ლანჩხუთში არსებული ხელოვნურსაფარიანი მინი-სტადიონების მდგომარეობა საკმაოდ სავალალოა. მიუხედავად იმისა, რომ მათი მოწესრიგების საკითხი არაერთხელ წამოუწევია წინა პლანზე დეპუტატთა ნაწილს წინა ორი მოწვევის საკრებულოში, სამწუხაროდ, ამ კუთხით აქამდე არაფერი გაკეთებულა.
ადგილობრივი ხელისუფლების ოპონენტთა არგუმენტით, იმ ფონზე, როცა მილიონობით თანხები იხარჯება, მათ შორის, საკუთრივ ქალაქის ტერიტორიაზე, ახალგაზრდების ჯანსაღი ცხოვრების წესის ამაღლებისთვის რამდენიმე ათასი ლარის გამოყოფა და ინფრასტრუქტურის პროექტების ნუსხაში არსებული სტადიონების რეაბილიტაციის საკითხის მოხვედრა, პრობლემა არ უნდა იყოს.
“ვითომ ფეხბურთის განვითარებისთვის ადგილობრივი ბიუჯეტიდან უხვად მიდის თანხები, ახალი საფეხბურთო კლუბი “ჩიბათიც” შექმნეს და 15 ათასი ლარი გამოუყვეს; “გურიას” დავალიანებების გასასტუმრებლადაც მოიძიეს ათობით ათასები, ამ სტადიონების რეაბილიტაციისთვის კი თითიც არავის გაუნძრევია. არადა, სანამ დიდ ფეხბურთზე რამეს გავიფიქრებთ, უნდა გვახსოვდეს, რომ ფეხბურთი ქუჩიდან იწყება, სადაც ბავშვებს ელემენტარული პირობებიც კი არ აქვს.
რამდენიმე ათასი ლარი დაიხარჯა გასულ წელს საფო მგელაძისა და ურუშაძის ქუჩების კვეთაზე მინი-სტადიონის მოსაწყობად. საინტერესოა, ვის მოუვიდა აზრად იქ სტადიონი გაეკეთებინა, როცა ქალაქის ცენტრში რაც გვაქვს, თავზე გვემხობა?! ხეირიანად მაინც გაეკეთებინათ, უბრალოდ, ღობე შემოავლეს და ზედ ათასები მიახარჯეს”, _ ამბობენ ხელოვნურსაფარიან სტადიონებზე არსებული მდგომარეობით შეწუხებული ლანჩხუთელები და იმასაც დასძენენ, რომ თავისუფლების ქუჩაზე მდებარე მინი-სტადიონის რეაბილიტაცია სტიქიის თანხებიდანაც იყო შესაძლებელი:
“ურუშაძის გამგებლობისას სტიქიის თანხები ლანჩხუთში მსუყედ მოდიოდა და არაერთი ობიექტი გაკეთდა, თუმცა, დუნდუას სტადიონი დარჩა გამონაკლისი. ქარმა იმხელა ხე მოგლიჯა და ისედაც სავალალო მდგომარეობაში მყოფი სტადიონი საბოლოოდ გამოიყვანა მწყობრიდან, მაგრამ რატომღაც ადგილობრივ ხელისუფლებაში მაშინ არავინ მიაქცია ამას ყურადღება _ სხვა “პრიორიტეტები” გამოუჩნდათ”.
ლანჩხუთში პირველი ხელოვნურსაფარიანი სტადიონი ჟორდანიას სახელობის მინი-სტადიონია, რომელიც 2003 წელს, მაშინდელმა ფეხბურთის ფედერაციის ხელმძღვანელმა მერაბ ჟორდანიამ გააკეთა. სამი წლის შემდეგ სპორტისა და ახალგაზრდობის საქმეთა სამინისტროს გადაწყვეტილებით, ახალი სტადიონის მშენებლობა სპორტული სკოლის მიმდებარედ გახორციელდა.
აქედან სამ წელიწადში, თავისუფლების ქუჩაზე კიდევ ერთი მინი-სტადიონი გაკეთდა, რომელიც იმედო დუნდუას სახელს ატარებს. სწორედ ამ უკანასკნელზე მოდიოდა ძირითადი დატვირთვა, როგორც ქალაქის მოსახლეობის, ასევე ბავშვთა საფეხბურთო სკოლების აღსაზრდელების მხრიდან.
