აღნიშნავენ, რომ თავისუფლების ქუჩის რეაბილიტაცია, ჩასმულია ადგილობრივი ბიუჯეტიდან დასაფინანსებელი პროექტების ნუსხაში და ზაფხულში სამუშაოები დასრულებული იქნება.
