ოზურგეთის მუნიციპალიტეტის მერიაში, რეორგანიზაციის ჩატარების გამო, სამსახურიდან, სულ ცოტა, 35 ადამიანს უშვებენ. მათ შორისაა ზედამხედველობის სამსახურის თანამშრომელი, ნინო კვაჭანტირაძე.
ქალბატონი ნინო, ყოველთვის იყო გამორჩეული თავისი კრეატიული აზროვნებით, სამსახურისადმი პასუხისმგებლობით, მეგობრებსა და სახლობლო წრეში კი მას იცნობენ, როგორც ძალიან ენერგიულ, კომუნიკაბელურ ადამიანს. ის აქ არაერთ პროექტში მონაწილეობდა და ოზურგეთის ზედამხედველობის სამსახურში კარგად იციან, რომ მისი იდეები მუდამ მოწონებას იმსახურებდა.
ნინო კვაჭანტირაძე ამბობს, რომ თავად არ იცის, რატომ უშვებენ სამსახურიდან,ასე უცერემონიოდ, იგივე ადამიანები, თანატოლები, რომლებთანაც მხოლოდ მეგობრობა და კარგი დამოკიდებულება აკავშირებდა.
მან თქვა, რომ უკვე ბოლო ხელფასიც აიღო და ფიქრობს, წავიდეს უკრაინაში, ქვეყანაში, რომლის გულმხურვალე მხარდამჭერიცაა.
_ვარკვევ კავშირებს. ავტომატს ვერ გავიდებ ზურგზე, რადგან სროლა არ ვიცი! თუმცა, წყალს რომ დავლევინებ ვინმეს, დაჭრილს რომ მოვუვლი, ბავშვებს და მოხუცებს რომ მოვეფერები, ეჭვი არ მეპარება! ეს კარგად გამომივა, _ გვითხრა მან.
რაც შეეხება სამსახურიდან გათავისუფლებას, ნინო კვაჭანტირაძემ კომენტარი გააკეთა, სადაც იუმორს და ირონიასაც არ იშურებს:
„7 წელი მუნიციპალიტეტის მერიაში ვმუშაობდი, სხვადასხვა პოზიციაზე. რამდენი სამსახურის უფროსი და მერი შევიცვალე, სათვალავი ამერია. (არითმეტიკა ჩემი სუსტი მხარეა). ვერცერთი მათგანი, ჩემ მიერ შესრულებულ სამუშაოზე, ვერ იტყვის საყვედურს. შეუცვლელი ადამიანი არ არსებობს, რა თქმა უნდა, უჩემოდაც გაგრძელდება საქმეები, მაგრამ ერთი რამ მინდა ვთქვა _ ყველა ჯერზე ახალი მერი სამსახურიდან გაშვებით მემუქრებოდა. ახალმა მუქარის გარეშე გამიშვა! ეს წინსვლაა ! გული მხოლოდ ერთ რამეზე მწყდება. არავის შეუწუხებია თავი, აეხსნა რა მიზეზით მიშვებენ სამსახურიდან. ეს რეორგანიზაციები, იცით, რას მახსენებს? მეორადებში რომ იაფად კაბას იყიდი და შენ ჭკუაზე გინდა გადააკეთო, ერთხელ გადააკეთებ, ცოტა ხანი მოგწონს, მერე ახალი იდეა გებადება და კიდე გადააკეთებ, ცოტა ხანი კიდევ ატარებ ამ კაბას და ისევ თავიდან იწყებ გადაკეთებას. ბოლოს აღარც ნაჭერი დაგრჩება და აღარც კაბა, იმდენჯერ ჩაატარეს რეორგანიზაცია რომ…“ _ გვითხრა ქალბატონმა ნინომ.
ავტორი
