გუშინ ცნობილი გახდა რომ ხვიჩა კვარაცხელიას „ნაპოლი“ ახალი მთავარი მწვრთნელის საკითხზე საბოლოოდ ჩამოყალიბდა. დღის პირველ ნახევარში გავრცელდა ცნობა, რომ ნეაპოლურ კლუბს „პსჟ“-ს ყოფილი თავკაცი კრისტოფ გალტიე უხელმძღვანელებდა. ეს დანიშვნა გუშინ საღამოს ოფიციალურად უნდა გაფორმებულიყო. მოლოდინი გამართლდა. „ნაპოლი“ მართლაც ფრანგმა ფეხბურთის სპეციალისტმა ჩაიბარა, ოღონდ …რუდი გარსიამ.
ბატონმა აურელიო დე ლაურენტისმა სოციალური ქსელის მეშვეობით აუწყა გულშემატკივრებს, რომ ფრანგი ლუჩანო სპალეტის შეცვლის: „მოხარული ვარ განვაცხადო, რომ რუდი გარსია „ნაპოლის“ ახალი მწვრთნელი იქნება. გულწრფელად მივესალმები მას და წარმატებებს ვუსურვებ“.
რუდი გარსია ბოლოს „ალ-ნასრის“ მწვრთნელი იყო, საიდანაც ორი თვის წინ დაითხოვეს. მიზეზი კრიშტიანო რონალდოსთან კონფლიქტი გახლდათ.
მანამდე ფრანგს „სენტ-ეტიენში“, „ლე მანში“, „ლილში“, „მარსელსა“ და „ლიონში“ უმუშავია, ხოლო 2013-2016 წლებში იტალიაში მუშაობის გამოცდილება აქვს, სადაც „რომას“ ავარჯიშებდა. მან „ლილში“ 2011 წელს საფრანგეთის ჩემპიონატი და საფრანგეთის თასი მოიგო, 2018 წელს „მარსელი“ ევროპა ლიგის ფინალში, 2020 წელს კი „ლიონი“ ჩემპიონთა ლიგის ნახევარფინალში გაიყვანა.
რუდი გარსიამ ინფორმაციის გაოფიციალურების შემდეგ პირველი საჯარო კომენტარიც გააკეთა.
„ძალიან სასიამოვნოა იტალიაში დაბრუნება და „ნაპოლის“ პროექტთან დაკავშირება. ისეთი მოტივირებული და ამბიციური ვარ, როგორც არასდროს. ვეცდები, რომ იტალიის ჩემპიონის ფერების მაღლა ტარება გავაგრძელო“.
ფრანგმა სპეციალისტმა ნეაპოლურ გუნდთან ორწლიანი კონტრაქტი გააფორმა, ხელფასის სახით კი წელიწადში 3 მილიონ ევროს მიიღებს.
„ნაპოლის“ ქომაგებისთვის ეს გადაწყვეტილება მოულოდნელი იყო. იმედგაცრუება სოციალურ ქსელებშიც აისახა:
„წარმოუდგენელია, არ შეიძლება ეს სიმართლე იყოს“.
„რომას“ ყოფილი მწვრთნელი? კარგად ჟღერს“.
„უცნაური გადაწყვეტილებაა“.
„ალბათ, უბრალოდ ხუმრობაა“.
„მადლობა კრიშტიანო რონალდოს!“.
გამოცემა „Gazzetta Dello Sport“-ის ინფორმაციით, რუდი გარსია არ იყო პირველი არჩევანი. დე ლაურენტისმა მანამდე შეთანხმების მიღწევა შვიდ მწვრთნელთან სცადა, მაგრამ არაფერი გამოუვიდა.
„ნაპოლის“ პრეზიდენტს უარი ლუის ენრიკემ, სერჟიო კონსეისაომ, იულიან ნაგელსმანმა, კრისტოფ გალტიემ, ვინჩენცო იტალიანომ და ტიაგო მოტამ უთხრეს, ხოლო პაულუ სოუზასთან მორიგება საკომპენსაციო თანხის გამო ვერ მოხერხდა. შესაბამისად, „ნაპოლი“ რუდი გარსიას ჩააბარეს, რომელმაც ორწლიანი კონტრაქტი გააფორმა.
იტალიური მედიის მტკიცებით, „ნაპოლის“ მცველი კიმ მინ-ჯე კარიერას მიუნხენის „ბაიერნში“ გააგრძელებს. უკვე ცნობილია, რომ სამხრეთ კორეელს გერმანული გუნდი ხელფასის სახით წელიწადში 7.5 მილიონ ევროს სთავაზობს.
კიმის შემცვლელთა შორის ბერგამოს „ატალანტას“ მცველი ჯორჯო სკალვინი სახელდებოდა, მაგრამ რუდი გარსიას მწვრთნელად დანიშვნის შემდეგ კიდევ ერთი ვარიანტი გამოიკვეთა: „ლანსის“ მცველი კევინ დანსო, რომელსაც ფრანგი სპეციალისტი იცნობს და სურს, რომ დაიმატოს.
ცნობილი გახდა, რომ „ნაპოლი“ „ბოლონიას“ ფეხბურთელით, რიკარდო ორსოლინით დაინტერესდა. ნეაპოლელებს მარჯვენა ფლანგის გაძლიერება სურთ, სადაც 26 წლის იტალიელი თამაშობს.
არაა გამორიცხული, რომ ხვიჩა კვარაცხელიას გუნდი მექსიკელმა ირვინგ ლოსანომ დატოვოს. რიკარდო ორსოლინი ლოსანოს შემცვლელად განიხილება.
რიკარდო ორსოლინი „ბოლონიაში“ 2019 წლიდან თამაშობს და 175 მატჩში 46 გოლი აქვს გატანილი. მანამდე ის „ატალანტასა“ და „ასკოლიში“ ასპარეზობდა.
გუშინ, „ნაპოლიმ“ „ვერონადან“ ჯოვანი სიმეონე ოფიციალურად გამოისყიდა. არგენტინელმა ფორვარდმა ნეაპოლურ კლუბთან კონტრაქტი 2026 წლის ზაფხულამდე გააფორმა, მაგრამ ხელშეკრულებაში არსებული პუნქტით, მისი ერთი წლით განახლების ვარიანტიც არსებობს. უცნობია, ფინანსური მხარე და რამდენი გადაიხადა ტრანსფერში იტალიის მოქმედმა ჩემპიონმა.
ავტორი
