“მკვლელობა სადგურის უბანში” _ ლიტერატურული პრემია “საბას” გამარჯვებულია ნომინაციაში “წლის საუკეთესო პროზაული კრებული”. ავტორი რატი რატიანია, თუმცა, ეს მწერლის ნამდვილი სახელი არ არის _ რატი რატიანი ქართველი თანამედროვე მწერლის ნინო სურამელაშვილის ფსევდონიმია. რაც შეეხება კრებულში შესულ მოთხრობებს, მწერალი ამბობს, რომ თითქმის ყველა მათგანის შთაგონების წყარო თანამედროვე რეალობა გახდა.
ჩვენს კითხვას, თუ რატომ გადაწყვიტა მამაკაცის სახელით წერა, პასუხობს:
_ სიმართლე გითხრათ ფსევდონიმი მინდოდა და ამიტომ გადავწყვიტე ჩემი კლასელის სახელი და გვარი გამომეყენებინა.
_ რა ასაკში დაიწყეთ მოთხრობების წერა?
_ მოთხრობების წერა დავიწყე 17-18 წლიდან.
_ რა იყო თქვენი პირველი ნამუშევარი და თუ არის ის ცნობილი ფართო საზოგადოებისთვის?
_ ჩემი პირველი მოთხრობა დაიბეჭდა “ალტერნატივაში”. ამ ლიტერატურულ ჟურნალს მაშინ “კავკასიური სახლი” გამოსცემდა. სხვაგან არც დაბეჭდილა და არ მგონია, ფართო საზოგადოებისთვის ცნობილი იყოს.
_ რაც შეეხება ნაწარმოებს, რომელიც “საბას” ნომინაციის გამარჯვებული გახდა…
_ ეს არის, დაახლოებით, 9-10 წლის განმავლობაში პერიოდულად დაწერილი მოთხრობები. მოთხრობა, რომლის სახელიც ჰქვია კრებულს, 2021 წელს დავწერე. ზოგი არის ავტობიოგრაფიული, ზოგი არის დეტექტივის ჟანრის. თითოეულის ინსპირაცია სხვადასხვა რამ იყო. ძირითადად, ნამდვილი ამბები შთამაგონებს ხოლმე ვწერო. თითქმის ყველა მათგანს ნამდვილი ამბავი უდევს საფუძვლად თუ არ ჩავთვლით მოთხრობებს, რომლებიც 1001 ღამის სიუჟეტზეა აგებული და კიდევ რამდენიმეს.
_ რა რჩევა შეგიძლიათ მისცეთ დამწყებ მწერლებს?
_ შემიძლია ვუთხრა, რომ წერონ, რაც შეიძლება ბევრი და რამე გამოვა აუცილებლად.
_ რა რჩევას მისცემდით ახალგაზრდებს, რა დამოკიდებულება უნდა ჰქონდეთ წიგნთან? ნაწარმოების კითხვა წიგნით ჯობია თუ ელექტრონულად?
_ როგორც მოუხერხდებათ, მთავარია, წაიკითხონ. ვიზუალურად მიწოდებული იგივე სერიალები და ფილმები არ ავითარებს წარმოსახვას, წიგნი კი ავითარებს, მიუხედავად იმისა ბეჭდური სახით წაიკითხავ თუ ელექტრონულად.
ფიზიკურ ფორმას არ აქვს მნიშვნელობა. იმიტომ, რომ, როცა ნაწერს კითხულობ, აზროვნება ვითარდება, თვითონ აღიქვამ პერსონაჟებს, ამბებს. მწერალი გეხმარება, რომ შენი წარმოსახვით შექმნა რაღაც. ყოველთვის ვამბობ, რომ რამდენი მკითხველიცაა, იმდენია წიგნი. ერთ წიგნზე ვლაპარაკობ ამ შემთხვევაში და ეს თვითონ ახალგაზრდებისთვის არის კარგი. წარმოსახვა თუ არ განუვითარდა ადამიანს, ბევრი სხვდასხვა ამბავი თუ არ წარმოიდგინა და არ შევიდა რაღაც როლებში, სხვადასხვა ადამიანის ტყავში არ ჩაძვრა, მაშინ ერთფეროვანი იქნება ცხოვრება და შეზღუდული ნახევარფაბრიკატებით, ვიზუალური პროდუქტით. მგონი არავითარი მნიშვნელობა არ აქვს ონლაინ წაიკითხავ წიგნს თუ ბეჭდური სახით, მთავარია, წაიკითხო.
ავტორი
