საქართველოში კორონავირუსით ინფიცირებულთა რიცხვი დღითიდღე იზრდება.
ქვეყანაში არსებული ეპიდსიტუაციის შესახებ ისაუბრა დღეს გამართულ ბრიფინგზე ინფექციონისტმა მაია ბუწაშვილმა.
მისი თქმით, ქვეყანაში არსებული ეპიდვითარება საგანგაშო არ არის და არც ხელახალი ჩაკეტვის გამოცხადების აუცილებლობა დგას.
„სამწუხაროდ, რადგან კორონავირუსის პანდემია არის ახალი, რაიმე ალგორითმი ან პროგნოზირების მექანიზმი არ არსებობს. პრინციპი არის ერთი, რომ პანიკის გარეშე ყოველთვის ვიყოთ ფრთხილად და მზად. დღევანდელი ციფრები განგაშის საფუძველს არ გვაძლევს, რაც შეეხება საყოველთაო კარანტინს, საყოველთაო შეზღუდვებს რაც გვქონდა გაზაფხულზე, ამის აუცილებლობაც არ დგას“,_ განაცხადა ინფექციონისტმა.
ბუწაშვილმა პრესკონფერენციაზე აღნიშნა ისიც, რომ საყოველთაო კარანტინი მოსახლეობაზე მძიმედ აისახა და ამჟამად ამ გადაწყვეტილების მიღება რთული იქნება.
„ამ ჩაკეტვებმა მძიმე შედეგები გამოიღო ბევრისთვის უმუშევრობის თვალსაზრისით და ამ გადაწყვეტილების მიღება რთული იქნება და თუ უკიდურესი აუცილებლობა არ იქნება არ მგონია, მიიღონ“,_ განაცხადა ბუწაშვილმა.
რაც შეეხება შეკითხვას მომავალ არჩევნებთან დაკავშირებით, ინფექციონისტი აცხადებს, რომ საარჩევნო პროცესი ინფექციის გადაცემის მაღალი რისკის შემცველი არ არის, რადგან კონტაქტი მცირეხნიანია.
„არჩევნებთან დაკავშირებით არ მგონია, ძალიან მაღალი რისკები იყოს იმიტომ, რომ იქ კონტაქტი შედარებით მცირეხნიანია. გასაგებია, რომ საარჩევნო უბნებთან რიგებია, მაგრამ ეს შეიძლება, მოგვარდეს დისტანცირებითა და პირბადით. ამიტომ, თავად არჩევნების დღესთან დაკავშირებით განსაკუთრებული რისკები არ ჩანს, თუმცა, შედარებით სარისკოა წინასაარჩევნო შეხვედრები ბევრ ადამიანთან. კანდიდატებმა უნდა დაარეგულირონ, რომ ესეც წესების დაცვით მოხდეს. არჩევნები მაღალი ეპიდემიოლოგიური რისკის შემცველი არ უნდა იყოს, თუ სიფრთხილის ელემენტარულ ზომებს დავიცავთ“,_განაცხადა ბუწაშვილმა.
ინფექციონისტმა ასევე სასწავლო პროცესის დაწყებასთან დაკავშირებულ რისკებზე ისაუბრა.
მაია ბუწაშვილის თქმით, ბავშვები შეიძლება ინფექციის გადამტანები იყვნენ, მაგრამ საჭიროა მჭიდრო მონიტორინგი.
„სასწავლო პროცესის დაწყება, რა თქმა უნდა, გარკვეულ რისკებს შეიცავს, თუმცა, არა – დიდს, ჩემი აზრით. ბავშვები შეიძლება, იყვნენ ინფექციის გადამტანები, მაგრამ ჩვენ თუ ეს ნაბიჯი არ გადავდგით, განუსაზღვრელად დიდხანს და უსასრულოდ ეს ბავშვები სახლში ვერ დარჩებიან. ეს ნაბიჯი უნდა გადაიდგას მჭიდრო მონიტორინგით და შემდეგ სიტუაცია გვიჩვენებს. ვფიქრობ, ამაზე უფრო მნიშვნელოვანი რისკის, ეპიდემიოლოგიური თვალსაზრისით საზღვრების გახსნა იყო. აქაც, რა თქმა უნდა, უნდა გაფართოვდეს და მეტ ქვეყანაში აღდგეს მიმოსვლა“, – განაცხადა ბუწაშვილმა.
ცნობისთვის, ამ დროისთვის, საქართველოში კორონავირუსის ინფექციის დადასტურებულ შემთხვევათა რაოდენობა 1596-ს შეადგენს, რომელთაგანაც 1294 პაციენტი გამოჯანმრთელდა, ხოლო 19 დაიღუპა.
