“პეტიცია პირდაპირ პასუხობდა მოსახლეობის ინტერესებს“ _ არასამთავრობოები

ქალაქ ოზურგეთში მოქმედი არასამთავრობო ორგანიზაციები ერთობლივ განცხადებას ავრცელებენ, რომელიც ქალაქ ოზურგეთის მუნიციპალიტეტში ბაღებსა და სკვერებში შენობა-ნაგებობების დადგმის აკრძალავს ეხება, აღნიშნული პეტიცია საკრებულომ არ დაამტკიცა.

„ქალაქ ოზურგეთში მოქმედი 8 არასამთავრობო ორგანიზაციის წარმომადგენლებმა 2017 წლის თებერვალში მივმართეთ ქალაქ ოზურგეთის მუნიციპალიტეტის საკრებულოს პეტიციის წესით. კერძოდ, პეტიციის სახით წარდგენილი იქნა საინიციატივო ჯგუფის მიერ მომზადებული სათანადო ნორმატიული აქტის პროექტი, რომელიც ითვალისწინებდა ქალაქის საზოგადოებრივი სივრცეების (როგორიცაა: ქუჩები, ტროტუარები, პარკები და სხვ.) აუქციონის გარეშე, პირდაპირი განკარგვის წესით, სარგებლობის უფლებით გაცემისა და ქალაქის სარეკრეაციო ტერიტორიებზე (როგორიცაა: ბაღები, სკვერები და ა.შ.) შეუსაბამო მშენებლობების შეზღუდვას.

გარდა იმისა, რომ პეტიცია პირდაპირ პასუხობდა ქალაქ ოზურგეთის მოსახლეობის ინტერესებს, ის, ამავე დროს, წარმოადგენდა სამოქალაქო თვითორგანიზებისა და ჩართულობის მნიშვნელოვან პრეცედენტს: საინიციატივო ჯგუფმა, მოქმედებდა რა ყოველგვარი გრანტისა და დაფინანსების გარეშე, თავად უზრუნველყო შესაბამისი ნორმატიული აქტის პროექტის შემუშავება, ასევე პეტიციის წარსადგენად საჭირო რაოდენობის ამომრჩეველთა (ქალაქ ოზურგეთის მუნიციპალიტეტის ტერიტორიაზე რეგისტრირებული ამომრჩევლების არანაკლებ 1%-ის) ხელმოწერების შეგროვება და 200-მდე მოქალაქის ხელმოწერით დადასტურებული პეტიციის (საკრებულოს დადგენილების პროექტის) წარდგენა ქალაქ ოზურგეთის მუნიციპალიტეტის საკრებულოსთვის (ამით პეტიცია, შეიძლება ითქვას, უნიკალურ მოვლენას წარმოადგენდა მთელი საქართველოს მასშტაბით). განსაკუთრებით მნიშვნელოვანი იყო ეს პეტიცია იმ ფონზე, რომ ქალაქ ოზურგეთის მუნიციპალიტეტში, როგორც თვითმმართველ ერთეულში, მიუხედავად  ვალდებულებისა, არ არის დანერგილი კანონმდებლობით გათვალისწინებული სამოქალაქო ჩართულობის მექანიზმები: საზოგადოებრივი დარბაზი (საკრებულოსთან), სამოქალაქო მრჩეველთა საბჭო (მერთან), ასევე არ მუშაობს დასახლების საერთო კრების ინსტიტუტი. მნიშვნელოვანწილად, სწორედ ამ გარემოებამ განაპირობა საინიციატივო ჯგუფის არჩევანის შეჩერება პეტიციის ყველაზე რთული ფორმის განხორციელებაზე – პეტიციის სახით ნორმატიული ადმინისტრაციულ-სამართლებრივი აქტის პროექტის წარდგენაზე.

მიუხედავად იმისა, რომ წარდგენილი ნორმატიული აქტის პროექტი სრულად შეესაბამებოდა მოქმედ კანონმდებლობას, ქალაქ ოზურგეთის მუნიციპალიტეტის საკრებულომ, 2017 წლის 26 აპრილის სხდომაზე, სამწუხაროდ, უარი თქვა მოქალაქეების ინიციატივის მხარდაჭერაზე (ძალაში დატოვა ქალაქის მართვის არსებული პრაქტიკა) და, ფაქტობრივად, მიიღო გადაწყვეტილება, რომელიც კარგად ასახავს ადგილობრივი ხელისუფლების დამოკიდებულებას (პოლიტიკას) საზოგადოებრივი აზრის გათვალისწინებისადმი. თითქმის საათნახევრიანი განხილვის შემდეგ გამართულ კენჭისყრაზე მოქალაქეთა ჯგუფის (200-მდე ამომრჩევლის) მიერ ინიცირებულ პეტიციას მხარი არ დაუჭირა საკრებულოს 8 წევრმა: ნინო გოგუაძემ, ვასილ ჩიგოგიძემ, მედეა მახარობლიძემ, ნინო ტაბატაძემ, ნანული ორაგველიძემ, ირინე საჯაიამ, კახა კვაჭაძემ, ლევან თოიძემ.

იმედს გამოვთქვამთ, რომ ქალაქ ოზურგეთს მომავალშიც შეუნარჩუნდება თვითმმართველი ქალაქის სტატუსი, კვლავ ეყოლება პირდაპირი წესით არჩეული საკუთარი წარმომადგენლობითი (საკრებულო) და აღმასრულებელი (მერი) ორგანოები, რომლებიც უფრო მეტად ანგარიშვალდებულები და გახსნილები (ღია) იქნებიან საზოგადოების მხრიდან წამოსული მოთხოვნებისა თუ ინიციატივების მიმართ.~

 1. თამაზ ტრაპაიძე

2.  თამარ ხომერიკი

3. ირაკლი პაპავა

4. ლევან ხინთიბიძე

5. გრიგოლ მახარაძე

6. თამარ კალანდარიშვილი

7. სოფიკო კალანდაძე

8. ლევან მჟავანაძე

9. ზვიად ერაძე

10. ირმა შარაშიძე