“ნუ დაყრი ნაგავს”- დასუფთავების აქცია კურორტ ბახმაროში

კურორტ ბახმაროში დასუფთავების აქცია გაიმართა, რომლის ინიციატივაც იქ მყოფ ერთ-ერთ დამსვენებელს, თინათინ კვაჭაძეს ეკუთვნოდა. 

როგორც მან ჩვენთან სატელეფონო საუბარში აღნიშნა, კურორტ ბახმაროზე შეყვარებულია და მას შემდეგ რაც  დაბინძურებული გარემო ნახა, დასუფთავების აქციის ჩატარების სურვილი გაუჩნდა.

“არ ვარ არცერთი ორგანიზაციის წევრი. ვარ ჩვეულებრივი საქართველოს მოქალაქე, წარმოშობით გურიიდან ვარ, თბილისში ვცხოვრობ, მაქვს საფრანგეთის მოქალაქეობაც, მეუღლე და შვილები საფრანგეთის მოქალაქეები არიან, თუმცა ვცხოვრობ თბილისში და ამ კურორტზე უზომოდ შეყვარებული ვარ და მოქალაქეობრივი მოვალეობიდან გამომდინარე, საბედნიეროდ, ახალგაზრდები მომეხმარნენ და 279 პარკი ნაგავი მოვაგროვეთ. დავასუფთავეთ პარკი, გურიის ქუჩა, ცხენოსნები რომ დგანან ის მინდორი და მთელი ღელე”,_ გვეუბნება კვაჭაძე და აღნიშნავს, რომ კურორტზე ბევრი რამ მოსაწესრიგებელია.

“ჩემმა შვილმა აქედან დადო ვიდეო, რომელიც  ძალიან ბევრმა ფრანგმა, ესპანელმა და გერმანელმა სტუდენტებმა ნახეს. ბევრმა გამოთქვა ჩამოსვლის სურვილიც და იყვნენ შოკირებულები იმით რომ ცხენი მინდორშია ხელმისაწვდომი, ძროხა სახლთან.. ეს ყველაფერი მათთვის ფუფუნებაა, რადგან იქ ასე არ არის და ჩაგვიყვანეო, ითხოვეს.  ჩემს შვილს კი მათი ჩამოყვანის რცხვენია აქ არსებული პირობების.. დაბინძურებული გარემოსი, მოუწესრიგებელი კანალიზაციის გამო. არ ვეძიები იმას თუ ვინ რა გაყიდა ან გამოყიდა, მაგრამ უნდა დაამთავრონ ამ კურორტზე ფულის შოვნა, ჩეხვა და ა.შ. და მიაქციონ სათანადო ყურადღება”,_ამბობს კვაჭაძე.

კითხვაზე, თუ როგორ გაუჩნდა დასუფთავების აქციის იდეა და როგორ მოხდა მონაწილეების მობილიზება, გვპასუხობს:

_ საფრანგეთიდან მყავდნენ სტუმრები. წავიყვანეთ თბილისთან ახლოს ტყეში და ბუნებით აღფრთოვანდნენ, თუმცა იქ ქართველებისგან დანაგვიანებული ტერიტორია,  იმათმა დაალაგეს და მე შემრცხვა. თქვეს, ამას როგორ უკეთებთ ბუნებასო. წელს ბახმაროში რომ ჩამოვედი ძალიან ბევრი ნაგავი ეყარა. აქ მარტო ის აინტერესებთ რაში მოიგონ ფული.. ბუნებას არავინ არ უფრთხილდება, შოვის ტრაგედიაც დაემთხვა  და მეც გამიჩნდა სურვილი აქაურობა დამესუფთავებინა. ჩემი შვილების და მათი ასაკის თაობის წინაშე პასუხისმგელობის გრძნობით გამიჩნდა ეს იდეა. რაც შეეხება აქციის მობილიზებას,  ჩემს ბავშვებს აქ ბევრი მეგობრები ჰყავთ და ჯერ დავიწყეთ მათგან,  ენთუზიაზმით ამყვნენ, შემდეგ პარკში გადავედით და ყველას ვუთხარით, რასაც ვაპირებდით. რადგან სეზონი იწურება და ბევრი აქაურობას მალე დატოვებს, “ბახმაროს” ჯგუფშიც დავწერე, რომ გარემოს დასუფთავებას ვაპირებდით და  ორ დღეში მოხდა მობილიზება. უფრო მეტი მხარდაჭერა ახალგაზრდებისგან იყო. თუმცა, უნდა ავღნიშნო რომ სანამ ტერიტორიას ვასუფთავებდით,  ჩამოიარა კაცმა და ისიც კი გვითხრა, რომ რა აზრი აქვს დალაგებას, როცა მალე ისევ იგივე იქნება და შემდეგ მე მომიწია ბავშვებისთვის ამეხსნა, რომ აზრი ყოველთვის აქვს დალაგებას და ნაგავი ქუჩაში არ უნდა დაყარონ”,_ ამბობს კვაჭაძე.

ინფორმაციისთვის, სოციალურ ქსელებში არაერთხელ ვრცელდება ფოტომასალა კურორტ ბახმაროდან, სადაც ყურადღება გამახვილებულია იმაზე რომ საყოფაცხოვრებო ნარჩენებისთვის განკუთვნილი ურნები მალე ივსება, შემდეგ კი ურნებთან დატოვებულ ნაგავს ხან ძაღლები ქექავენ, ხან კი საქონელიც ეტანება.  რა საფრთხეს წარმოადგენს ცხოველებისთვის საყოფაცხოვრებო ნარჩენები- ამის შესახებ “გურია ნიუსი” ვრცელ მასალას მალე შემოგთავაზებთ, მანამდე კი როგორც ჩოხატაურის მერიაში აცხადებენ,  კურორტიდან ნაგვის გატანა დღეში ორჯერ, დილა-საღამოს ხდება და კურორტის მოვლა-პატრონობასთან დაკავშირებით ხშირად არასწორი ინფორმაცია ვრცელდება, რაც ემსახურება მხოლოდ ერთ მიზანს, შეცდომაში შეიყვანონ მოსახლეობა და მოახდინონ კურორტის და მუნიციპალიტეტის დისკრედიტაცია.