სირცხვილია, საბოლოო ჯამში, რაზეც ვსაუბრობთ – ევროკავშირის ფული ფარულად, სპეცსამსახურების მეთოდებით იხარჯება საქართველოში. ეს არის ფაქტი, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
პაპუაშვილის თქმით, არანაირი ანგარიშვალდებულება არ აქვთ არც საქართველოს და არც ევროკავშირის მოქალაქეების მიმართ, რაში იხარჯება საქართველოში მათი ფული.
„ზოგიერთ ელჩს აქ რომ ვეკითხები, საერთოდ წარმოდგენა არ აქვთ, EED როგორ ხარჯავს აქ ფულს. იმავეს აკეთებს ამერიკის დემოკრატიის ფონდი (NED), რომელიც ასევე ფარულად, იატაკქვეშიდან ხარჯავს ფულს. აქამდე თუ იყო მიამიტობა, გაურკვევლობა, ერთი წელი მე ინტენსიურად ვსაუბრობდი დონორებთან, მათ შორის, ევროკავშირის ზოგიერთ წარმომადგენელთან დაფინანსების გამჭვირვალობის აუცილებლობაზე, ამ მხრივ შედეგი არის ნული. როგორც ჩანს, ევროკავშირში არის რაღაც სტრუქტურები, რომლებსაც აწყობთ, რომ არსებობდეს აქ ერთგვარი ფარული ყულაბა, რომლითაც პოლიტიკურ პროცესებზე ზეგავლენის მოხდენის შესაძლებლობა ექნებათ. ეს არის ყველაზე ანტიევროპული ქცევა, რითიც დღეს ევროკავშირის ზოგიერთი ინსტიტუცია, მათ შორის, „ევროპის დემოკრატიის ფონდი“ არის დაკავებული, რომელიც, ფაქტობრივად, პოლიტიკურ კორუფციაში ხარჯავს ფულს. ევროკავშირის ფული დღეს საქართველოში EED-ს მეშვეობით პოლიტიკურ კორუფციაში იხარჯება“, – განაცხადა შალვა პაპუაშვილმა.
