საქართველოს პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე აკაკი ზოიძე ადასტურებს, რომ „თამბაქოს კონტროლის შესახებ“ ახლადმიღებულ კანონში, შესაძლოა, ცვლილება შევიდეს და სადა შეფუთვის ვადამ 2018 წლიდან 2022 წლამდე გადაიწიოს.
ზოიძე აცხადებს, რომ ამის ინიციატორი საქართველოს მთავრობაა, რადგან მათი ცნობით, სადა შეფუთვის შემოღება 2018 წლიდან ქვეყნის ბიუჯეტს 40-50 მილიონი ლარით აზარალებს.
ემხრობა თუ არა ჯანდაცვის კომიტეტის თავმჯდომარე მთავრობის ინიციატივას, არის თუ არა ვადის გადაწევა დათმობაზე წასვლა, _ ამ საკითხებზე “გურია ნიუსს“ აკაკი ზოიძე ესაუბრა.
_“თამბაქოს კონტროლის ალიანსმა“ დღეს გაავრცელა განცხადება, რომლის მიხედვითაც თამბაქოს ნაწარმის სადა შეფუთვით რეალიზაციის ვადა 4 წლით გადაიწევს. ადასტურებთ ამ ინფორმაციას?
_შემოსულის წერილი და ვიმსჯელებთ პარლამენტში და შევთანხმდებით.
_ვისი წერილია შემოსული?
_მთავრობიდან შემოვიდა, მთავრობის საპარლამენტო მდივნისგან.
_ემხრობით ვადის გადაწევას?
_კიდევ ერთხელ ვამბობ, ვიმსჯელებთ. სერიოზული არგუმენტებია მოყვანილი რატომ უნდა გადაიწიოს ვადამ. ჩვენთვის რაც პრინციპული საკითხია იმაზე ვადას არავინ წევს; საუბარია მხოლოდ სადა შეფუთვის შემოღების ვადაზე.
_ეს არ არის პრინციპული საკითხი?
__პრინციპული საკითხებია შენობებში აკრძალვა და პიქტოგრამების დატანება. ეს იყო საკითხი, რომელიც შემოვიდა მეორე მოსმენაზე, ძალიან მნიშვნელოვანი თემაა, რომელიც გვაძლევს მცირე უპირატესობას, მაგრამ ჯერჯერობით მტკიცებულებები, რომ ეს არის ძალიან ეფექტიანი მეთოდი, არ ვიცით. ავსტრალიის მაგალითი გვაქვს მხოლოდ, ინგლისში, საფრანგეთშიც, ასევე სლოვენიაშიც აპირებენ შემოღებას. მთავრობა გვთავაზობს, რომ დავაკვირდეთ მეტი ხანი და როცა გვექნება ამომწურავი მტკიცებულებები, მაშინ გადავიდეთ. ისინი ელოდებიან, რომ სადა შეფუთვას დიდი ნეგატიური ფისკალური ეფექტი ექნება მომავალი წლიდან. ეს იყო მათი შეფასება. ამიტომ ვიმსჯელებთ ამ თემაზე და იმ პრინციპით, თუ რა სარგებელი შეიძლება მოიტანოს ამან, რომელზეც ჩვენ გვაქვს გარკვეული კვლევები ავსტრალიის მაგალითზე, გადავწყვეტთ. მეორე მხარეს სასწორზე გვიდევს ის მოსალოდნელი ნეგატიური ფისკალური ეფექტი, რომელიც შეიძლება გვქონდეს ფინანსთა სამინისტროს გათვლებით.
_გამოდის, რომ თმობს გარკვეულ საკითხებს საქართველოს მთავრობა…
_თუ სკანდალს ეძებთ არ ვიცი, რა დათმობაზე მელაპარაკებით?!.
_მაშინ რატომ ჩაწერეთ დაჩქარებულად ეს ვადა კანონში, რისი გადახედვაც ახლა გიწევთ, თუ ამას მთავრობა არ ეთანხმებოდა?
