„ „ნაგერას“ იმიტომ ვიბარებ, ხალხი მეცოდება, თავი კიარა“: ოპერატორის „ოზურგეთული რიტორიკა“

ოზურგეთში, კრეფა-შეგროვების სეზონის დასრულების შემდეგ, საახალწლოდ გადანახული საუკეთესო ხარისხის თხილის ფასის დადგენა ძნელი არ არის. აქ უკვე იციან, რომ ნორმალური ხარისხის თხილს, იგივე ფასი აქვს, რაც ზაფხულში ჰქონდა და წლების უკანდელი ბაზარი, როცა საახალწლოდ ფასი ორმაგდებოდა, ჩაბარდა ისტორიას.
_ერთ ტომარა კარგი ხარისხის თხილს რომ გადავინახავდი, საახალწლო სუფრისთვის ყვეალფერს ვყიდულობდი. ახლა ერთ ტომარა პურისფქვილს ვერ ვიყიდი, _ წუხან დიასახლისები.
_გავტეხავთ, თუ კარგია გული, ერთ ცალს 45 თეთრად ვიანგარიშებთ. საშუალოდ, ერთი კილოგრამი 4 ლარი იქნება. რაც შეეხება „ნაგერას“, ასეთი თხილი, კვლავ მოაქვს ხალხს და ვიბარებთ, – გვეუბნება თხილის მიმღებ პუნქტში, ცირა ქილიფთარი.
„ნაგერა“, ანუ მილეული სეზონის ბოლოს შეგროვებული, თითქმის დამპალი თხილის ჩაბარება, ხშირად ხდება და გამხდარა დავის საგანი.
_რატომ უნდა მიიღოთ „ნაგერა“ ანუ დამპალი თხილი?
_რა ვქნა , ხალხი მეცოდება, თორემ მეც ლარადად ვყიდი ან სულაც ვერ ვყიდი…
_საკვირველია, ხალხი გეცოდება და საკუთარი თავი არა? მერე ვის უნდა მიყიდო ის დამპალი თხილი?
_რა ვქნა? ადამიანი რომ მოვა და პურის ფული არ მაქვსო, რომ იტყვის, არაა ცოდვა? ამ საახალწლოდ რომ შაქარს ვერ ყიდულობს, არაა ცოდო? _ასეთია თხილის მიმღებთა უცნაური რიტორიკა.
ამბობენ იმასაც, რომ იმ ცუდ თხილს, მერე კარგ პარტიაში ურევენ და ასე კილოგრამს 4 ლარად ყიდიან.
_როგორ გგონიათ, ამ ნაგავის მსგავს თხილს რომ ღებულობენ, მერე ის ვინ უნდა იყიდოს? უბრალოდ, დიდ რაოდეობის კარგ თხილში ურევენ. იქ ადვილად შესამჩნევი არ არის და ასე საკმაო მოგებას ნახულობენ. რას გაიგებთ, ეს „თხილის მაფიაა“ , _ ღიად საუბრობენ ისევ თხილის ფასებით დაინტერესებული ადამიანები.
თუმცა, ამ ყველაფერს უარყოფენ მიმღები ოპერატორები და ინფორმაციას ჭორების მოყვარულთა გავრცელებულ ამბებს უწოდებენ.