საქართველოს პარლამენტის ეროვნულ ბიბლიოთეკაში ბოლო წლების ყველაზე მასშტაბური გამოფენა _ „ფორმა და სივრცე“ გაიხსნა, რომელიც ხელოვნების ერთ-ერთ ურთულეს დარგს _ ქანდაკებას და მის თანამედროვე გააზრებას ეძღვნება.
გამოფენის ერთ-ერთი კურატორის, GERA-ს საქველმოქმედო პროექტების ხელმძღვანელის, ელიჩკა ნადარეიშვილის თქმით, ქანდაკება ძალიან მნიშვნელოვანი და პრობლემატური სფეროა.
,,ფორმა და სივრცე” არის ერთგვარი ექსკურსია, თუ რა ხდება დღეს ამ დარგში, როგორ ვითარდება, რა ტენდენციები შეინიშნება, რა ტექნოლოგიით მუშაობენ დღეს სხვადასხვა თაობის წარმომადგენელი მოქანდაკეები. გამოფენის ხიბლი სწორედ იმაშია, რომ ის წარადგენს როგორც ასაკოვან, უკვე აღიარებულსა და გამოცდილ ხელოვანებს, ასევე ახალგაზრდა შემოქმედებს, მათ შორის სამხატვრო აკადემიის სტუდენტებსაც. შესაბამისად, ერთ სივრცეში სხვადასხვა დროის, სხვადასხვა მხატვრული ხედვებით შესრულებული კომპოზიციებია თავმოყრილი. ჯგუფური და ქანდაკებების გამოფენები ძალიან იშვიათია და სწორედ ამიტომ გადავწყვიტეთ გაგვეკეთებინა. ფორმა ძალიან შეცვლილია წლების განმავლობაში, რაც ამ ნამუშევრებში ჩანს“,_ამბობს ნადარეიშვილი.
ხელოვნების ერთ-ერთი უმნიშვნელოვანესი სფეროს განვითარების შესახებ „გურია ნიუსი“ ხელოვნებათმცოდნეს და გამოფენის კიდევ ერთ კურატორს, ხათუნა ხაბულიანს ესაუბრა.
ხელოვნებათმცოდნემ განგვიმარტა თუ როგორ განვითარდა ქანდაკება საერთაშორისო სახელოვნებო სივრცეში და როგორ ვითარდება აღნიშნული სფერო საქართველოში.
„საერთაშორისო სახელოვნებო სივრცეში, დასავლეთს, ვგულისხმობ, რომელიც წინ არის და განვითარების უკეთესი შესაძლებლობა ექნება ყოველთვის, გამოირჩევა იმით, რომ ქანდაკება აღარ არის ტრადიციული ძეგლის გაგება, რომელიც დგას დისტანციაზე და რომელსაც უყურებენ, ესთეტიკური კატეგორიებით აფასებენ. თანამედროვე ქანდაკება – ეს არის ინტერაქტიული, მხატვრული ფორმა, რომელიც სივრცეში შეიძლება თანაარსებობდეს ჩვენთან ერთად და არ იყოს შორეული მაგალითი, ისტორიის დამაფიქსირებელი. თანამედროვე ტენდენციებში ძირითადია ის, რომ შეიძლება ძალიან ბანალური თემებიც კი იყოს განხილული ხელოვნების კუთხიდან“,_ ამბობს ხაბულიანი.
ხელოვნებათმცოდნის თქმით, ჩვენთან ქანდაკება ბევრს ჯერ კიდევ ისე ესმის, როგორც ძეგლი. თუმცა, თანამედროვე ხელოვანები იცნობენ და იზიარებენ თანამედროვე მიდგომებს.
„ჩვენთან ჯერ-ჯერობით ძლიერი არის წარსულის ტრადიცია, კონსერვატული მიდგომები ქანდაკებასთან დაკავშირებით. ბევრისთვის ქანდაკება ისევ არის ამ ტრადიციული ძეგლის გაგებით. თანამედროვე ხელოვანები უკვე იცნობენ და იზიარებენ თანამედროვე მიდგომებს და ეს არის მათი ხედვა. ქანდაკებაში რაც არის მნიშვნელოვანი, ის, რომ ხელოვანი ურთიერთობს სივრცესთან, ფორმასთან. გამოფენისთვის კოლექციის შეგროვებისას გვინდოდა, რაც შეიძლება ფართო სურათი გვეჩვენებინა, თუ რა ხდება ჩვენთან ამ მიმართულებით“,_ თქვა ხაბულიანმა.
გამოფენა „ფორმა და სივრცე“ 27 ოქტომბერს გაიხსნა და მსურველებს ნამუშევრების ნახვა 30 ოქტომბრის ჩათვლით შეეძლებათ.
