ევროპის მასშტაბით ჯანდაცვის სისტემები კოვიდჰოსპიტალიზაციის მაჩვენებლებისა და ინფიცირების დონის ზრდის წინაშე დგანან. გარდა ამისა, ჯერჯერობით გაურკვეველია, კორონავირუსის „ომიკრონი“ ვარიანტი რა გავლენას მოახდენს საზოგადოებრივ ჯანდაცვაზე.
„ეს დაღლილობაა. ხალხს ყელში ამოუვიდა არავაქცინირებულ პაციენტებთან ურთიერთობა. მართლა დავიღალეთ. გამოფიტული ვართ“, – განაცხადა აღმოსავლეთ საფრანგეთში, ერთ-ერთი საავადმყოფოს ინტენსიური თერაპიის ანესთეზიოლოგმა, რუსანდრა დივანმა.
ელიზაბეტ გერტნერი, რომელიც საფრანგეთის ქალაქ კოლმარის საჯარო საავადმყოფოში ინტენსიური თერაპიის სამსახურს ხელმძღვანელობს, აცხადებს, რომ ყველაზე სერიოზული შემთხვევების დიდი უმრავლესობა, რომელთა მკურნალობა პანდემიის ბოლო ტალღის დროს მოუწიათ, არავაქცინირებულ პაციენტებზე მოდის.
„საავადმყოფოს პერსონალს შორის სიბრაზისა და იმედგაცრუების განცდა არსებობს“, – აღნიშნა მან.
საფრანგეთის სამეცნიერო საბჭომ 5 ოქტომბრის მოხსენებაში განაცხადა, რომ პანდემიის ხანგრძლივი პერიოდის შემდეგ, ქვეყნის ჯანდაცვის სისტემა, რომელიც პანდემიასთან ბრძოლაში მუდმივად წინა ხაზზე იდგა, მყიფე გახდა.
ერიკ ტიბო, რომელიც ქალაქ კოლმარის საავადმყოფოში სასწრაფო დახმარების განყოფილებას ხელმძღვანელობს, ამბობს, რომ სამედიცინო პერსონალის 10% ავადმყოფობის გამო შვებულებაშია გასული.
„უამრავი ადამიანი მიდის, ვინც გამოფიტულია, ვინც თავის ცხოვრებას ცვლის. მათ არ სურთ ის, რასთანაც საქმე ბოლო წლების განმავლობაში ჰქონდათ და რაც ბოლო დროს გაუარესდა“, – აღნიშნა მან.
ინტენსიური თერაპიის განყოფილებაში, სადაც ექიმი რუსანდრა დივანი მუშაობს, 13-ვე საწოლი ახლა კოვიდპაციენტების მიერ არის დაკავებული. აქედან 11 პაციენტი არავაქცინირებულია. ყველა შედარებით ახალგაზრდაა.
მისი თქმით, სამედიცინო პერსონალი იმედგაცრუებულია, რადგან ამ შედეგის თავიდან აცილება შეიძლებოდა, თუ იგივე ხალხი ვაქცინაციას აირჩევდა.
წყარო: imedinews
