“მთელი პროკურატურა უნდა დაინტერესდეს მამუკა ბახტაძის საქმიანობით” _ პოლიტოლოგის სკანდალური განცხადება

მთავრობაში დაგეგმილი საკადრო და სტრუქტურული ცვლილებების შედეგად, მინისტრთა კაბინეტს, ჯამში, 6 მინისტრი დაემშვიდობება. უფრო კონკრეტულად, მინისტრის პორტფელს ტოვებს შინაგან საქმეთა მინისტრი გიორგი მღებრიშვილი, განათლების მინისტრი ალექსანდრე ჯეჯელავა, ენერგეტიკის მინისტრი ილია ელოშვილი, სპორტის მინისტრი ტარიელ ხეჩიკაშვილი, გარემოს დაცვის მინისტრი გიგლა აგულაშვილი, ასევე, ევროინტეგრაციის საკითხებში სახელმწიფო მინისტრი ვიქტორ დოლიძე. აღნიშნულიდან რამდენიმე უწყება გაერთიანდება. კერძოდ, უქმდება ენერგეტიკის სამინისტრო და ის ეკონომიკის სამინისტროს უერთდება. ამავე უწყებას შეერწყმება გარემოს დაცვის სამინისტროს ბუნებრივი რესურსების მართვის კომპონენტი.  გაერთიანებულ უწყებას დიმიტრი ქუმსიშვილი უხელმძღვანელებს. რაც შეეხება გარემოს დაცვის სამინისტროს დანარჩენ ნაწილს, ის სოფლის მეურნეობის სამინისტროს დაექვემდებარება. სოფლის მეურნეობის მინისტრად ლევან დავითაშვილი რჩება.  შს მინისტრის თანამდებობაზე გიორგი მღებრიშვილს გიორგი გახარია შეცვლის. ერთ უწყებად ერთიანდება კულტურისა და სპორტისა და ახალგაზრდულ საქმეთა სამინისტროების სპორტის ნაწილი, რომელსაც მიხეილ გიორგაძე უხელმძღვანელებს. რაც შეეხება ახალგაზრდულ საქმეთა ნაწილს, ის განათლების სამინისტროში გადავა, რომელსაც ალექსანდრე ჯეჯელავას ნაცვლად თსუ-ს პრორექტორი მიხეილ ჩხენკელი ჩაიბარებს. უქმდება ევროინტეგრაციის საკითხებში სახელმწიფო მინისტრის აპარატი და აღნიშნული მიმართულება საგარეო საქმეთა სამინისტროს უერთდება. ფინანსთა სამინისტროს მინისტრად კი საქართველოს ყოფილი რკინიგზელთა ხელმძღვანელი მამუკა ბახტაძე დაინიშნა.

სამთავრობო ცვლილებებთან დაკავშირებით ,,გური ნიუსი“  პარლამენტის თავმჯდომარის მოადგილეს  გია ვოლსკის ესაუბრა. მისი განცახდებით, ქვეყანაში არსებული სამთავრობო ცვლილებები ოპტიმატიზაციის საფუძველს იძლევა. მისი თქმით, გარკვეული სტუქტურების გაერთიანება, დარგების გაძლიერებას შეუწყობს ხელს.

„ჩვენ ერთხელ უკვე გავახორციელეთ სერიოზული ცვლილებები ძალოვან სტრუქტურებში , პროკურატურაში, ჯანდაცვის სამინისტროში. ვფიქრობ, ეს ცვლილებები უნდა შეფასდეს მხოლოდ ოპტიმიზაციის ნიშნით. აქ არის სერიოზული გადაწყვეტილებები მიღებული და თითოეული მიმართულება, დარგები საკმაოდ იქნება გაძლიერებული. ეს ის დარგებია, რომელებსაც  სიცოცხლისუნარიანობაზე მნიშვნელოვანი გავლენა აქვთ.  ეკონომიკას გამოვყოფდი, აქ ხდება ძალების მობილიზება, იმ მნიშვნელოვანი პროექტის რეალიზაციისათვის, რომელიც  ქვეყნას  სჭირდება, არა მარტო ეკონომიკური მაჩვენებლების გასაუმჯობესებლად, არამედ განვითარებისათვის, რაც დასაქმების ნიშნულს კიოდევ უფრო გაიზრდის. რაც შეეხება ახალ ფინანსთა მინისტრს,  მამუკა ბახტაძეს პირადად არ ვიცნობ, მაგრამ  მისი მონაცემები, რომელიც წარმოდგენილია და პრემიერმაც ისაუბრა ამის თაობაზე, მაძლევს იმედს, რომ  წარმატებული ფინანსთა მინისტრი იქნება.

განსხვავებული მოსაზრება აქვს პოლიტოლოგ სოსო ცისკარიშვილს. მისი განცხადებით, გაუგებარია, თუ რატომ დაინიშნა ფინანსთა ყოფილი მინისტრი დიმიტრი ქუმსიშვილი ეკონომიკის მინისტრად და  ყოფილი ეკონომიკის მინისტრი შინაგან საქმეთა მინისტრად. როგორც სოსო ცისკარიშვილი აცხადებს, მინისტრების ახალი ტალღა სუფთა არ არის. მისი თქმით, ახლად დანიშნული ფინანსთა მინისტრ მამუკა ბახტაძით სასამართლო სისტემა უნდა დაინტერესდეს.

„გაუგებარია, რატომ უნდა წასულიყო ქუმსიშვილი ეკონომიკის მინისტრად და გახარია მოულოდნელად შინაგან  საქმეთა მინისტრად.  ეს არის ახლი ტალღა ჩვენი ,,კადრთუხუცესისის“ ცნობიერებაში. გახარიას, რომელიც იყო  ბიზნესომბუცმენი, წლების განმავლობაში ვთხოვდით,  მოგვესმინა რომელ ბიზნესმენს აარიდა რაიმე სახის უსამართლობა. ქუმსიშვილის გადასვლა სხვა უწყებაში ნიშნავს, რომ ვიღაცას უნდოდა ფინანსთა მინისტრის თანამდებობა. მამუკა ბახტაძე წლების განმავლობაში საქმიანობდა საქართველოს რკინიგზაში, ყველამ იცის, რა მდგომარეობაა ამ სისტემაში. მთელი პროკურატურა უნდა დაინტერესდეს მამუკა ბახტაძის საქმიანობით. იქ არიან ადამიანები, რომლებიც დირექტორის გარეშე ქმნიან არასასურველ გარემოს. დღეს გვითხრა პრემიერ–მინისტრმა, რომ ის არის ტექნიკურ- მეცნიერებათა დოქტორი. რატომ უნდა იყოს ტექნიკურ-მეცნიერებათა დოქტორი ასეთი მაღალი რანგის ფინანსისტი, რომ იგი გახდეს მინისტრი, ჩემთვის გაუგებარია. ალბათ, ახალი ტალღა მთლად სუფთა არ არის“, _გვითხრა ცისკარიშვილმა.