ოზურგეთის მუნიციპალიტეტის სოფელ შემოქმედის თემში შემავალი სოფლების _ წითელმთისა და კვირიკეთის ტერიტორიაზე, იქ, სადაც მდინარე ბჟუჟის კალაპოტი სიგრძივად მიუყვება დასახლებას, არა ერთგან ნახავთ დანაგვიანებულ ადგილებს.
საგანგაშო მდგომარეობაა სოფლების, წითელმთისა და მაკვანეთის დამაკავშირებელი ხიდთან მისვლამდე, მარჯვენა შესახვევში, საიდანაც გზა ბჟუჟის კალაპოტში არსებული კარიერისკენ მიდის _ აქ არის ნაგავსაყრელად ქცეული მოზრდილი ტერიტორია. რას არ ნახავთ აქ, სამშენებლო მყარ ნარჩენებს თუ საყოფაცხოვრებო ნაგავს, პოლიეთილენის პარკების გროვას თუ გზების რეაბილიტაციის დროს აღებულ ასფალტის ნატეხებს. ბლომადაა ხეების ნასხეპი თუ მოთხრილი კუნძების ფესვიანი ნაწილების გროვები. აშკარაა, აქ დიდი ხანია, მანქანებით ეზიდებიან და ყრიან ყველაფერს, რასაც ნაგავი თუ ნარჩენი ჰქვია.
_ კარგა ხანია, აქ ნაგავს ყრიან. რამდენჯერაც მოვედი, რაოდენობა გაზრდილი დამხვდა. აქ საკუთარ ნაკვეთს ვფლობ, თხილის პლანტაცია მაქვს და ხშირად მიწევს მოსვლა. თუმცა, ვინ აკეთებს ამას, ფაქტზე ვერ შევესწარი. ეტყობა, უკვე ნაგავსაყრელად მოიაზრებენ და ყველანაირი ნაგავი თუ მყარი ნარჩენი აქ მოაქვთ. ამ ამბავს მარტო საკუთარი ჩემი ძალებით ვერ მივხედავ. სასწრაფოდ უნდა მიხედოს შესაბამისმა სამსახურმა ან ხალხმა აიღოს ინიციატივა და დაასუფთავოს, შემდეგ კი აკონტროლონ მომსვლელ-წამსვლელი, _ გვეუბნება ქალაქ ოზურგეთის მკვიდრი ლილი დოლიძე.
სოფელ წითელმთის იმ მცხოვრებთა აზრით, ვინც აღნიშნულ ტერიტორიასთან ახლოს ცხოვრობს, ამ ნაგავს ადგილობრივი მოსახლეობა ნაკლებად ყრის.
_ შესაძლოა, მეზობელი სოფლიდან გამოაქვთ. ასფალტის ნარჩენებს და ერთ მანქანა ნაგავს ეზოში ვინ გააჩერებს? გეგონება ნაგავმცლელიდან არის პირდაპირ დაყრილი. აქ მდინარის პირია და ხშირად პირუტყვიც ბალახობს. იმდენი “ცელოფნის” ნარჩენი ყრია, რომ თუ შეჭამა, რაც არაერთხელ მომხდარა, მერე მისი საქმე დამთავრებულია. გარდა ამისა, ზაფხული მოდის. ულამაზესი ბჟუჟის ხეობა და სანაპიროები ტურისტებს ნაგვით სავსე უნდა დახვდეს? ადგილობრივებს ბევრი გვმართებს, მაგრამ ჩვენთან ქუჩებში ყველგან დგას ურნები და ნაკლებად სარწმუნოა, რომ აქ გამოიტანონ ნაგავი, _ გვეუბნებიან ადგილობრივები.
აღსანიშნავია, რომ ადგილი, რომელიც ნაგავსაყრელადაა ქცეული, იმ გზის გასწვრივაა, რომელიც უფრო ქვევით, კვირიკეთის მონაკვეთზე არსებული კარიერისკენ მიდის. აქ დღეში არაერთი მანქანა გაივლის. აქ მცხოვრებთა აზრით, შესაძლებელია ისიც, რომ ვინმემ, კონკრეტული ავტომანქანის მფლობელმაც მიიტანოს აქამდე ნაგავი, დაყაროს და მერე გზა გააგრძელოს. ამიტომ ამ საქმეს სერიოზული მიხედვა სჭირდება, რომ აქ უნებურად ნაგავსაყრელი არ წარმოიქმნას, რაც მერე გაცილებით მეტ პრობლემას შექმნის, ვიდრე ახლა არსებობს.
