საპარლამენო უმრავლესობის წევრმა, ,,მწვანეთა პარტიის“ თავმჯდომარე გიორგი გაჩეჩილაძემ გუშინ, საქართველოს პარლამენტის პლენარულ სხდომაზე იმ ნეგატურ მოვლენებზე ისაუბრა, რაც გარემოს დაცვის სამინისტროს გაუქმებას ახლავს თან. მისი თქმით, გარემოს დაცვა სახელმწიფოს უპირველიესი პრიორიტეტი უნდა იყოს.
,,მესმის, რომ ქვეყანას სჭირდება სწრაფი ეკონომიკური განვითარება, მაგრამ ნუ გვექნება იმის ილუზია რომ ეკოლოგიური სისტემების დასუსტების ხარჯზე ეს შესაძლებელია მოხდეს. ამიტომ, რომ ტენდენცია მსოფლიოში სულ სხვანაირია. ჩვენ თუ გვინდა მდგრადი გავითარებადი პრინციპების ერთგულები ვიყოთ, რომელიც გაეროს პრინციპებიდან გვაქვს აღებული, გვჭირდება ძლიერი გარემოს დაცვითი დამოუკიდებელი სტრუქტურა. გაითვალისწინეთ, რომ კლიმატის ცვლილებების კონვენციათან ვართ შეთანხმებულები, პარიზის სამიტზე გარკვეული ვალდებულებები ავიღეთ. პარიზის სამიტის ფარგლებში შეიქმნა უზარმაზარი ,,მწვანე ფონდი“, როგორც ვიცი, 40 მილიარდიანი, საიდანაც უნდა ველოდოთ გარკვეულ დახმარებას ეკოლოგიური სიტუაციების გაუმჯობესებისთვის და მე არ ვიცი რამდენად ხელმისაწვდომი გახდება ეს ფონდი ჩვენთვის, მაშინ, როცა, როცა გარემოს დაცვისა და სოფლის მეურნეობის სამინისტროებს გავაერთიანებთ. მინდა, შევახსენო ყველას, რომ ასოცირების 235- ე მუხლში პირდაპირ წერია, რომ გარემოს დაცვის სისტემის შესუსტების ხარჯზე არავითარ შემთხვევაში არ შეიძლება, არც ეკონომიკის განვითარებაზე ფიქრი და არც სავაჭრო, საინვესტიციო სისტემაზე, რადგან გარემოს დაცვა არის, როგორც ევროკავშირის, ისე ჩვენი შეთანხმებიდან გამომდინარე, ძირითადი პრიორიტეტი. იმედი მაქვს, რომ გათვალისწინებული იქნება ჩვენი მოთხოვნა, რომ გარემოს დაცვის სამინისტრო დარჩეს დამოუკიდებელ სტრუქტურად. პირდაპირ მინდა ვუთხრა ეკონომიკის სამინისტროს თუ გარემოს დაცვის სამინისტროსაც, როგორც ერქმევა, ნამდვილად შარში არიან გახვეულები“ -განაცხადა პარლამენტის სხდომაზე გიორგი გაჩეჩილაძემ.
შეგახსენებთ, რომ გუშინ პარლამენტმა მთავრობის სტრუქტურულ რეორგანიზაციასთან დაკავშირებული ცვლილებები მესამე მოსმენით დაამტკიცა, რომლის მიხედვით, გარემოს დაცვის სამინისტრო სოფლის მეურნეობის სამინისტროს უერთდება. ასევე, ეკონომიკის სამინისტროში შედის გარემოს დაცვისა და ბუნებრივი რესურსების სამინისტროს ბუნებრივი რესურსების კომპონენტი.
