ქალაქ ოზურგეთის ქუჩებში, შინაური პირუტყვის (ძროხების) სიარულსა და მათი გადადენის თუ დაჭერა-დაპატიმრების თაობაზე, ხშირად არის საუბარი მუნიციპალიტეტის საკრებულოს სხდომებზე.
თუმცა, წელს, ყველაზე მეტად ხმაურიანი იყო ეს საკითხი და არც თუ, უსაფუძვლოდ…
ქალაქის მცხოვრებლები ხშირად ამბობენ, რომ თუ დილაადრიან ოზურგეთის ქუჩებში გამოხვალთ, თვით ცენტრალურ სივრცეშიც, უამრავ ძროხას დაინახავთ. ნახირი უმეთვალყურეოდ არის მიტოვებული და ტრანსპორტის მოძრაობაში ხელის შეშლაზე რომ არაფერი ვთქვათ, ანადგურებენ გაზონებს, ხრავენ ხე-მცენარეთა ფოთლებს, ბუჩქოვნებს და აბინძურებენ ქუჩებს.
ახლახან, დილაადრიან, ჩვენ ჭავჭავაძის ქუჩაზე გავიარეთ და დავაკვირდით ვითარებას. ნანახმა ყოველგვარ მოლოდინს გადააჭარბა _ ფაქტი სასაცილოცაა და აღმაშფოთებელიც _ პირუტყვი ისე მისეირნობს ცენტრალურ ქუჩაზე, როგორც იალაღზე. ძროხები არ ერიდებიან გაზონებს, ბუჩქებს. სადამდეც მიწვდებიან, ხრავენ ხე-მცენარეთა ტოტებსა და ფოთლებს.
ასეთ დროს, უამრავ მსხვილფეხა რქოსან პირუტყვს (ძროხებს) კეთილი მურია მიერეკება. გადაჭარბების გარეშე უნდა ითქვას, რომ ის დიდხანს უყეფს ჭანჭყატის ბუჩქებზე “მობალახე” ძროხებს და აიძულებს, რაც შეიძლება მალე დატოვონ იქაურობა. ეს ბომბორა, დილაობით “გურია ნიუსის” ოფისის კარებთან გვხვდება. ხშირად ვმასპინძლობთ, ქუჩაშიც მეგობარივით მოგვყვება ხოლმე და როგორც ყველა ხედავს, კარგ საქმეზეც.
პირუტყვი კი შემდეგ თეატრის მოედანზე გადის.
მიუხედავად იმისა, რომ ოზურგეთის მუნიციპალიტეტის მერიის მიერ დადგენილია ამ პირუტყვის გადამრეკავისთვის ხელფასი და შესაბამისი სამსახურიც არსებობს (ყველას ახსოვს, სწორედ ხსენებულ საკითხზე ახლახან როგორი ხმაური იყო ოზურგეთის საკრებულოში, თითქმის, დღის წესრიგის ძირითადი დრო, აღნიშნულ თემას დაეთმო), ეტყობა, მენახირე დილით ადრე ვერ დგება.
არაერთხელ მოგვისმენია, რომ, ზოგადად, წვრილფეხა თუ მსხვილფეხა პირუტყვის ყოლის და უმეთვალყურეოდ მიტოვების შემდეგ, მათი დაჭერისა და იზოლაციის თაობაზე, მუნიციპალიტეტების საკრებულოები, ყოველთვის იღებენ გადაწყვეტილებებს.
ოზურგეთის მუნიციპალიტეტის ბიუჯეტში, 2022 წელს, გათვალისწინებულია 90 ათასი ლარი, რომელიც მიუსაფარი ცხოველების მოვლა-პატრონობას უნდა მოხმარდეს.
აღნიშნული ქვეპროგრამის გამახორცილებლად, ა(ა)იპ ოზურგეთის მუნიციპალიტეტის მომსახურების ცენტრია მითითებული.
_ ჩვენი სამსახური ახლა აღარ კურირებს მაგ საქმეს. ტენდერში ინდმეწარმე გოგი მაღლაფერიძემ გაიმარჯვა და მას ჰკითხეთ, _ გვითხრეს ოზურგეთის მუნიციპალიტეტის მომსახურების ცენტრში.
“გურია ნიუსი” გოგი მაღლაფერიძეს დაუკავშირდა.
