“უხადადან ოდერამდე” და “ჟამი მიტევებისა”_ ეს მწერალ იოსებ სიბოშვილის წიგნებია, რომლის პრეზენტაციაც 18 სექტემბერს მწერალთა სახლში შედგა.
“უხადადან ოდერამდე” მეორე მსოფლიო ომში ფაშისტური გერმანიის წინააღმდეგ საბჭოთა ხალხის ბრძოლას აღწერს და ცნობილი მზვერავის, ილია ჩადუნელის ხსოვნას ეძღვნება.
ერთი ქართველი ჯარისკაცის მიერ განვლილი გზის აღწერით იოსებ სიბოშვილი მკითხველს სამამულო ომის შესახებ უამბობს.
ბოლო დროს ხშირად ისმის აზრი, რომ მეორე მსოფლიო ომში ქართველ ჯარისკაცთა გმირობა საქართველოს დაცვას კი არ ემსახურებოდა, არამედ დიდი საბჭოთა კავშირისას, რომ ის სხვისი ომი იყო და ა.შ. თუმცა, ფაქტი, რომ ფაშისტთა ძალები კავკასიონამდე იყო მოსული და მათ საქართველოში შემოსვლას რა შედეგი მოყვებოდა, ძნელი წარმოსადგენი არ არის.
წიგნის მთავარი გმირი მრავალ განსაცდელს გაუძლებს, სიკვდილს მრავალჯერ გადარჩება და საქართველოში დაბრუნებული მშობლიურ მიწას ემთხვევა.
ავტორის თქმით, რომანში ასახული მოვლენები რეალურ ფაქტებს ეყრდნობა.
წიგნის რედაქტორმა, მანანა გორგიშვილმა პრეზენტაციაზე სიტყვით გამოსვლისას აღნიშნა, რომ “უხადადან ოდერამდე” პასუხობს იმას, რომ ადამიანები, რომლებიც ჩვენს გვერდით არიან, სიცოცხლეშივე უნდათ დაფასება.
“უხადადან ოდერამდე” არის წიგნი, რომელიც გვაცნობს იმ ადამიანთა ღვაწლს, რომლებიც დღეს ჩვენს გვერდით აღარ არიან. წიგნით არის გადმოცეული, ის რომ სიცოცხლეშივე მოვეფეროთ ჩვენს გვერდით მყოფ მოყვასს. “გიყვარდეს მოყვასი შენი” _ ეს შეგონებაა, რომელიც მუდმივად უნდა იყოს ჩვენში და მუდმივად უნდა ვახორციელებდეთ“,_აღნიშნა გორგიშვილმა.
როგორც “გურია ნიუსთან საუბრისას, სიბოშვილი აღნიშნავს, რომანი მზვერავ ჩადუნელის შესახებ იმიტომ დაწერა, რომ არ სურს დაიკარგოს გმირობა, რომელიც ქართველებმა ფაშისტების წინააღმდეგ ომში ჩაიდინეს.
“წიგნი “უხადადან ოდერამდე” არის ერთ-ერთ მზვერავზე, რომლის არქივის დამუშავების ბედნიერებაც მეღირსა. რადგან მსოფლიო ომის თემა დავიწყებას მიეცა, არ მინდოდა რომ დაკარგულიყო გმირობა, რაც მათ ჩაიდინეს ფაშისტების წინააღმდეგ და გადავწყვიტე, რომ ამომეწია მზვერავ ილია ჩადუნელის სახელი. რომანი წარმოადგენს დოკუმენტურ პროზას, ამიტომ თავისი სახელ-გვარით არ არის მოხსენიებული ილია ჩადუნელი, მაგრამ წინა სიტყვაობაში ეს ასახულია”,_ამბობს სიბოშვილი.
რაც შეეხება რომანს “ჟამი მიტევებისა” მოქმედება მეოცე საუკუნის სამოცდაათიანი წლების ბოლოს ვითარდება. ავტორს მოთხრობილი აქვს იმ დროინდელი საერო და სასულიერო ცხოვრება. მთავარი გმირების, ნიკა და ლიკას მიღმა კი 2-2 ნამდვილი ადამიანი დგას, ვის ვინაობასაც ავტორი შეგნებულად არ ასახელებს, თუმცა, ამბობს, რომ ისინი და ადამიანები, რომლებიც მათ იცნობენ, შეძლებენ რომანისეული პერსონაჟების მიღმა მათ ამოცნობას.
მწერალი მიიჩნევს, რომ ვისაც ერთხელ მაინც განუცდია ჭეშმარიტი სიყვარულის ძალა, მიხვდებოდა, თუ რა დიდი მოფრთხილება სჭირდებას მას. ღმერთი შეყვარებულ ადამიანებზე სხვადასხვა განსაცდელს უშვებს და ვინც გაუძლებს და გაითავისებს მას, ის სამუდამოდ მკვიდრდება უფალში- სიყვარულიდან გადადის ერთგულებაში და ერთგულებიდან მარადისობაში.