იქიდან გამომდინარე, რომ დროთა განმავლობაში, აღნიშნული სტადიონების ინფრასტრუქტურა ზიანდებოდა და ნაწილობრივ შეკეთებას მოითხოვდა, წლების წინ, ჯერ ჟორდანიას სტადიონის საფარი და დამცავი ღობე შეკეთდა, შემდგომ სპორტული სკოლისაც. დუნდუას სახელობის სარბიელის რეაბილიტაცია კი, რომელსაც ხელი არც სტიქიამ დააკლო, აქამდე არ გახორციელებულა. დღეის მდგომარეობით, სამივე სტადიონზე არსებული სიტუაცია ნათლად მოითხოვს სრულ რეაბილიტაციას.
როგორც მერიის ინფრასტრუქტურისა და არქიტექტურის უფროსთან, ლევან ჩხაიძესთან საუბრის შედეგად გავარკვიეთ, საფო მგელაძისა და ურუშაძის კვეთაზე მინი-სტადიონი გასულ წელს მოეწყო და საამისოდ დაახლოებით 20 ათასი ლარი გაიხარჯა:
“აქ, დაახლოებით, 20 ათასი ლარის ღირებულების სამუშაოები შესრულდა. თავიდან გეგმაში იყო ხელოვნურსაფარიანი სტადიონი გაკეთებულიყო, თუმცა, ამან გაცილებით დიდი ხარჯები მოითხოვა და დროებით მიწაყრილი დავტოვეთ”, _ ამბობს ჩხაიძე და აქვე დასძენს, რომ ზემოთ ნახსენები ხელოვნურსაფარიანი სტადიონების რეაბილიტაციის საკითხთან დაკავშირებით მერიაში აქტიური მსჯელობა მიმდინარეობს: “ამ საკითხზე მსჯელობა და საუბრები მიმდინარეობს. ყველა სტადიონის რეაბილიტაცია ამ წელს შეიძლება ვერ მოხერხდეს, ამიტომ სამუშაოები ეტაპობრივად გახორციელდება”.
აღსანიშნავია, რომ ლანჩხუთში სტადიონების პრობლემის მოგვარება ჯერ კიდევ 2015 წელს იგეგმებოდა და შესაბამისი პროექტიც გამზადებული იყო. მაშინ მუნიციპალიტეტის ზოგიერთი ხელმძღვანელი პირისგან იყო იმედის მომცემი განცხადებები, რომ საკითხი ქალაქის ინფრასტრუქტურული პროექტების ნუსხაში მოხვდებოდა და 2015 წელს ჟორდანიას სახელობის სტადიონის სრული რეაბილიტაცია მაინც გახორციელდებოდა. თუმცა, მაშინდელმა მოლოდინმა არ გაამართლა.
ამ მხრივ, მოლოდინმა არც 2016 წელს გაამართლა, არადა, მაშინდელმა გამგებელმა ხელოვნურსაფარიანი მინი-სტადიონების უშუალო მონახულების შემდეგ მუნიციპალიტეტი ოფიციალური გვერდიდან დააანონსა, რომ ჟორდანიასა და დუნდუას სახელობის სტადიონებზე ინფრასტრუქტურული სამუშაოები უნდა გახორციელდეს:
“ყველაფერი უნდა გაკეთდეს იმისთვის, რომ ბავშვთა ფეხბურთის განვითარებას მაქსიმალურად ხელი შევუწყოთ. აღნიშნულ ხელოვნურსაფრიან სტადიონებზე რეგიონული და ადგილობრივი ტურნირები პერიოდულად ჩატარდება”, _ ასეთი იყო მაშინ ზაზა ურუშაძის კომენტარი.
დამაიმედებელ პროგნოზს ლანჩხუთის მერიაში ამ ჯერზეც აკეთებენ და პირობას იძლევიან, რომ სტადიონებზე ინფრასტრუქტურული სამუშაოები წელს დაიწყება. ჯერჯერობით, ვერ აკონკრეტებენ, რა ღირებულების იქნება პროექტი და პირველად რომელი სტადიონის რეაბილიტაცია მოხდება.
