რომის პაპმა ფრანცისკემ რუსეთს უკრაინიდან ხორბლის ექსპორტზე ბლოკადის მოხსნისკენ მოუწოდა და აღნიშნა, რომ ძირითადი საკვები არ უნდა იყოს გამოყენებული ომის იარაღად.
პაპის თქმით, „დიდი შეშფოთებით“ ადევნებს თვალს უკრაინის პორტებში არსებულ ვითარებას.
“მილიონობით ადამიანის სიცოცხლე დამოკიდებულია ხორბლის ექსპორტზე, განსაკუთრებით ყველაზე ღარიბ ქვეყნებში. გულწრფელად მოგმართავთ, ნებისმიერი ძალისხმევა მიმართული იყოს ამ პრობლემის მოსაგვარებლად, რათა გარანტირებული იყოს ადამიანის უნივერსალური უფლებები დაცვა. გთხოვთ, არ გამოიყენოთ ხორბალი, ძირითადი საკვები, როგორც ომის იარაღი”, – ამბობს პაპი ფრანცისკე.
უკრაინის შავი ზღვის პორტები ომის დაწყების შემდეგ არის დაბლოკილი – პორტებს ვერ ტოვებს უკრაინული გემები, რომლებიც 20 მილიონ ტონაზე მეტი მარცვლეულით არის დატვირთული. რუსეთისა და უკრაინის მიერ მიწოდებულო ხორბალი მსოფლიოს მარაგის თითქმის მესამედს შეადგენს, ამიტომ, მარცვლეულის ექსპორტის შეფერხება სასურსათო კრიზისის შექმნას უწყობს ხელს. ასევე, უკრაინა არის სიმინდისა და მზესუმზირის ზეთის ყველაზე მსხვილი ექსპორტიორი.
დასავლეთის ქვეყნების ლიდერები უკრაინის პორტებიდან მარცვლეულის გამოტანისთვის “უსაფრთხო დერეფნების” შექმნაზე საუბრობენ და ამბობენ, რომ საკითხს რუსეთის თანხმობა სჭირდება.
უკრაინა მუშაობს “გაერო-ს ხელმძღვანელობით საზღვაო ოპერაციაზე” პარტნიორი ქვეყნების საზღვაო ფლოტებთან ერთად, რათა უზრუნველყოს უსაფრთხო სავაჭრო გზა მისი სოფლის მეურნეობის პროდუქტების ექსპორტისთვის, განაცხადა სამშაბათს უკრაინის საგარეო საქმეთა მინისტრმა დმიტრო კულებამ.
უკრაინის პრეზიდენტმა ვოლოდიმირ ზელენსკიმ ადრე თქვა, რომ 22 მილიონი ტონა მარცვლეული, რაც უკრაინის მარცვლეულის ექსპორტის თითქმის ნახევარს შეადგენს, შეჩერებულია რუსეთის მიერ ძირითადი საექსპორტო მარშრუტების ბლოკადით.
კრემლმა არაერთხელ უარყო ბრალდებები უკრაინიდან მარცვლეულის მიწოდების დაბლოკვის შესახებ და დაადანაშაულა დასავლეთი იმ ქმედებებში, რამაც გამოიწვია ეს კრიზისი.
ავტორი