როგორც წიგნის რედაქტორი, მანანა გორგიშვილი ამბობს, “ჟამი მიტევებისა” არის რომანი, რომლის წაკითხვის შემდეგაც, ადამიანი სხვა თვალით შეხედავს და აღიქვამს თუ რატომ უნდა იყოს მეტად მორწმუნე.
“მაგალითად, მე ვარ იმ თაობის წარმომადგენელი, რომელიც ათეიზმის ეპოქაში დაიბადა, გაიზარდა და ცხოვრების დიდი ნაწილი განვლო. აქედან გამომდინარე, მიხარია, რომ ბევრი ეკლესიაა, ის რომ ძალიან დიდი მრევლია ყველგან. სამწუხაროდ, არ ვიცი დამეთანხმებით თუ არა, მაგრამ მცირედმორწმუნეობა არის გამეფებული, სამწუხაროდ. ვგულისხმობ, რომ ბოლომდე არ ვართ ისეთი ეკლესიურები, როგორიც უნდა ვიყოთ. ალბათ იმის ბრალია, რომ აკვნიდან როცა იზრდება “მამაო ჩვენოთი” ბავშვი, ის სხვანაირად აღიქვამს, ჩვენმა თაობამ კი სამწუხაროდ, ეს ვერ გაიარა. მინდა ეს წიგნი ყველამ წაიკითხოს, იმიტომ რომ აქ არის ახსნილი რატომ უნდა ვიყოთ მეტად მორწმუნენი, რატომ უნდა ვეზიაროთ ამ ყველაფერს, ეს არის განმარტებული ძალიან კარგად. დარწმუნებული ვარ “ჟამ მიტევებისას” ვინც წაიკითხავს ის უკვე სულ სხვა თვალით შეხედავს ამ ყველაფერს. ვაღიარებ, რომ მე მართლა ასე დამემართა”,_ამბობს გორგიშვილი.
წიგნის ავტორის, იოსებ სიბოშვილის თქმით, რომანში სწორი მართლმადიდებლობის განსაზღვრებებია იმ წმინდა მამების გამოცდილებიდან, რომლებიც დღესაც მოღვაწეობენ საქართველოში.
“როგორი უნდა იყოს ადამიანი, როგორ უნდა იცხოვროს, რა არის მისი მრწამსი, წინაღობა რომ დახვდება როგორ უნდა გადალახოს, ეს ყველაფერი არის აქ ასახული, ამ წიგნში და კი დავამთავრე, მაგრამ დამებადა იდეა, რომ მეორე ნაწილიც დავწერო, ისიც რეალურ ფაქტებზე იქნება. მოქმედება 1970-იან წლებში ხდება, ახალ ნაწილში კი 21-ე საუკუნეში გაგრძელდება მოქმედება”,_ ამბობს სიბოშვილი.
წიგნების ავტორს მწერალთა შემოქმედებითი კავშირის თავმჯდომარემ მაყვალა გონაშვილმა აკაკი წერეთლის პრემია გადასცა და აღნიშნა, რომ ახალგაზრდები ნაწარმოების წაკითხვის შემდეგ მიხვდებიან სად არის თავწყარო სიწმინდისა და წესიერებისა.
“დღესდღეობით ქართველი მწერლების უმეტესობას ჰგონია, რომ თუკი ყველაფერი იკადრა ნაწარმოებში, თუკი რომანში რაც შეიძლება მეტი უზრდელური სიტყვა იხმარა, ეს იმას ნიშნავს, რომ თანამედროვე ევროპელი მწერალია. რატომღაც ევროპელობა დღეს ზოგიერთს ასე ესმის. მიხარია, რომ ბატონა იოსებმა კარგად იცის რა არის სამყარო, ისიც კარგად იცის, რომ ყველა გზა უნდა გაიხსნას რომლიდანაც შუქი შემოდის, მაგრამ ისე რომ არ დაკარგოს ქართველმა კაცმა უმთავრესი, თავისი სულიერი კონსტიტუცია. ის, რაც აქამდე მოდიოდა და ის, რაც გადაარჩენს ქვეყანას, თორემ სამყარო ისეთია, ჩვენი დიდი წინაპარი ბრძანებდა:_ „ბრძენის ურიგოდ ქცევითა ბაძით წახდების ერია.“ დღეს ბაძით წახდომის ეპოქა არის. ძალიან მინდა, ეს ნაწარმოებები წაიკითხონ ახალგაზრდებმა და მიხვდნენ, სად არის თავწყარო წესიერებისა და სიწმინდის”,_ თქვა გონაშვილმა.
რაც შეეხება წიგნებს „უხადადან ოდერამდე“ და „ჟამი მიტევებისა“, იოსებ სიბოშვილის თქმით, წიგნები არ გაიყიდება, ისინი ბიბლიოთეკებს საჩუქრად გადაეცემათ, ხოლო მკითხველთა ფართო აუდიტორიას ნაწარმოებების გაცნობა ელექტრონულ ბიბლიოთეკაში შეეძლება.
