ა(ა)იპ „ჯუმბერ დუნდუას სახელობის ქართული ხალხური ცეკვების სახელმწიფო ანსამბლი „გურია“, რომლის სახელფასო ფონდზე ოზურგეთის მუნიციპალიტეტის ბიუჯეტიდან 145 500 ლარია გამოყოფილი, კონცერტებს რუსეთში მართავს.
გასტროლი ბიზნესმენ ჩხაიძეების (ასკანელები) მიერ არის დაფინანსებული და როგორც სოციალურ ქსელში გამოქვეყნებული ფოტოებით ირკვევა, ანსამბლის წვერები და ხელმძღვანელები კონცერტების შემდეგ კარგადაც ერთობიან: პოზიორობენ რუსული სამხედრო ტექნიკის _ ტანკების, გემების ფონზე და ეს ყველაფერი იმ დროს, როდესაც რუსეთში კონცერტზე სუხიშვილებმა უარი თქვეს და აქციაც გამართეს სახელწოდებით _ „რუსეთი ოკუპანტია!“
თუმცა, როგორც ჩანს, ეს ფაქტი შემაფერხებელი ფაქტორი არ აღმოჩნდა ოზურგეთელი მოცეკვავეებისთვის, რომელთა ფოტოები რუსული ტაკების ფონზე საქართველოს ისტორიის ერთ-ერთ ყველაზე ტრაგიკულ დღეს _ 9 აპრილს აიტვირთა სოციალურ ქსელში.
ამაში პრობლემას ვერც ანსამბლის ხელმძღვანელი, ოზურგეთის ყოფილი ვიცე მერი, პარტია „ქართული ოცნების“ გურიის კოორდინატორი კობა დუნდუა ხედავს, რომელიც ანსამბლს რუსეთში ახლავს:
„ჩვენ ექსკურსია გვქონდა იმ ადგილზე, სადაც მოხდა ლენინგრადის ბლოკადის გარღვევა და სადაც უამრავი ქართველი დაიღუპა _ ამ ადგილს ეწოდება “ნევსკი პიტაჩოკი”. აქ არ არის თანამედროვე ტექნიკა _ აქ გამოფენილია პირველი და მეორე მსოფლიო ომის დროინდელი სამხედრო ტექნიკა, ზუსტად ისეთი, როგორიც ოზურგეთში, სოფელ შრომაშია და თუ ტექნიკის მიხედვით ვიმსჯელებთ, ესე იგი, შრომაში ტანკის წინ გადაღებაც არ ყოფილა მისაღები“, _ აღნიშნა ჩვენთან საუბრისას დუნდუამ, რომელიც სოციალურ ქსელში გაკეთებულ შეფასებებს და საზოგადოების უარყოფით დამოკიდებულებას ამ ფაქტის მიმართ უპასუხისმგებლობას უწოდებს:
„ასეთი უპასუხისმგებლო განცხადებები არ არის მიზანშეწონილი, გამომდინარე იქედან, რომ ამ ანსამბლში სრულწლოვანებთან ერთად, არასრულწლოვანი ბავშვებიც ცეკვავენ და მსგავსმა მიდგომამ, შეიძლება, სავალალო შედეგამდე მიგვიყვანოს“, _ გვითხრა დუნდუამ.
„გურია ნიუსის“ მიერ მოპოვებულ ინფორმაციას, რომლის თანახმადაც ანსამბლმა ოკუპანტ ქვეყანაში კონცერტი 9 აპრილსაც გამართა, დუნდუა უარყოფს და აღნიშნა, რომ სცენაზე 7 და 8 აპრილს გამოვიდნენ:
„ახლა ორი კონცერტი სანკტ პეტერბურგში გვაქვს, ერთი _ კარელიის რესპუბლიკაში და ერთი _ დიდ ნოვგოროდში”, _ თქვა დუნდუამ.
ჩვენ შევეცადეთ ბიზნესმენ ჩხაიძეებს დავკავშირებოდით და მათი კომენტარი ოკუპანტ ქვეყანაში ანსამბლის კონცერტის დაფინანსების შესახებ, თუმცა, უშედეგოდ _ ბიზნესმენები კონტაქტზე არ გამოდიან.
მიუხედავად რამდენიმე მცდელობისა, ჩვენ კომენტარი მოპოვება ვერ „ქართული ოცნების“ ხელმძღვანელობისგან შევძელით და შესაბამისად, ვერ გავიგეთ, რას ფიქრობენ ისინი პარტიის რეგიონის კურატორის რუსეთში ვიზიტზე.
P. S. აღსანიშნავია, რომ სოციალურ ქსელში გაკეთებულ კომენტარებს პასუხი ანსaმბლის წევრებმაც გასცეს _ მოცეკვავე ნიკოლოზ ჩხაიძე წერს, რომ რუსეთში იქ მყოფი ქართველების გასახარად ჩავიდნენ:
„ჩვენ აქ არ ჩამოვსულვართ რუსებისთვის _ აქ ჩამოვედით აქაური ქართველების გასახარებლად რომლებიც ემიგრაციაში იმყოფებიან!!! სტატისტიკურად ყველაზე მეტი ქართველი ემიგრანტი რუსეთში ცხოვრობს (ეს არის 800 000 ქართველზე მეტი).
გამოვცხადდით ოჯახების და ქვეყნის მოღალატეებად, მივიღეთ არა ერთი დამამცირებელი სიტყვა, მაგრამ ჩვენ დავანახეთ ყველას, რომ ქართველ ადამიანში ვაჟკაცური სული ჩქეფს.
ნეტავ, რომელი ადამიანი შეძლებს გაგვეჯიბროს საქართველოს სიყვარულში?!
თურქები საუკუნეების მანძილზე გვებრძოდნენ, მაგრამ დღეს თითქმის ყველა ოჯახიდან არის თითო ადამიანი წასული თურქეთში სხვადასხვა მიზეზების გამო.
ჩვენ კი აქ რუსებისგან (იმ რუსებისგან, თქვენ რომ ასე ლანძღავთ) პატივისცემის და სითბოს მეტი არაფერი მიგვიღია _ „ჩვენგან“ განსხვავებით, ისინი კულტურას და პოლიტიკას ერთმანეთში არ ურევენ!
საქართველოს შემდეგ რუსეთი პირველი მართმადიდებლური ქვეყანაა და კარგი იქნება, თუ ლანძღვა/გინება/წყევლისაგან თავს შეიკავებდით ამ აღდგომის ბრწყინვალე შვიდეულში…“ _ წერს ჩხაიძე, რომელაც როგორც ჩანს არ იცის, რომ დღევანდელი თურქეთი და ის ოსმალეთი, რომელიც მაშინ გვებრძოდა, სულ სხვადასხვა ქვეყნებია და რუსეთი ახლაც ოკუპანტია!
აღსანიშნავია კიდევ ერთი დეტალი _ ანსამბლმა „გურიამ“ რუსეთში კონცერტები 2014 წელსაც გამართა და მაშინაც ასკანელების დაფინანსებით.
