მზია ამაღლობელის სისხლის სამართლის საქმეზე ბათუმის საქალაქო სასამართლოში 2 პოლიციელი გამოიკითხა: გურიის პოლიციის დეპარტამენტის საგამოძიებო სამსახურის უფროსი მიხეილ დარჩია და ბათუმის პოლიციის მე-6 განყოფილების უფროსი არჩილ ანთაძე.
მიხეილ დარჩიამ თქვა, რომ აჭარის პოლიციის დეპარტამენტიდან გურიის პოლიციაში მზია ამაღლობელის საქმე 5 თებერვალს გაიგზავნა, რის შემდეგაც მან ჩაატარა საგამოძიებო მოქმედებები, მათ შორის: დაათვალიერა გამოთხოვილი ინფორმაცია, საინფორმაციო-ტექნოლოგიური ექსპერტიზა (ტელეფონის დათვალიერება) და მოწმეების გამოკითხვა.
გამოთხოვილი ინფორმაცია, როგორც დარჩიამ თქვა, მოიცავდა აჭარის ტელევიზიიდან გამოთხოვილ ვიდეოსაც, რომელშიც მზია ამაღლობელის მიერ ირაკლი დგებუაძისთვის სილის გაწვნაა ასახული. გამომძიებელი ამბობს, რომ შედეგად გამოჰკითხა ის პირები, ვინც ვიდეოში ჩანს.
მიხეილ დარჩიამ დღევანდელ ჩვენებაში გაიმეორა სასამართლოში ბრალდების მხარის მიერ მანამდე გამოკვეთილი ვერსია, რომ მზია ამაღლობელი 11 იანვარს „პოლიციელზე თავდასხმას” გეგმავდა „სხვებთან კომუნიკაციით”.
სწორედ ამ მოტივით მოითხოვა გამოძიებამ წვდომა მზია ამაღლობელის ტელეფონზე.
პატაკი, რომელშიც ეს მოთხოვნა წერია, პოლიციელმა ვლადიმერ ჩიტაიამ 15 თებერვალს დაწერა.
„საქმეზე მიღებულ იქნა ინფორმაცია, რომ დანაშაული შესაძლოა წინასწარ იყო ორგანიზებული და ამის შესახებ ინფორმაცია შესაძლოა, ყოფილიყო ქალბატონი მზიას ტელეფონში, რაც ამოღებული იქნა მისი დაკავებისა და პირადი ჩხრეკის დროს. ტელეფონი ინახებოდა ჩემთან. ინფორმაცია იყო საკმაოდ სარწმუნო იმისთვის, რომ ჩამეტარებინა შემდგომი საგამოძიებო მოქმედებები, რაც გამოიხატა იმაში, რომ დავნიშნე ტექნიკური ექსპერტიზა და სასამართლოსგან მოვითხოვე განჩინება ტელეფონის დათვალიერებაზე. როცა მოვითხოვე განჩინება, დაინიშნა ექსპერტიზა“, – თქვა მიხეილ დარჩიამ.
ადვოკატმა მაია მწარიაშვილმა გამომძიებელს ჰკითხა, საიდან გახდა მისთვის ცნობილი, რომ ვლადიმერ ჩიტაია ფლობდა ინფორმაციას წინასწარი ორგანიზების შესახებ.
„როგორც შემდეგში განმარტა და პატაკშიც დაწერა, მისთვის პირადი კონტაქტისგან გახდა ცნობილი, რომ დანაშაულის მზადების შესახებ ინფორმაცია უნდა ყოფილიყო მზიას ტელეფონში.
ხშირად ხდება, რომ მისი ინფორმაციის წყაროები სანდოა, რაც სხვა საქმეებზე არაერთხელ დადასტურებულა და ამიტომ გადავწყვიტე, დამენიშნა საინფორმაციო-ტექნოლოგიური ექსპერტიზა“, – თქვა მიხეილ დარჩიამ.
