მიმდინარე წლის დასაწყისში საქართველოს საფეხბურთო ნაკრები მთავარი მწვრთნელის გარეშე გახლდათ. ახლოვდებოდა მსოფლიო პირველობის შესარჩევი შეხვედრები, გუნდი კი კვლავ მთავარი მესაჭის გარეშე იყო. საბოლოოდ, ქართველთა უპირველესი კრებული ფრანგმა ვილი სანიოლმა ჩაიბარა, დებიუტის კვალობაზე თავიც გამოიჩინა და სრულიად საქართველოს გარკვეული იმედი გაუჩინა.
გამოხდა ხანი და ქართული „ტრადიცია“ კვლავ გაგრძელდა _ რამდენიმე შეხვედრის ასე თუ ისე ნორმალურად ჩატარებას, უილაჯო და სუსტი გამოსვლები მოჰყვა. მარცხიც არის და მარცხიც _ ბურთი მრგვალია და ფორტუნა ყოველთვის შენს მხარეზე ვერ იქნება, მაგრამ ფეხბურთელს ის ხომ უნდა შეეძლოს, რომ დამარცხების მიუხედავად, მოედანზე ბრძოლაში თავი დადოს. სამწუხაროდ, ჩვენებური „სანაკრებო მობურთალები“ მინდორზე ვალის მოსახდელად გამოდიან. ეს მწარე რეალობაა, მაგრამ ამას გვერდს ვერ ავუქცევთ.
რასაკვირველია, ქართული „საფეხბურთო რეგრესის“ მთავარი დამნაშავენი თავად მოთამაშეები არიან, თუმცა, საკუთარი „მნიშვნელოვანი წვლილი“ მუსიე ვილი სანიოლსაც მიუძღვის _ ევროპაში წლობით ნამოღვაწარი სასტიკ გაუგებრობაში მოხვდა და „ქართული საფეხბურთო“ მენტალიტეტისა და ჭაობისაგან გამოსავლის ძებნას ამაოდ და უშედეგოდ ცდილობს.
საქართველოს ეროვნული გუნდის არსებობის ისტორიას რომ გადავხედოთ, ერთ კანონზომიერებას აღმოვაჩენთ. თუ გინდა, საკუთარი რეპუტაცია და სახელი სამუდამოდ დაასამარო, საქართველოს ნაკრები უნდა ჩაიბარო.
ვილი სანიოლი, ალბათ, მალე გუდა-ნაბადს აიკრავს და დაგვემშვიდობება. გვესახება კი ვინმე მის შემცვლელად? მე რომ მკითხოთ, ეროვნულ გუნდს ამ ეტაპზე ქართველ ფეხბურთის სპეციალისტს ჩავუყენებდი. არ გვინდა ქართველი და აგერ, ბატონო _ ტირასპოლის „შერიფის“ უკრაინელი თავკაცი იური ვერნიდუბი.
გასული წლის დეკემბრის დასაწყისში, როდესაც სლოვაკი ვაისი ახალი წასული იყო, ქართულ სპორტულ მასმედიაში გავრცელდა ცნობა, რომ ფეხბურთის ფედერაციის ჩინოსნები მოლაპარაკებას სწორედ რომ იური ვერნიდუბთან აწარმოებდნენ.
უკრაინული გამოცემა „Футбол газета“-ს ინფორმაციით, თანამდებობაზე, რომელიც ვლადიმირ ვაისის წასვლის შემდეგ ვაკანტური გახდა, ერთ-ერთი პრეტენდენტი უკრაინელი სპეციალისტი იური ვერნიდუბი გახლდათ.
უკრაინული წყაროს ცნობით, საქართველოს ფეხბურთის ფედერაცია ვაისის შემცვლელად რამდენიმე ვარიანტს განიხილავდა, შორტ-ლისტში კი იური ვერნიდუბიც შედიოდა, რომელსაც სხვადასხვა კლუბებში ქართველ ლეგიონერებთანაც უმუშავია. წლების განმავლობაში იყო ჯაბა ლიპარტიას მწვრთნელი „ზორიაში“, ბოლოს კი სოლიგორსკის „შახტარში“ ლაშა შინდაგორიძესა და გიორგი დიასამიძესთან იმუშავა.
ნახევარი საქართველო „ქილიკობდა“ ამ კაცზე. და რა მოხდა შემდეგ? ვერნიდუბი მოლდოვაში წავიდა. ამ ჩვენმა „დაწუნებულმა“ ვერნიდუბმა ტირასპოლის „შერიფით“ ჩემპიონთა ლიგის პირველივე საკვალიფიკაციო ეტაპიდან იარა და დაუსრულებლად იარა… შეიყვანა „შერიფი“ ჩემპიონთა ლიგის ჯგუფში და იქაც განაგრძო სენსაციები _ მოუგო „შახტარს“ და რაც უმთავრესია, მოუგო სტუმრად მადრიდის „რეალსაც“. …და ჩვენმა ახალმა ფრანგმა მწვრთნელმა რა გააკეთა? სულ 1 ქულა აიღო 5 ოფიციალურ შეხვედრაში.
თუ მოლდავურ მასმედიას დავესესხებით, „შერიფში“ იური ვერნიდუბის თვიური ანაზღაურება 20 ათასი ევროა. მეეჭვება, ამ თანხისა და ცოტა მეტის გადახდა საქართველოს ფეხბურთის ფედერაციას არ შეეძლოს.
ასე რომ, აგერ ბურთი და მოედანი. ერთ თვეში მსოფლიო პირველობის მორიგი შესარჩევი რაუნდი ისტორიის კუთვნილება გახდება. ვილი სანიოლი, ალბათ, საბოლოოდ დაგვემშვიდობება და საქართველოსაკენ მოხედვა აღარ მოუნდება. დავუკავშირდეთ იური ვერნიდუბს და კავკასიის ჩვენს ლამაზ ქვეყანაში ჩამოსვლა და მუშაობა შევთავაზოთ.
საქართველოს ნაკრები კი დღეს მორიგ შეხვედრას ჩაატარებს და კოსოვოს ეროვნულ გუნდს სტუმრად დაუპირისპირდება.
გუშინ ნაკრებს გზა შოთა არველაძემ დაულოცა. არველაძემ სოციალურ ქსელში ხვიჩა კვარაცხელიასა და გიორგი ჩაკვეტაძის ფოტოები გამოაქვეყნა. კოსოვოსთან თამაშის წინ მან საქართველოს ნაკრების ორ მთავარ იმედს მიმართა და დაწერა, რომ ამ რთულ პერიოდში მათზე ბევრი რამეა დამოკიდებული.
„რთული პერიოდია და თქვენზე ბევრი რამეა დამოკიდებული. უნდა შეძლოთ!” _ დაწერა შოთამ სოციალურ ქსელში.
საქართველოს ნაკრებს 2022 წლის მსოფლიოს ჩემპიონატის შესარჩევი ეტაპის D ჯგუფში 6 მატჩში ერთადერთი ქულა აქვს მოპოვებული და მხოლოდ 2 გოლი გაიტანა (ორივე ხვიჩა კვარაცხელიამ). ვილი სანიოლის გუნდი თუ კოსოვოსთან გამარჯვებას ვერ მოიპოვებს, ჯგუფში ბოლო ადგილს ოფიციალურად გაიფორმებს.
[sexy_author_bio]
