მიუხედავად იმისა, რომ წელს გურიაში თხილს კარგად ასხია და შესაბამისად, მოსავალიც უხვი უნდა იქნეს, ხალხში მაინც იმედგაცრუება სუფევს.
ოზურგეთში სულ უფრო აქტიური ხდება მოარული ხმები, რომ წელს თხილს ფასი, საშუალოდ 2 -2,50 ლარს არ ასცდება.
„თადარიგი დაიჭირეს მაფიოზებმა და ყრიან ხმებს. გამმეორებელის მეტი რა არის? ისედაც დამფრთხალი ხალხის შეშინებას რა უნდა? გასულ წელს, ამ დროს, ერთი კილოგრამი თხილი 9 ლარი ღირდა! ახლა კი, 3 ან 4 ლარი ღირს! რაც უნდა ხარისხიანი იყოს, არავინ არ მოგცემს მეტს! მორჩა! – გვეუბნებიან დღეს, დილაადრიან ოზურგეთის თხილის მიმღებ პუნქტებში.
თხილის ახალი მოსავლის მიღებამდე თვენახევარიღა რჩება. თუმცა, მიუხედავად იმისა, რომ ხალხმა ბოლო სამი წლის მანძილზე აქტიურად იმუშავა, გაიჭირვა, პლანტაციები შეწამლა და საგრძნობლად გაუმჯობესდა თხილის ხარისხი, სწორედ ასეთ დროს, ამ კულტურის ფასი კიდევ უფრო დაეცა.
-შარშან, გაზაფხულზე, ხალხი პლანტაციებს იყო შესეული. დაწყებული იყო შეწამვლა. აპარატები გუგუნებდნენ ეზოებში. ახლა? ჩამიჩუმი არ ისმის. ფასი ისევ ისე დაუგდეს ამ მარჩენალ კულტურას, ადამიანებმა ხელი ჩაიქნიეს ისევ და არც შეწამვლაზე ფიქრობენ, _ გვეუბნებიან შეწუხებული მოქალაქეები.
-მეზობლები და ნაცნობები მყავს ლიხაურში, ნაგომარში, ჭანიეთში. ერთეულებს, მაგრამ მაინც აქვთ სამი-ოთხი ტონა თხილი შენახული. გადარჩეული, ხარისხიანი. ფასი რომ არ ჰქონდა, ფიქრობდნენ, აიწევს და ჩავაბარებთო. რის აწევა? უარეს დღეში ჩაგვაგდეს. საოცარია. მგონი, სადღაც სხედან ვიღაცები და თათბირობენ: „მოდით, ვცადოთ, უფრო წავუჭიროთ, ეს ხალხი, ეტყობა, მეტ გასაჭირს გაუძლებსო.ვინ მიუშვა ეს ყველაფერი ასე თავის ნებაზე? _ ბრაზობდა დილაადრიან ოზურგეთელი ნონა კალანდაძე.
_ჩვენ, ჩვენ, სხვამ არავინ, ხალხის ბრალია. ხალხს ყველაფერი შეუძლია, მაგრამ ძინავს…_ გამოსძახა გაბრაზებულმა მეთხილემ სასტუმრო „გურიას“ ეზოში მდებარე ერთ-ერთი თხილის მიმღები პუნქტიდან.
როგორც ვთქვით, დღეის მდგომარეობით და ასეა იანვრიდან მოყოლებული, ოზურგეთში ერთი კილოგრამი თხილი, საშუალოდ სამი ლარი ღირს. არ აქვს მნიშვნელობა ხარისხს.
_თუ გინდა მაჭახელასავით გადატენილი გული ჰქონდეს. გატეხავენ, ჩეიხედავენ შიგ და აიჩეჩავენ მხრებს-რა ვქნათ, კარგია, მაგრამ ქარხნებმა ეს ფასი დაგვიდგინეს, სხვა მყიდველებსაც იგივე შემოთავაზება აქვთ. სხვა ფასი არ იქნებაო. როცა ვსაუბრობთ, რომ ხალხს შენახული აქვს კარგი ხარისხის თხილი და ცოდოა ადამიანები, ასეთ დაბალ ფასში როგორ უნდა ჩააბარონ-თქო, ქარხნების უფროსები არ დარდობენ. სად წაიღებენ, აბა, არ ჩააბარებენ, ბოლო-ბოლოო? – სიმართლეს ხუმრობითაც ხშირად ამბობენ თხილის მიმღები ოპერატორები.
მართალია, ჯერ ოფიციალურად არავის გამოუცხადებია თხილის ფასი ახალი სეზონისთვის, კრეფის დაწყებამდე კიდევ დროა, თუმცა ყველა კუთხეში, სადაც კი თხილის სავარაუდო ფასზე საუბრობენ, იმედიანი არაფერი ისმის. ამბობენ, რომ როგორი ხარისხის მოსავალიც უნდა აიღონ წელს ფერმერებმა, ფასი მაინც დაბალი იქნება.
ავტორი
