“საქართველოს ცხოველთა დაცვის და გადარჩენის საზოგადოების” ვებგვერდზე გამოქვეყნებული ინფორმაციით ირკვევა, რომ საქართველოში მიტოვებული ძაღლების რეგისტრაცია არასდროს ჩატარებულა, თუმცა, არაოფიციალური მონაცემებით, მათი რიცხვი 200 000-ს აჭარბებს.
ამავე ვებგვერდის ცნობით, ცოფის შემთხვევების რიცხვით, საქართველო ევროპაში პირველ ადგილზეა, ხოლო დაკბენილ ადამიანთა შემთხვევების რაოდენობით კი მსოფლიოში იკავებს პირველ ადგილს.
რეგიონების მიხედვით, კონკრეტული სტატისტიკა არ არსებობს, თუმცა, ფაქტია, რომ გურიის სამივე მუნიციპალიტეტში მიტოვებული ძაღლების სიმრავლის გამო, ადამიანებს უკვე ქუჩაში გადაადგილების ეშინიათ.
თუ “გურია ნიუსის” არქივს გადახედავთ, ნახავთ, რომ ამ პრობლემაზე არაერთი სტატია და ვიდეორეპორტაჟია მომზადებული.
გასული წლის მარტში გამოქვეყნებულ მასალაში საუბარი იყო იმაზე, რომ მიტოვებულმა ძაღლმა ადამიანი ჩოხატაურის პოლიციის მიმდებარე ტერიტორიაზე დაკბინა.
ანალოგიური შემთხვევა რამდენიმე დღის წინაც დაფიქსირდა.
_ ე. წ. ბახმაროს გადასახვევთან, სადაც მოქალაქეები ტრანსპორტს ელოდებიან, გაჩერება, პრაქტიკულად, შეუძლებელია. ათეულობით მიტოვებული ძაღლია აქ, რომლებიც აგრესიულობით გამოირჩევიან. ვის არ მივმართეთ, ვის არ მივწერეთ, მაგრამ უშედეგოდ _ ხალხი მაღაზიაშიც კი ვერ შემოდის შიშით. რამდენჯერმე პოლიციაშიც დავრეკეთ და დახმარება ვითხოვეთ. ჩოხატაურის მერსაც ვთხოვეთ დახმარება. არ ვიცი, რა უნდა გავაკეთოთ, რომ ეს პრობლემა ერთხელ და სამუდამოდ მოგვარდეს რაიონში, _ აღნიშნა “გურია ნიუსთან” საუბრისას ერთ-ერთმა მოქალაქემ, რომელიც აღნიშნულ ტერიტორიაზე მაღაზიას ფლობს.
როგორც გაირკვა, ეს პრობლემა ერთეულებს არ აწუხებთ _ ჩოხატაურში ყველა გამვლელი გეტყვით, რომ ეს არის საკითხი, რომელიც დროულად უნდა მოგვარდეს:
_ იმდენი მიტოვებული ძაღლია ჩოხატაურის ქუჩებში, რომ ადამიანებს გადაადგილება აღარ შეუძლიათ. სკოლიდან ვეღარ გამოდიან მოსწავლეები, საღამოს გავლა კი საერთოდ შეუძლებელია. მაინცდამაინც ვინმე უნდა მოკვდეს ძაღლის ნაკბენით, რომ ყურადღება მოგვაქციონ?
მაღაზიებთან, საავადმყოფოებთან, სკოლებთან _ ყველგან ნახავთ მიტოვებულ ძაღლებს. ზოგი დაავადმყოფებულია. პატრონი რომ ჰყავდეს მუნიციპალიტეტს, ამაზე საუბარიც არ უნდა დაგვჭირდეს. სადაც არ უნდა მიხვიდეთ, ყველა გეტყვით, რომ ეს არის ერთ-ერთი მნიშვნელოვანი პრობლემა, რომელიც დროულად უნდა მოგვარდეს და რომელიც ყველას აწუხებს, _ აღნიშნავენ ჩოხატაურელები “გურია ნიუსთან” საუბრისას.
როგორც მოსახლეობა ამბობს, ძალიან ხშირად დასახმარებლად პოლიციას იძახებენ:
_ დღე არ გავა, დახმარებისთვის პოლიციას ვინმემ არ მიმართოს. პოლიციელები ხან ძაღლებს დასდევენ ქუჩაში, ხან ადამიანებს აცილებენ სახლში. ასე სანამდე უნდა გაგრძელდეს, აღარ ვიცით, _ ამბობენ ადგილობრივები.
ჩოხატაურის მუნიციპალიტეტის მერი ირაკლი კუჭავა არ უარყოფს, რომ მიტოვებული ძაღლები მომრავლებულია:
_ მიუსაფარი ძაღლების მომრავლება მართლაც პრობლემაა. მიუხედავად იმისა, რომ ასეთი ცხოველების გაყვანის, აცრისა და სოციალური ნიშნის დადების ფასი ბოლო ორ წელიწადში თითქმის გასამმაგდა, მერია არ მოერიდება ამ ხარჯს და უკვე დაწყებულია შესაბამისი ღონისძიებების გატარება. იმედი გვაქვს, კონტრაქტორი ორგანიზაცია, რომელთანაც ხელშეკრულება გასულ კვირას გაფორმდა, შეასრულებს ნაკისრ ვალდებულებას და მხოლოდ ამის შემდეგ მიიღებს ანაზღაურებას, _ აღნიშნა ირაკლი კუჭავამ.