_ დიახ, ნამდვილად მე მევალება ეგ საქმე. აპრილში იყო ტენდერი და ჩვენ გავიმარჯვეთ. იზოლატორი სოფელ ოზურგეთში გავაკეთეთ. ახლაც ვმუშაობთ სამუშაოთა დასრულებაზე. იზოლატორი უკვე მზად არის 4-5 სული პირუტყვის დასაბინავებლად. შეგიძლიათ მობრძანდეთ, დაათვალიეროთ.
_ დაჭერილი თუ დაპატიმრებული პირუტყვი გყავთ?
_ როგორ არა. ახლა ერთი ძროხა 20 დღეა, აქ გვყავს. პატრონი არ გამოჩენილა.
_ მოვლას და კვებას თქვენ ახდენთ? სულ რომ არ მოვიდეს პატრონი, რას იზამთ?
_ დიახ, ჩვენ ვუვლით. რას ვიზამთ და ერთი თვის შემდეგ, სასაკლაოზე, წესების დაცვით, დავკლავთ. გაიყიდება, თანხას მოვლა-პატრონობის ხარჯი გამოაკლდება, დანარჩენი ბანკში შეინახება და როცა გამოჩნდება პატრონი, წაიღებს… მე დღესაც ვიყავი გასული ქალაქის ქუჩებში. სულ დავდივარ. ..
_ სულ თუ დადიხართ, რატომ არის ამდენი ნახირი ოზურგეთის ცენტრალურ ქუჩებში?
_ რა ვიცი. ასე შვებიან. დავიჭირეთ რამდენჯერ. პატრონებს ჯარიმაც გადავახდევინეთ.
შარშან, ერთი წლის მანძილზე 200 ძროხა გვყავდა დაჭერილი…
_ და ყველას გადაახდევინეთ ჯარიმა? რამდენია ეს თანხა?
_ უმეტესად გადავახდევინეთ. ვინც სოციალურად დაუცველი იყო, მხოლოდ მათთვის არ გამოგვიწერია ჯარიმა. ჯარიმას გააჩნია _ 50 ლარია. თუმცა, ვთქვათ, ხუთი სული ერთი ოჯახიდანაა დაპატიმრებული, მაშინ მხოლოდ 50 ლარით ვაჯარიმებთ. თითოეულ ძროხაზე კი, მოვლა-შენახვისთვის, ერთ დღეში ათ ლარს გადაიხდის… ზოგი საღამოს რომ მოწველის ძროხას, ღამე გადაღმა უშვებს.
_ ბატონო გოგი, რამდენი თანამშრომელი გყავთ და რას შეადგენს მათი ხელფასი?
_ სულ ცხრა თანამშრომელია. სამას ლარი აქვთ ხელფასი. ახლა ბრიგადირი ავად არის, კოვიდი აქვს და ცოტა ხელი შეგვეშალა. როგორ გგონიათ, ჩვენი ხალხი რომ არ დარბოდეს, ყოველდღე ასეთი ამბავი არ იქნება, როგორც ახლა ნახეთ?
ახლა მოვუსმინოთ, რას ამბობენ რიგითი ოზურგეთელები.
ლილი დოლიძე, ოზურგეთის მკვიდრი: “სამი მუყაითი ადამიანი რომ მუშაობდეს, თითოეულს რომ 500 ლარიანი ხელფასი დაუნიშნონ, თვეში ათი დღე გამოუვათ მუშაობა და ამ ქალაქს ეყოფა. დილით რომ გამოვიდნენ და ეს ძროხები გადარეკონ, დიდი ამბავია? ამდენი ხალხია დასაქმებული და იმასაც გვეუბნებიან, სამას ლარად ძროხას არ გამოეკიდებიანო… აბა, სამი ათასი უნდათ თუ რამდენი? სირცხვილით როგორ ამბობენ ამას? დილაადრიანად გამოფენილია ძროხები ჭავჭავაძის ქუჩაზე. სხვა ქუჩებზეც იგივე ხდება”.