_საუბარი იმაზეა, რომ მივიღოთ რაციონალური გადაწყვეტილება, რაც ამ სახელმწიფოს სჭირდება. ეს ბოლო მომენტში შემოსული ცვლილება იყო ამ კანონპროექტში, დააყენა დეპუტატმა ზაქარია ქუცნაშვილმა და მთავრობას არ ჰქონდა იმის რომ რომ ამის ზემოქმედება შეეფასებინა. შეაფასეს, იმუშავეს ამ თემაზე, გამოგზავნეს თავისი არგუმენტები და ვიმსჯელებთ. პარლამენტი იმის არის, რომ პოლიტიკურ კონსესუსს მივაღწიოთ. რომელ დათმობაზე საუბრობთ გამაგებინეთ?! თუ 40-50 მილიონიანი ნეგატიური ეფექტი იქნება, როგორც ამას ამტკიცებენ, ღირს თუ არა დღეს 40-5 მილიონზე უარის თქმა იმ კონკრეტული რეგულაციისთვის, რომლის ეფექტიც ჯერ ბოლომდე დამტკიცებული არ არის? თუმცა რეკომენდირებულია ჯანმრთელობის მსოფლიო ორგანიზაციის და ევროკავშირის მიერ რომ ამაზე გადავიდეთ 2020 წლის მერე. ამიტომ 2020 წლამდე დავაკვირდებით, ახალ მტკიცებულებებს მოვიპოვებთ და მერე შეგვიძლია გადავიდეთ. ამ ეტაპზე მოსალოდნელია, რომ ნეგატიური ფისკალური ეფექტი ექნება. ეს იყო მთავრობის პოზიცია. ჩვენ ვართ პარლამენტი, ჩვენ უნდა გავიაზროთ, ყველა ასპექტი ვნახოთ და მათ შორის ის ეფექტიც, რაც შეიძლება ბიუჯეტზე ჰქონდეს.
როგორც გითხარით, ეს რეკომენდირებული იყო ჯანმრთელობის მსოფლიო ორგანიზაციის მიერ, მაგრამ არ გვქონდა მთავრობის შეფასება. მთავრობამ დღეს წარმოადგინა თავისი შეფასება და ამიტომ გვიწევს მსჯელობა ახლა. ყველაფერზე გვქონდა გათვლები, კონკრეტულად ამ შემთხვევაში არ იყო შესაბამისი გათვლა, დანარჩენზე ყველაფერზე იყო. გარდამავალ დებულებაზეა საუბარი, ვადის გადაწევაზე და არ მიმაჩნია, რომ ამით დიდ რამეს ვცვლით. პრინციპული საკითხები რაც არის შენობებში მოწევის აკრძალვა და პიქტოგრამების, სურათების დატანება, აქ არაფერი იცვლება.
_სტანდარტულ შეფუთვასთან დაკავშირებით საუბარი იყო იმაზეც რომ ეს არაკონსტიტუციური იყო, თუმცა თქვენ უპასუხთ, რომ ამაზე საუბარი „ზღაპარია“.
_არავითარი არაკონსტიტუციურობა. იჩივლებდნენ და ამისთვისაც მზად ვიყავით, მაგრამ ამ შემთხვევაში ჩვენთვის გადამწყვეტი მომენტია, თქვენ კარგად იცით, რომ არავითარი არგუმენტები თამბაქოს ინდუსტრიიდან მისაღები ვერ იქნება, მაგრამ საუბარია მთავრობის პოზიციაზე, რაც უკავშირდება ფისკალურ ეფექტს, ბიუჯეტზე აქციზის შემოსავლებით. მხოლოდ ამაზეა საუბარი.
_ანუ, შესაძლებელია ამ ვადის გადაწევას თქვენც დაეთანხმოთ.
_ვიმსჯელებთ პარლამენტში და გადავწყვეტთ. მოვითხოვ დამატებით დოკუმენტაციას, თუ რატომ დააკლდება ბიუჯეტს ამხელა თანხა, თუ აკლდება ნამდვილად. პირადად, რა თქმა უნდა, მწვანე ღილაკს მაინც არ დავაჭერ, მაგრამ არ ვიქნები კატეგორიული წინააღმდეგი იმის, რომ ვადამ გადაიწიოს.
ამავე თემაზე:
ხელისუფლების გარიგება ბიზნესთან _ თამბაქოს კონტროლის შესახებ კანონში ცვლილებები შედის
თამბაქოს მოწევის აკრძალვასთან დაკავშირებული რეგულაციები დამტკიცდა
საქართველოს პარლამენტმა თამბაქოს კონტროლის შესახებ კანონში ცვლილებები მიიღო
“შემოქმედებითი პროცესის ნაწილი” თუ რეკლამა _ თამბაქოს მოწევა სპექტაკლებშიც აიკრძალება?
რა სანქციები გატარდება თამბაქოსთან დაკავშირებული შეზღუდვების დარღვევის შემთხვევაში
