იურისტი ლევან ალაფიშვილი ბილბორდებზე მმართველი პარტიის მხარდაჭერილი კანდიდატის, სალომე ზურაბიშვილის ნაცვლად, “ქართული ოცნება _ დემოკრატიული საქართველოს” თავმჯდომარის ბიძინა ივანიშვილისა და პარლამენტის თავმჯდომარის ირაკლი კობახიძის გამოჩენას გამოეხმაურა.
ალაფიშვილის თქმით, აღნიშნული ფაქტი ადასტურებს, რომ სალომე ზურაბიშვილს პოლიტიკური სახე არ გააჩნია.
იურისტი ხაზს უსვამს, რომ ბიძინა ივანიშვილისგან განსხვავებით, პარლამენტის თავმჯდომარის ბილბორდებზე გამოჩენა საზოგადოებაზე პოზიტიურ გავლენას არ მოახდენს.
“ამ ფაქტმა დაადასტურა, რომ სალომე ზურაბიშვილს პოლიტიკური სახე არ გააჩნია.
როდესაც საარჩევნოს კამპანია დაიწყო, „ქართული ოცნება“ დაჟინებით ამტკიცებდა, რომ სალომე ზურაბიშვილი დამოუკიდებელი კანდიდატი იყო. დღევანდელმა ფაქტმა კი დაადასტურა, რომ სალომე ზურაბიშვილი არის „ქართული ოცნების“ დროშა, რომელსაც პოლიტიკური სახე არ გააჩნია. შესაბამისად, საარჩევნო პროცესში ყველა რესურსის გამოყენებით გამარჯვებისთვის იბრძვის არა სალომე ზურაბიშვილი, არამედ მმართველი პარტია.
ბილბორდებზე ბიძინა ივანიშვილის გამოჩენა, პარლამენტის თავმჯდომარისგან განსხვავებით, ამომრჩეველზე პოზიტიურ გავლენას მოახდენს. ირაკლი კობახიძე არ არის პოპულარული სახე, შესაბამისად, ის ამომრჩეველს გააღიზიანებს”, _ აღნიშნა ალაფიშვილმა.
კითხვაზე, რატომ “აწყობს” ხელისუფლებას 28 ნოემბერს საპრეზიდენტო არჩევნების მეორე ტურის გამართვა, ალაფიშვილი გვპასუხობს, რომ, ასეთ შემთხვევაში, მმართველი პარტია უპირატეს მდგომარეობაშია:
“ყველა ხელისუფლება ცდილობს, შექმნას გარემო, სადაც ამომრჩეველთა აქტივობა დაბალი იქნება. ასეთ პირობებში ხელისუფლებაში მყოფი ძალა უპირატეს მდგომარეობაშია, რადგან მას ხელი მიუწვდება ყველა სახელისუფლებო რესურსზე.
დაბალი აქტივობის პირობებში, ბუნებრივი უპირატესობის რეალიზების ცდუნება ჰქონდა და აქვს ყველა ხელისუფლებას. სწორედ ამ გზით ცდილობს “ქართული ოცნება” ძალაუფლების შენარჩუნებას”, _ აღნიშნა ალაფიშვილმა.
შეგახსენებთ, რომ საპრეზიდენტო არჩევნების მეორე ტური 28 ნოემბერს გაიმართება., ერთმანეთს “ქართული ოცნების” მხარდაჭერილი კანდიდატი სალომე ზურაბიშვილი და “ძალა ერთობაშიას” საპრეზიდენტო კანდიდატი გრიგოლ ვაშაძე დაუპირისპირდება.