ტელეფონი, რომელიც მზიას ექსპერტიზისთვის ჩამოართვეს, კვლავ პოლიციაშია. ჯერ კიდევ მარტის დასაწყისში მზია ამაღლობელის ადვოკატები ამბობდნენ, რომ აღნიშნული ექსპერტიზის მიზანი „ტელეფონის არდაბრუნებაა“.
ადვოკატმა მაია მწარიაშვილმა მას ჰკითხა, რატომ არ დააკონკრეტებინა პატაკის დამწერ ვლადიმერ ჩიტაიას არცერთი გარემოება: ვისგან მიიღო ინფორმაცია, როდის, სად.
„ერთი კითხვაც კი არ გაქვთ დასმული. რატომ?“ – იკითხა მწარიაშვილმა.
„როცა იცი, რომ წინასწარ პასუხი იქნება – არა, ეგეთ კითხვას არ სვამ“, – უპასუხა დარჩიამ.
გამომძიებელმა დღევანდელ სასამართლო პროცესზე ასევე თქვა, რომ ირაკლი დგებუაძე მზიასგან „არ ელოდა მსგავს ქმედებას“.
„როგორც მან [დგებუაძემ] თქვა, მან განუმარტა ამ პიროვნებებს, რისთვის მოხდა ამ პიროვნებების დაკავება და შემდგომ ქმედებას ნამდვილად არ ელოდა. ხელის დარტყმას და თავდასხმას არ ელოდა.
აღენიშნებოდა სიწითლე, როგორც მან განმარტა და განიცადა ტკივილი. მოულოდნელი იყო მისთვის“, – თქვა მიხეილ დარჩიამ.
მან ასევე რამდენჯერმე გაიმეორა, რომ მზია ამაღლობელის მოტივი, რის გამოც ირაკლი დგებუაძეს სილა გააწნა, შურისძიება იყო.
დღევანდელ პროცესზე გამოიკითხა პოლიციელი არჩილ ანთაძეც, რომელიც ერთ-ერთია იმ 5 პოლიციელს შორის, რომელმაც მზია ამაღლობელის დაკავების შესახებ ჩვენება იდენტური ტექსტით მისცა. 5-დან 4 პოლიციელი: არჩილ ანთაძე, დავით ანთაძე, ვახტანგ ბოლქვაძე და ცოტნე ქართველიშვილი აჭარის პოლიციის დეპარტამენტის საგამოძიებო სამმართველოს უფროსი გამომძიებელმა, გურამ დიასამიძემ 23 იანვარს გამოჰკითხა.
არჩილ ანთაძემ დღევანდელ პროცესზე თქვა, რომ 11 იანვრის საპროტესტო აქციის მონაწილეები პოლიციელებს აგინებდნენ, რის გამოც ისინი დააკავეს ადმინისტრაციული წესით დააკავეს.
ანთაძის თქმით, მათი დაკავების შემდეგ მივიდა მზია ამაღლობელთან და ეთერ თურაძესთან სასაუბროდ ირაკლი დგებუაძე.
„უხსნიდა, რის გამო დააკავეს 2 ადამიანი, გაბაიძეები, სახელები არ ვიცი. საუბარი უკვე დასრულებული იყო, როცა ქალბატონმა მზიამ მოქაჩა და შემოარტყა სილა მარჯვენა მხარეს ლოყაზე”. – ამბობს პოლიციელი.
მისი თქმით, სილის გაწვნის მომენტში ირაკლი დგებუაძის მოპირდაპირე მხარეს იდგა. მზიას დაკავების შემდეგ კი „ეხმარებოდა მისი პოლიციის ეზოში შეყვანაში. შენობაში არ შევსულვარ, დავბრუნდი იმ ტერიტორიაზე, სადაც იქამდე ვიყავი”.
არჩილ ანთაძემ თქვა, რომ ის და ირაკლი დგებუაძე ერთად იყვნენ აქციის დასრულებამდე.
