აზიური მავნებლის, ფაროსანას შემოსვლა საქართველოში რომ ხალხის, განსაკუთრებით მეურნე ადამიანების თავსატეხად იქცა, დღეს ყველამ იცის, თუმცა, განვლილი თვეების მიხედვით თუ ვიმსჯელებთ, ადამიანები უფრო წუხილით არიან დაკავებული, ვიდრე მავნებლის წინააღმდეგ ეფექტური ღონისძიებების გატარებით. ბევრს ისევ არ სჯერა, რომ საკუთარი მოქმედებით შეუძლია მავნებლის წინააღმდეგ იბრძოლოს და სერიოზულ შედეგს მიაღწიოს. ამიტომ კვლავ აქტიურად სვამენ კითხვას _ შეუწამლავენ თუ არა საკარმიდამო ნაკვეთებს?
დღეისთვის, ნოემბრის დასაწყისში, მავნებელი ფაროსანა, ასე ვთქვათ, „მიძინების“ პროცესშია. აცივების გამო, ის მიიწევს სახლებსა და სხვადასხვა შენობა-ნაგებობებში.
ჩვენ მიერ გამოყენებულმა მარტივი წესით მომზადებულმა მუყაოს ყუთის მექანიკურმა კონსტრუქციამ (რომელშიც ფიჭისებურად ჩავალაგეთ ისევ მუყაოს ფირფიტები და ზედ სპეციალური ინსექტიციდის ფირფიტა მივამაგრეთ), ზაფხულის ბოლოს და სექტემბერ-ოქტომბრის განმავლობაში უამრავი ფაროსანა მოიზიდა, რის განადგურებაც ადვილად მოხერხდა. აივნის პერიმეტრზე, სადაც ჩამოკიდებული იყო ყუთი, ერთი კვირის ან ათი დღის განმავლობაში ვხსნიდით და ფაროსანას ვანადგურებდით, შემდეგ კი ხელახლა ვაწყობდით და იმავე ადგილზე ვკიდებდით. 
დღეისთვის ფაროსანა რიცხვმა იკლო, რადგან უკვე შეყუჟულია თბილ ადგილებში. თუმცა, მუყაოს ყუთის თავშესაფარს ინსექტიციდის ფირფიტით კიდევ ერთხელ დავკიდებთ ნოემბრის შუა რიცხვებამდე, რომ თუნდაც ერთი მავნებლის განადგურება მოვახერხოთ. აქა-იქ გამოჩნდა ნიმფებიც, რომელიც სპეციალისტთა აზრით, ამ პერიოდისთვის ნაკლებად გადაურჩება სიცივეს და ზრდასრულ ასაკს ვერ მიაღწევს, თუმცა, აუცილებლად უნდა გავანადგუროთ.
ერთ-ერთი ჩვენი რესპოდენტი კახა კობალავა გვიამბობს, რომ დაეზარა მუყაოს ყუთის თავშესაფრის მომზადება და საამისოდ ძველმანი სამოსი გამოიყენა.
_ მოვძებნე ერთი შინელი, რომელიც სამხედრო სამსახურიდან დაბრუნების შემდეგ, მამაჩემს ძველ სათავსში უსარგებლოდ ეკიდა. უფრო სწორად, ერთ დღეს ჩამოვიღე და შიგ უამრავი ფაროსანა იყო შეყუჟული. გავიტანე ეს შინელი და პატარა მსხლის ხეზე ჩამოვკიდე. იმდენი ფაროსანა შევიდა ამ შინელში, არ მგონია, ამ რაოდენობით მუყაოს ყუთის თავშესაფარში დაბუდებულიყო, _ გვიამბობს ის.
რა თქმა უნდა, ვეთანხმებით და საუკეთესოა ეს მეთოდიც, თუცა მუყაოს ყუთზე მიმაგრებული ინსექტიციდის ფირფიტა ახერხებს, რომ ყუთში შესვლაზე უფრო, ირგვლივ პერიმეტრზე უამრავ ფაროსანას მოუყაროს თავი. ამის პრაქტიკული გამოვლინება უკვე არაერთხელ ვნახეთ საკუთარი მაგალითით.
ახლა მუყაოს თავშესაფრის ბოლო ბინადრებს ვაკვირდებით, რომლებიც არც ისე მრავალრიცხოვანია და ადრინდებურად აქტიური აღარაა. თუმცა, სწორედ ახლა, 15 ნოემბრამდე, სანამ ჯერ კიდევ თბილა და მზიანი ამინდებია, განსაკუთრებით უნდა ვიფხიზლოთ და მთვლემარე მწერს ყველგან მივდიოთ. შემოვიაროთ სათავსოები, სახლების კუთხე -კუნჭული, სადაც ბლომად ვიპოვით. ხოლო საკარმიდამო ნაკვეთებში შევაგროვოთ და დავწვათ ყოველგვარი ხმელი ფოთლები, ნარჩენები, ნახერხი თუ ნაფოტების გროვები. ასეთ ადგილებსა და გროვებში უხვადაა შეყუჟული ფაროსანა, რომელიც, ასე ვთქვათ, გაზაფხულისთვის მასპინძელ მცენარეებზე შეტევისთვის ემზადება და საკუთარი იერიშის ძალას ჩვენც მაშინ გვაგრძნობინებს. ამიტომ ყოველი წუთი ძვირფასი სწორედ ახლაა, შევუდგეთ საქმეს. ვიფხიზლოთ და ყოველდღიურად დავასუფთაოთ შენობები თუ საკარმიდამო ნაკვეთები, რათა გაზაფხულზე, რაც შეიძლება ნაკლები მავნებელი გამოვიდეს სამალავებიდან.