ნინო წულაძე, ოზურგეთის მკვიდრი: “საერთოდ არ ეტყობა საქმეს, რომ ამ უთავბოლოდ მიშვებულ პირუტყვზე ვინმე მზრუნველობს. დილაობით ყველგან ასე დახეტიალობს პირუტყვი. ხან პოლიციის შენობის კიბეზეც დამინახავს. ან პატრონები რას ფიქრობენ, როცა ასე უპასუხისმგებლოდ უშვებენ ქუჩებში?! ძროხები ქალაქში არ უნდა დასეირნობდნენ. გაგაოცებს ხალხი…”
პირუტყვის გადარეკვასა და ამ საქმისთვის გამოყოფილი თანხების თაობაზე, დეპუტატ თათია ნიკოლაშვილისთვის, მერიის მიერ მიწოდებული საჯარო ინფორმაცია, ასეთი სახისაა:
“თქვენი განცხადების პასუხად გაცნობებთ, რომ მიუსაფარი ცხოველების მოვლა-პატრონობა პროგრამის (03 03 02) ფარგლებში, წლის დასაწყისიდან, 31 აგვისტოს ჩათვლით, 215 ძაღლს ჩაუტარდა სამედიცინო სამუშაოები (ვაქცინაცია, კასტრაცია, აცრა). ხოლო რქოსანი პირუტყვის უკონტროლო გადაადგილება ხორციელდება ყოველდღიური და სადღეღამისო სისტემატური კონტროლით, მუნიციპალიტეტის ტერიტორიაზე (დ. აღმაშენებლის და თავისუფლების ქუჩის კვეთამდე, კოსტავას და შევარდნაძის ქუჩის კვეთამდე. თაყაიშვილის ქუჩა, ლესელიძისა და ჯანაშიას ქუჩა, (ყოფილი საავადმყოფოს შენობამდე) და ერისთავის ქუჩა-ურეკი, შეკვეთილი). მეთვალყურეობის ქვეშ ან მეთვალყურეობის გარეშე მყოფი პირუტყვის გამოვლენის და პირუტყვებისგან ტერიტორიების დაცვის მიზნით.
შესრულებული სამუშაოს ღირებულებამ, ექვს თვეში შეადგინა (რქოსანი პირუტყვის უკონტროლო გადაადგილებისთვის) 30 280 (ოცდაათი ათას ორას ოთხმოცი) ლარი”.
_ რა გამოდის? ერთი სული ძროხის გადადენა დაჯდა 500 ლარი? _ დასვა კითხვა თათია ნიკოლაშვილმა სხდომაზე, რაზეც საკრებულოს დეპუტატებისგან მიიღო პასუხი, რომ ელემენტარულ არითმეტიკაშიც ვერ ერკვევა.
თუ როგორ მიხედავენ ქალაქში პირუტყვის უკონტროლო გადაადგილების საქმეს, ინდმეწარმე გოგი მაღლაფერიძე ამბობს, რომ მის სამსახურში სულ ყოჩაღობენ. თუ რატომ არის ხალხი უკმაყოფილო და ხშირად რატომ ჩანს ოზურგეთის ქუჩებში ძროხები, ამბობს, რომ ქალაქის ბევრი გარეუბნიდან და სოფლებიდანაც კი, აქეთ შემოდის პირუტყვი და ექვსი თუ ცხრა ადამიანის მეშვეობით მათი გადადენა, ყოველთვის ვერ ხერხდება:
_ რომელ ერთ მხარეს უნდა დაუყარაულდე? ექადიის უბნიდან პირდაპირ წყალში, ბჟუჟში გამოდიან და ასე შემოდიან ქალაქის სივრცეში. სოფელ ოზურგეთიდან, ყაზბეგის ქუჩიდან, მაკვანეთიდანაც კი ქალაქში შემოდიან. ორ-ორი კაცი ყველგან გვყავს დაყენებული. თუმცა, ზოგჯერ ვერ ხერხდება გადარეკვა. რომ არ ვმუშაობდეთ, სულ ისეთი სურათი იქნება, როგორიც ნახეთ, _ გვითხრა მაღლაფერიძემ.
თუ ლოგიკურად ვიმსჯელებთ, რაკი კონკრეტულ დღეებში პირუტყვი საერთოდ არ ჩანს ქალაქის ქუჩებში, არაერთხელ კი ნახირი შესეულია ხეებსა და გაზონებს, ესე იგი, ხსენებულ სამსახურში დასაქმებული ადამიანები ხან მუშაობენ, ხან _ არა… ამიტომ სერიოზული, ქმედითი ღონისძიებაა გასატარებელი, რომ ქალაქის ქუჩებში პირუტყვი, როგორც საბალახო მინდვრებზე, ისე არ დასეირნობდეს.
ავტორი
