ზაფხულის ცხელი დღეების დადგომასთან და შვებულებების დაწყებასთან ერთად საზოგადოების ნაწილი დასასვენებლად ზღვის ნაპირს სტუმრობს, თუმცა, სამწუხაროდ, ხშირია რუჯის მიღების ნაცვლად მზისგან დამწვრობის მიღების შემთხვევები.
დამწვრობის ცენტრის დირექტორი, გუგა ქაშიბაძე „გურია ნიუსთან“ საუბრისას ამბობს, რომ წელს სოლარული დამწვრობების შემთხვევებმა, გასულ წელთან შედარებით, კიდევ უფრო მოიმატა.
„წელს მზეზე მიღებულმა დამწვრობებმა გასულ წელთან შედარებით 8-10 %-ით მოიმატა. დამწვრობის შემთხვევები ქალებსა და მამაკაცებში ფიქსირდება. ერთ დღეში ცდილობენ ისეთი რუჯის მიღებას, რასაც დაახლოებით ორი კვირა სჭირდება. დამწვრობას კი სამწუხაროდ, ჩვენი კანი იმ წუთას ვერ გრძნობს და საღამოს აღმოვაჩენთ ხოლმე. ძალიან ხშირია შემთხვევები, როცა იწვებიან, მაგრამ მეორე დღეს მაინც ცდილობენ რუჯის მიღებას. ეს კიდევ უფრო ამძიმებს მდგომარეობას. განმეორებით დაწვამ იცის პიგმენტური ლაქების გაჩენა, რისი მოცილებაც ძალიან რთულია“,_ გვეუბნება გუგა ქაშიბაძე.
ქაშიბაძე ზღვაზე დამსვენებლებს ურჩევს, მზისგან დამცავი საშუალებები გამოიყენონ დამწვრობის თავიდან ასარიდებლად.
„მოქალაქეებს ვურჩევდი კარგად დაისვენონ, იმიტომ რომ დასვენება ძალიან მნიშვნელოვანია. თუ ადამიანმა კარგად არ დაისვენა ვერც კარგად ისწავლის და ვერც ნაყოფიერად შეძლებს მუშაობას. რომ არ ჩავიმწაროთ დასვენების დღეები, აუცილებად გამოვიყენოთ მზისგან დამცავი კრემები“,_ ამბობს ქაშიბაძე.
რაც შეეხება ლეღვის ნახარშის გამოყენებით მიღებულ დამწვრობას, ქაშიბაძე გვეუბნება, რომ წელს მხოლოდ ერთი შემთხვევა დაფიქსირდა, მაგრამ მომხდარი რუჯის მიღების სურვილს არ უკავშირდება.
„ლეღვის ნახარშით მიღებული დამწვრობა მხოლოდ ერთ შემთხვევაშია დაფიქსირებული, მაგრამ ეს არ უკავშირდება რუჯის მიღებას. მამაკაცს მეგობარმა ქალბატონმა ურჩია, რომ ლეღვის ნახარში სახსრების ტკივილის საწინააღმდეგოდ გამოეყენებინა. კაცმა მიიღო დამწვრობა. მდგომარეობა არ იყო სერიოზული და მკურნალობას დაემორჩილა“,_ გვითხრა ქაშიბაძემ.
[sexy_author_bio]
