ქალაქ ოზურგეთში, ცენტრალურ უბანში, სადაც შსს გურიის პოლიციის დეპარტამენტი მდებარეობს, პოლიციელებსა და ახალგაზრდებს შორის ფიზიკური დაპირისპირება მოხდა. ინციდენტი გუშინ, საღამოს 10 საათზე, საბილიარდოსთან მოხდა, რომელსაც ჩვენი წყარო ასე აღწერს: ახალგაზრდები, ლუდის ბარში “ნატახტარში“ იმყოფებოდნენ, რის შემდეგაც მათ საბილიარდოში თამაში გადაწყვიტეს. იქ შესულებს სამოქალაქო ტანსაცმელში ჩაცმული ორი პირი დახვდათ, რომლებიც ბილიარდს თამაშობდნენ. ახალგაზრდებსა და აღნიშნულ პირებს შორის რამდენიმე წუთში სიტყვიერი დაპირისპირება ფიზიკურ დაპირისპირებაში გადაიზარდა. ნაცემი არიან ახალგაზრდები, რომლებიც “ოზურგეთის სამედიცინო ცენტრში“ გადაიყვანეს. მათ სახეზე მრავალმხრივი დაზიანებები აღენიშნებოდათ. ასევე, ნაცემი არიან ის პირები, რომლებიც, როგორც შემდეგ გაირკვა, პოლიციის მაღალჩინოსნები _ ს.ს. და თ.მ. აღმოჩნდნენ.
ინციდენტში მონაწილე სამივე ახალგაზრდა დაკავებულია და მათზე, შინაგან საქმეთა სამინისტროს პრესსამსახურის ინფორმაციით, სისხლის სამართლის საქმე 453-ე მუხლითაა აღძრული.
ერთ-ერთი დაკავებულის მშობელი “გურია ნიუსთან“ ამბობს, რომ მისი შვილი უდანაშაულოა და მას პოლიციამ სიტყვიერი და ფიზიკური შეურაცხყოფა მიაყენა: “საღამოს პირზე ახალგაზრდები ლუდის ბარ “ნატახტარში“ ქეიფობდნენ; იქედან წამოსულები, შევიდნენ საბილიარდოში, სადაც სამოქალაქო ფორმაში ჩაცმული ორი პირი თამაშობდა. ესენი მეგობრები არიან და ცოტას ერთმანეთში ბილწსიტყვაობდნენ, რაზეც პოლიციელებმა შენიშვნა მისცეს, ოღონდ პროვოკაციულად _ “ცოტა ლამაზად, ბიჭო“, უცენზურო სიტყვებით, ნუ საუბრობთ, ბიჭო“, _ ასე მიმართავდნენ პოლიციელები (რომლებსაც ფორმა არ ეცვათ). ამათ ვერ მოითმინეს და თქვენ ვინ ხართო, _ ჰკითხეს. _ რას ჰქვია ვინ ვართო და სიტყვიერი დაპირისპირება ფიზიკურ დაპირისპირებაში გადაიზარდა. დაშავებულია პოლიციელები, ერთს თავი აქვს გატეხილი, მეორეს აქვს ჭრილობა, ცხვირი აქვს გაბზარული, თუმცა ანალოგიურად ნაცემი არიან ეს ბავშვებიც; ჩემს შვილს გატეხილი აქვს ყურის ნიჟარა, სახეზე აღენიშნება ცემის კვალი… ოფიციალური დოკუმენტები არსებობს ამისი, ტემპერატურით და მაღალი სიცხით გადავიყვანეთ საავადმყოფოში, სადაც ვიყავით დილამდე, გასინჯა ქირურგმა, ნევროპათოლოგმა, გადაუღეს რენტგენი.
არსებობენ თვითმხილველები, როგორ სცემენ ამ ბავშვებს უმოწყალოდ. ჩემი შვილი იძახდა, ადვოკატი მომიყვანეთო და ამის გაგონებაზე, თურმე, უფრო ჩაარტყეს.
ერთ-ერთი თვითმხილველი ამბობს, ის ხმა ჩემს ცხოვრებაში არ დამავიწყდებაო. სამმართველოს უფროსს ვკითხე:_ თუ არაფერი არ ხდება, რატომ იძახებთ ამდენ ექიმს-მეთქი. _ ჩვენ ასეთი ჰუმანურები ვართო, _ მიპასუხა. ალბათ, ცოტა ახლოს რომ ვყოფილიყავი და კიდევ დამესვა შეკითხვა, მეც დამარტყამდნენ.
სასწაულ მდგომარეობაში აქვთ სახეები ბავშვებს; ჩვენი ინფორმაციით, ელექტროშოკი გამოიყენეს. რა მაინტერესებს იცით? თუ ამ ბავშვებმა უნდა აგონ პასუხი, რომ ამათ დაარტყეს, რა უფლება ჰქონდათ პოლიციელებს, რომ მათ სცემეს ბავშვები?! თუ ამათმა დააშავეს, პოლიციამ წესრიგისკენ არ უნდა მოუწოდოს, თუ პირიქით _ ცემით უპასუხონ?! ესაა სამართალი?!“_ ამბობს ერთ-ერთი დაკავებულის დედა.
“გურია ნიუსი“ აღნიშნული ინფორმაციის გადამოწმებას სამედიცინო ცენტრში შეეცადა, სადაც, ერთ-ერთი მორიგე ექიმი, რომელმაც ახალგაზრდები გასინჯა, მათ სახეზე დაზიანებების კვალს ადასტურებს.
“ერთ-ერთ ახალგაზრდას თვალბუდის მიდამოში ჰქონდა სისხლჩაქცევა და მეორეს ყურის ნიჟარის დაჟეჟილობა და ჰემატომა“.
ოზურგეთის სამედიცინო ცენტრის დირექტორი დავით მდინარაძე არ აკონკრეტებს დაზარალებულების ვინაობას და აღნიშნავს: “არ ვიცი, ვინ იყვნენ, ყველანი იყვნენ სამოქალაქო ფორმაში ჩაცმულები; 10 საათიდან 11-ის ნახევრამდე თვითდინებით ორი მამაკაცი შემოიყვანეს, ერთ მამაკაცს ჰქონდა შუბლის ნაკაწრი ჭრილობა, მეორეს _ ცხვირის ძვლის მოტეხილობა“.
ჩვენს კითხვაზე, თუ რა სახის დაზიანებები აღენიშნებოდათ ახალგაზრდებს, მდინარაძე გვპასუხობს, რომ მათ რაიმე სახის სამედიცინო ჩარევა და დახმარება არ დასჭირვებიათ.
დაკავებული ახალგაზრდების დაკითხვის პროცესი ჯერ კიდევ არ დაწყებულა.
“გურია ნიუსი“ თემაზე აგრძელებს მუშაობას.