“გურია ნიუსი” ოზურგეთის მუნიციპალიტეტის მერიის ზედამხედველობის სამსახურის უფროსს შუქრი გაბრიჩიძეს ესაუბრა:
_ სად ყრია ეს ნაგავი? იქაურები დაყრიდნენ, აბა, ვინ წაიღებდა ქალაქიდან წითელმთაში ნაგავს? ახლა არ ვიცი არაფერი და თუ არ ვნახე, რა გიპასუხოთ? _ თქვა გაბრიჩიძემ.
სოფელ შემოქმედის წარმომადგენელი ოზურგეთის მუნიციპალიტეტის საკრებულოში, თამაზ ბურჭულაძე ჩვენთან საუბარში ამბობს, რომ ნაკლებად სჯერა ამ საქმეში ადგილობრივ მცხოვრებთა ხელი ერიოს:
_ მთელ სოფელში ჩამწკრივებულია სანაგვე ურნები. მართალია, მე არ მინახავს, სად ყრია ეს ნაგავი, მაგრამ თქვენი ნათქვამიდან გამომდინარე, ვფიქრობ, ვინც სამშენებლო ნარჩენები მოიტანა, ალბათ, სახლიდან იმან გამოაყოლა საყოფაცხოვრებო ნაგავიც, _ გვითხრა ბურჭულაძემ.
_ ბატონო თამაზ, იქ ძალიან ბევრი ნაგავი ყრია, თან აშკარაა, მანქანებითაა მიტანილი და გაცლილი.
_ რა ვიცი, თითქოს, ყოველდღე დადის ზედამხედველობის სამსახური იქვე მდებარე კარიერებზე. ნაგავზე უნდა გადაიარონ და ვერ შეხედეს? მე ახლა ის შემიძლია, რომ მოსახლეობას ვთხოვო და ვიფიქროთ დასუფთავების აქციის ჩატარებაზე. მადლობას გიხდით და დღესვე შევუდგები საქმეს, რომ დასუფთავების აქციის ორგანიზება მოვახდინო. მე ასე ვფიქრობ, ოზურგეთის სერვისცენტრს ისეც ბევრი საქმე აქვს საკეთებელი და აქ მოსასვლელად თუ გამონახავს დროს, ვთხოვ. ზოგადად, ბჟუჟის სანაპიროები აქციით უნდა დასუფთავდეს. ზაფხული მოდის ტურისტების ნაკადი ყოველ წელს მატულობს და მოსახლეობამაც უნდა ისწავლოს, საკუთარი ეზოებივით დაასუფთაონ და მიხედონ სახლის უკან მდებარე მდინარის ხეობას და სანაპიროებს. ასეთი სიმდიდრე ბევრისთვის სანატრელია და ჩვენ რომ ნაგვით ავავსებთ, სირცხვილია. ერთ კვირაში ამ საქმეს მივხედავთ და ასევე, სოფლის გამგებელთან და აქტიურ მცხოვრებლებთან ერთად, მოვილაპარაკებთ, როგორ და რა ფორმით გავუწიოთ კონტროლი აღნიშნულ ტერიტორიას, _ გვითხრა ბურჭულაძემ.
ოზურგეთის სერვისცენტრის უფროსი თენგიზ ქუტიძე “გურია ნიუსთან” განმარტავს, რომ სოფელმა უნდა მიაქციოს ყურადღება და კონტროლი გაუწიოს საკუთარი ეზოების მიმდებარე ტერიტორიებს, მდინარის სანაპირო ზოლს.
_ მე მზად ვარ, ტექნიკით დავეხმარო. რაც გასატანი იქნება, წავიღებთ, დანარჩენი ქვიანი თუ ასფალტიანი მყარი ნარჩენების ადგილზე მოსწორება შეიძლება. ზოგადად კი, თითოეული მოქალაქის და იქ მცხოვრების მაქსიმალური ყურადღებაა საჭირო, რომ გარემო არ აავსონ ნაგვით, _ გვითხრა მან.