„[ირაკლი დგებუაძეს] თითები არ ეტყობოდა, მაგრამ შეწითლებული ჰქონდა. გარე განათებები არის და საკმაოდ ნორმალურად [ჩანს]. გამომძიებელმა დამიბარა და დავადასტურე იგივე. მე მასთან კომუნიკაცია მქონდა ფაქტიდან 10-15 წუთის შემდეგ ეზოში”. – თქვა ანთაძემ.
დაცვის მხარემ წარმოადგინა 11-12 იანვრის ღამის მოვლენების ამსახველი ვიდეოები.
ერთ-ერთ მათგანის თანახმად, არჩილ ანთაძე მზია ამაღლობელის მიერ დგებუაძისთვის სილის გაწვნის და შემდეგ მისი დაკავების პროცესში სხვა მომიტინგეებს ელაპარაკება და არ დგას იქ და ისე, როგორც ამის შესახებ თავად ილაპარაკა.
„გეკითხებიან [აქციის სხვა მონაწილეები], რატომ დააკავეთო [ადმინისტრაციული წესით დაკავებული მოქალაქეები] და არ ეუბნებით, ეუბნებით, ხომ დაინახეთ თქვენ თვითონო. ამის პარალელურად მიდის მზიას პოლემიკა დგეუბუაძესთან. და თქვენ როგორ დაინახეთ? მე სხვა კითხვა თქვენთან აღარ მაქვს”. – უთხრა მას მაია მწარიაშვილმა.
მზია ამაღლობელის სისხლის სამართლის საქმეზე უკვე 7 პოლიციელი გამოიკითხა.
ჩვენება უნდა მისცეს ირაკლი დგებუაძემაც.
შემდეგი სასამართლო პროცესი 28 აპრილს, 13:00 საათზე დაინიშნა.
ბათუმელები/ნეტგაზეთის” დამფუძნებელს მზია ამაღლობელს ბათუმის პოლიციის უფროსის, ირაკლი დგებუაძისთვის სახეში სილის გაწვნის გამო პოლიციელზე თავდასხმას ედავებიან. მას 4-დან 7 წლამდე პატიმრობა ემუქრება.
11 იანვარს დაწყებულ აქციაზე მზია ამაღლობელი ორჯერ დააკავეს – თავდაპირველად 11 იანვრის ღამეს, კედელზე პლაკატის გაკვრის გამო. მოგვიანებით ის გაათავისუფლეს. გათავისუფლებიდან მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს, უკვე 12 იანვარს, 2 სხვა პირთან ერთად.
13 იანვარს „ბათუმელებმა/ნეტგაზეთმა” გაავრცელა ვიდეო და ინფორმაცია, რომ მათ დირექტორს, მზია ამაღლობელს ბათუმის პოლიციის უფროსი ირაკლი დგებუაძე აგინებს და ვიდეოში ისმის მისი სიტყვები: „სისხლით… ბო*იშვილი ვიყო, სისხლით დავიჭერ, ამას მოვუ**ნავ დედის მუ*ელს“.
15 იანვარს საიას თავმჯდომარემ, ნონა ქურდოვანიძემ მზია ამაღლობელთან რუსთავის ციხეში ვიზიტის შემდეგ ისაუბრა ირაკლი დგებუაძის მხრიდან არასათანადო მოპყრობაზე.
ქურდოვანიძემ აღნიშნა, რომ დგებუაძემ ამაღლობელს სახეში შეაფურთხა, ასევე, მისი ბრძანების შესაბამისად, მზია ამაღლობელს არ ეძლეოდა გარკვეული დროის განმავლობაში წყლის დალევის, ასევე, საპირფარეშოთი სარგებლობის შესაძლებლობა.
მზია ამაღლობელი უსამართლობას 38 დღის განმავლობაში შიმშილობით აპროტესტებდა.
წყარო: პუბლიკა
